ହାଇପ୍ରୋଫାଇଲ ଆସନରେ ହେବ ହାଇଭୋଲଟେଜ ଲଢେଇ!ବାପାଙ୍କ ଆସନରୁ ବିଜେଡି ଟିକେଟରେ ଲଢିବେ ପୁଅ, ନରସିଂହଙ୍କୁ ଟକ୍କର ଦେଇପାରିବେ ତ ଅର୍କେଶ?
କନକ ବ୍ୟୁରୋ : ପଶ୍ଚିମ ଓଡିଶାର ହାଇପ୍ରୋଫାଇଲ ବିଧାନସଭା ଆସନ ବଲାଙ୍ଗୀର ପାଇଁ ପ୍ରାର୍ଥୀ ଘୋଷଣା କରିଛି ବିଜେଡି । ପୁଣିଥରେ ରାଜପରିବାରର ସଦସ୍ୟଙ୍କ ଉପରେ ଭରସା କରିଛି ଦଳ । ବାପାଙ୍କ ଆସନରେ ପୁଅଙ୍କୁ ସାମ୍ନାକୁ ଆଣିଛନ୍ତି ବିଜେଡି ସୁପ୍ରିମୋ । ପଶ୍ଚିମ ଓଡିଶାର ହେଭିୱେଟ କୁହାଯାଉଥିବା ଅନଙ୍ଗ ଉଦୟ ସିଂହଦେଓଙ୍କ ବଦଳରେ ତାଙ୍କ ସାନପୁଅ ଅର୍କେଶ ସିଂହଦେଓଙ୍କୁ ଟିକେଟ ଦେଇଛି ଦଳ । ଗତଥର ଏହି ଆସନରୁ ବାପା ଅନଙ୍ଗ ଉଦୟ ଲଢିଥିବା ବେଳେ ଚଳିତଥର ଏହି ଆସନର ମଙ୍ଗ ଧରିଛନ୍ତି ପୁଅ ଅର୍କେଶ ସିଂହଦେଓ ।
Kanak News is now on WhatsApp
Join and get latest news updates delivered to you via WhatsApp
ପ୍ରଥମ ପର୍ଯ୍ୟାୟରେ ଦଳ ୫୪ଟି ବିଧାନସଭା ପ୍ରାର୍ଥୀ ତାଲିକା ଘୋଷଣା କରିଥିବା ବେଳେ ବଲାଙ୍ଗୀର ଆସନକୁ ନେଇ ବଡ ଦ୍ୱନ୍ଦରେ ପଡିଥିଲା । ଏପରିକି ଏହି ହାଇପ୍ରୋଫାଇଲ ଆସନରେ ଦଳ କାହାକୁ ପ୍ରାର୍ଥୀ କରିବ ତାହାକୁ ନେଇ କନଫ୍ୟୁଜନ ଦେଖାଦେଇଥିଲା । ଏପରିକି ସାନପୁଅ ଅର୍କେଶଙ୍କ ରାଜନୈତିକ କ୍ୟାରିୟର ଗଢିବା ପାଇଁ ନିଜେ ନିର୍ବାଚନ ଲଢିବେ ନାହିଁ ବୋଲି ଘୋଷଣା କରିଥିଲେ ଅନଙ୍ଗ ଉଦୟ ସିଂହଦେଓ । କିନ୍ତୁ ଅର୍କେଶଙ୍କୁ ନେଇ ବଲାଙ୍ଗୀର ବାଜି ଖେଳିବାକୁ ପଛାଇଥିଲା ଦଳ । ଏହାଛଡା ନବୀନଙ୍କ ମହିଳା କୋଟାରେ ବଲାଙ୍ଗୀର ଆସନରୁ ପ୍ରାର୍ଥୀ ହେବାକୁ ଅଣ୍ଟା ଭିଡିଥିଲେ ଶ୍ରୀମୟୀ ମିଶ୍ର । ଏପରିକି ଦଳର ଗୋଟିଏ ଗୋଷ୍ଠୀ ଶ୍ରୀମୟୀଙ୍କୁ ପ୍ରାର୍ଥୀ କରିବାକୁ ନବୀନ ନିବାସରେ ଲବି ମଧ୍ୟ ଆରମ୍ଭ କରିଥିଲେ । ଯେଉଁଥିପାଇଁ ବଲାଙ୍ଗୀର ଆସନକୁ ନେଇ ଦ୍ୱନ୍ଦରେ ପଡିଥିଲା ଦଳ ।
ଏହାଛଡା କଂଗ୍ରେସ ଟିକେଟରୁ ବରିଷ୍ଠ ତଥା ରାଜ୍ୟ ରାଜନୀତିର ହେଭିୱେଟ ନେତା ନରସିଂହ ମିଶ୍ର ପ୍ରାର୍ଥୀ ହୋଇଥିବାରୁ ତାଙ୍କୁ ଟକ୍କର ଦେବା ଭଳି ପ୍ରାର୍ଥୀଙ୍କୁ ମୈଦାନକୁ ଆଣିବାକୁ ଅଙ୍କ କଷୁଥିଲା ବିଜେଡି । ତେବେ ଅନଙ୍ଗ ନିଜେ ଲଢୁ ନଥିବା ବେଳେ ତାଙ୍କ ପୁଅଙ୍କୁ ଟିକେଟ ଦେବାକୁ ନବୀନ ନିବାସରେ ଲବି ଆରମ୍ଭ କରିଥିଲେ । ଆଉ ନିଜ ବାଲ୍ୟବନ୍ଧୁ ଅନଙ୍ଗଙ୍କ କଥା ରକ୍ଷା କରି ଅର୍କେଶଙ୍କୁ ବିଜେଡି ସୁପ୍ରିମୋ ନବୀନ ଟିକେଟ ଦେଇଥିବା ଚର୍ଚ୍ଚା ହେଉଛି । ଏହାପୂର୍ବରୁ ବଲାଙ୍ଗୀର ଲୋକସଭା ଆସନ ପାଇଁ ଅନଙ୍ଗଙ୍କ ବଡ ପୁଅ କଳିକେଶଙ୍କୁ ପ୍ରାର୍ଥୀ କରିଛି ବିଜେଡି ।
ବିଜେଡିର ଟିକେଟ ଘୋଷଣା ପରେ ବଲାଙ୍ଗୀର ଆସନରୁ କେଉଁ ଦଳରୁ କେଉଁ ଯୋଦ୍ଧା ମୈଦାନକୁ ଓହ୍ଳାଇବେ ତାହା ସ୍ପଷ୍ଟ ହୋଇଯାଇଛି । ପଶ୍ଚିମ ଓଡିଶାର ଏହି ହାଇପ୍ରୋଫାଇଲ ଆସନରୁ ବିଜେଡି ସିପାହୀ ଭାବେ ଅର୍କେଶ ନିର୍ବଚନ ରଣଭୂମିକୁ ଓହ୍ଳାଉଥିବା ବେଳେ କଂଗ୍ରେସର ଯୋଦ୍ଧା ଭାବେ ମୈଦାନକୁ ଓହ୍ଲାଇବେ ହେଭିୱେଟ ନରସିଂହ ମିଶ୍ର । ସେହିଭଳି ବିଜେପି ମଧ୍ୟ ଏହି ଆସନର ଭାର ଅନନ୍ତ ଦାଶଙ୍କ କାନ୍ଧରେ ଦେଇଛି । ତେଣୁ ଏହି ଆସନରେ କଡା ଟକ୍କ୍ର ଦେଖିବାକୁ ମିଳିବ ବୋଲି ଚର୍ଚ୍ଚା ହେଉଛି ।