ବଲାଙ୍ଗୀରରେ ହେବ ବିଗ୍ ଫାଇଟ । ରାଜପରିବାରର ଦୁଇ ଭାଇଙ୍କ ପ୍ରମୁଖ ପ୍ରତିଦ୍ୱନ୍ଦୀ ସାଜିଛନ୍ତି ମିଶ୍ର ପରିବାରର ବାପା-ପୁଅ ଯୋଡି, କାହାକୁ ଭରସା କରିବେ ଭୋଟର?
କନକ ବ୍ୟୁରୋ : ଦ୍ୱିତୀୟ ପର୍ଯ୍ୟାୟରେ ୫ ଲୋକସଭା ଓ ୩୫ ବିଧାନସଭା ଆସନ ପାଇଁ ନିର୍ବାଚନ ହେବାକୁ ଥିବା ବେଳେ ଫୋକସରେ ରହିଛି ବଲାଙ୍ଗୀର ଆସନ । ବଲାଙ୍ଗୀରର ଉଭୟ ଲୋକସଭା ଓ ବିଧାନସଭା ଆସନରେ ରାଜପରିବାରର ଦୁଇ ଭାଇଙ୍କ ସହ ଲଢିବେ ମିଶ୍ର ପରିବାରର ବାପା-ପୁଅ ଯୋଡି । ଯାହା ବଲାଙ୍ଗୀର ରାଜନୀତିକୁ ରୋଚକ ସ୍ଥିତିକୁ ଟାଣି ଆଣିଛି । ପ୍ରଥମ ଥର ପାଇଁ ଦୁଇ ଭାଇଙ୍କ ସହ ଲଢିବେ ବାପା-ପୁଅ ଯୋଡି । ଆଉ ଏହି ଲଢେଇରେ ରାଜପରିବାରର ବିଜୟ ହେଉଛି ନା ମିଶ୍ର ପରିବାରର ବିଜୟ ହେଉଛି ତାହା ଉପରେ ପୂରା ଜିଲ୍ଲାବାସୀଙ୍କ ନଜର ରହିଛି ।
Kanak News is now on WhatsApp
Join and get latest news updates delivered to you via WhatsApp
ବଲାଙ୍ଗୀର ଲୋକସଭା ଆସନ ପାଇଁ ବିଜେଡି ପଶ୍ଚିମ ଓଡିଶାର ହେଭିୱେଟ ତଥା ବଲାଙ୍ଗୀର ରାଜା ଅନଙ୍ଗ ଉଦୟ ସିଂହଦେଓଙ୍କ ପୁଅ କଳିକେଶ ନାରାୟଣ ସିଂହଦେଓଙ୍କୁ ମୈଦାନକୁ ଓହ୍ଲାଇଛି । ଆଉ ରାଜପରିବାରର ଦବଦବାକୁ ମାତ୍ ଦେବାକୁ କଂଗ୍ରେସ ରାଜ୍ୟ ରାଜନୀତିରେ ପୋଖତ ଖେଳୁଆଡର ପରିଚୟ ଦେଇଥିବା ନରସିଂହ ମିଶ୍ରଙ୍କ ପୁଅ ସମରେନ୍ଦ୍ର ମିଶ୍ରଙ୍କୁ ପ୍ରଥମ ଥର ନିର୍ବାଚନରେ ଡେବ୍ୟୁ କରାଇଛି । ପୂର୍ବରୁ ଏହି ଆସନ ରାଜପରିବାରର ଗଡ ଭାବରେ ରହି ଆସିଥିବାରୁ ଏହାକୁ ଭେଦ କରିବାକୁ ନବାଗତ ଯୋଦ୍ଧାକୁ ମୈଦାନକୁ ଓହ୍ଲାଇଛି କଂଗ୍ରେସ । କିନ୍ତୁ ଲଗାତାର ଦୁଇଥର ବିଜୟୀ ହୋଇ ଆସିଥିବା କଳିକେଶ ମଧ୍ୟ ନିର୍ବାଚନ ବାଜି ଜିତିବା ପାଇଁ ଭିନ୍ନ ରଣନୀତି କରିଛି । ଏପରିକି ବିଜୟର ହ୍ୟାଟ୍ରିକ ମାରିବାକୁ କଳିକେଶ ଅଙ୍କ କଷୁଛନ୍ତି ।
ସେହିଭଳି ବଲାଙ୍ଗୀର ବିଧାନସଭା ଆସନରେ ସିଂହ ସାଙ୍ଗିଆ ଧାରୀ ଓ ସିଂହ ନାମଧାରୀଙ୍କ ମଧ୍ୟରେ ସିଂହାସନ ଦଖଲ କରିବା ପାଇଁ ହେବ ଲଢେଇ । କ୍ଷମତା ଲଢେଇରେ ବାଜି ମାରିବାକୁ ଅଭିଜ୍ଞ ନରସିଂହ ମିଶ୍ର ଓ ନବାଗତ ଅର୍କେଶ ସିଂହଦେଓଙ୍କ ମଧ୍ୟରେ ଦେଖିବାକୁ ମିଳିବ ବିଗ୍ ଫାଇଟ । ବିଜେଡି ଏହି ଆସନରୁ ଏୟୁ ସିଂହଦେଓଙ୍କ ସାନପୁଅ ତଥା ରାଜନୀତିରେ ନୂଆ କରି ଏଣ୍ଟ୍ରି ମାରିଥିବା ଅର୍କେଶଙ୍କୁ ନିର୍ବାଚନ ରଣଭୂମିକୁ ଓହ୍ଲାଇଥିବା ବେଳେ କଂଗ୍ରେସରୁ ଅଭିଜ୍ଞ ଯୋଦ୍ଧା ନରସିଂହଙ୍କୁ ମୈଦାନକୁ ଓହ୍ଲାଇଛନ୍ତି । ତେଣୁ ଏହି ଆସନରେ ମଧ୍ୟ ରାଜପରିବାର ଓ ମିଶ୍ର ପରିବାର ମଧ୍ୟରେ ଘମାଘୋଟ ଲଢେଇ ଦେଖିବାକୁ ମିଳିବ ବୋଲି ଚର୍ଚ୍ଚା ଜୋର ଧରିଛି ।
ପୂର୍ବରୁ ଏହି ଆସନରେ ଅଭିଜ୍ଞ ନରସିଂହ ରାଜପରିବାରର ବିଜୟଧାରାରେ ବ୍ରେକ ଲଗାଇଥିବା ବେଳେ ପୁଣିଥରେ ଏହାର ପୁନରାବୃତ୍ତି କରିବାକୁ ଲକ୍ଷ୍ୟ ରଖିଛନ୍ତି । ୨୦୧୪ରେ ବଲାଙ୍ଗୀର ରାଜା ଅନଙ୍ଗଉଦୟଙ୍କୁ ମାତ୍ ଦେଇ ନରସିଂହ ନିର୍ବାଚନ ରଣଭୂମିରେ ବିଜୟ ବାନା ଉଡାଇଥିଲେ । କିନ୍ତୁ ଚଳିତଥର କଂଗ୍ରେସରୁ ନରସିଂହ ମୈଦାନରେ ଥିବା ବେଳେ ବିଜେଡି ଶିବିରରୁ ବାପାଙ୍କ ବଦଳରେ ମୈଦାନକୁ ଓହ୍ଲାଇଛନ୍ତି ପୁଅ । ତେଣୁ ଏହି ନୂଆ ରଣନୀତିରେ ବିଜେଡି କେତେ ସଫଳ ହେଉଛି ତାହା ଦେଖିବା ବାକି ରହିଲା ।