ଅନୁଗୋଳ : ନେତାଙ୍କ ଲଢେଇ ବିଜେଡିକୁ କାଳ, ବିଜେପି ପାଇଁ ବିପଦ ଅନ୍ତଃକନ୍ଦଳ! ଦୁର୍ବଳ ‘ହାତ’ କେମିତି ପାଇବ ବଳ?
କନକ ବ୍ୟୁରୋ : ପଞ୍ଚାୟତ ନିର୍ବାଚନ ପାଇଁ ସରଗରମ ହୋଇଛି ଅନୁଗୋଳ ରାଜନୀତି । ଚଳିତ ପଞ୍ଚାୟତ ନିର୍ବାଚନରେ ରାଜ୍ୟର ଅଧିକାଂଶ ଜିଲ୍ଲାରେ ଦଳୀୟ ସମର୍ଥନ ପାଇବାକୁ ଏକାଧିକ ପ୍ରାର୍ଥୀଙ୍କ ନାମାଙ୍କନଦାଖଲ ବଡ ସମସ୍ୟା ଭାବେ ରାଜନୈତିକ ଦଳର ଚିନ୍ତା ବଢାଇଛି । ଆଉ ଏଥିରୁ ଅନୁଗୋଳ ମଧ୍ୟ ବାଦ୍ ପଡିନି । ତେଣୁ ଜିଲ୍ଲା ରାଜନୀତି ଏବେ କେଉଁ ମୋଡକୁ ଗତି କରିବ ତାହାର ଅନ୍ଦାଜ ଲଗାଇବା ମୁସ୍କିଲ ହୋଇପଡିଛି । କାରଣ ପୂର୍ବରୁ ବିଜେଡିର ଗଡ ରହି ଆସିଥିବା ଅନୁଗୋଳ ଜିଲ୍ଲାରେ ଏଥର ବଡଧରଣର ଓଲଟପାଲଟ ହୋଇପାରେ ବୋଲି ଚର୍ଚ୍ଚା ହେଉଛି । ଆଉ ଏହାପଛର କାରଣ ହେଲା ବିଜେଡିରେ ନେତାଙ୍କ ମଧ୍ୟରେ ଥିବା ଅନ୍ତଃକନ୍ଦଳ । ଏହାଛଡା କେନ୍ଦ୍ରମନ୍ତ୍ରୀ ଧର୍ମେନ୍ଦ୍ରଙ୍କ ପ୍ରଧାନଙ୍କ ଜିଲ୍ଲା ହୋଇଥିବାରୁ ବିଜେପି ଫୋକସରେ ରହିଛି ଅନୁଗୋଳ । ସେହିଭଳି ବିଜେଡି-ବିଜେପି ଲଢେଇ ମଧ୍ୟରେ କଂଗ୍ରେସ ଏଠାରେ ହାତ ଟେକିବାକୁ ଜୋରଦାର ଉଦ୍ୟମ କରୁଛି ।
Kanak News is now on WhatsApp
Join and get latest news updates delivered to you via WhatsApp
ଗତ ୨୦୧୭ ପଞ୍ଚାୟତ ନିର୍ବାଚନରେ ବିଜେଡି ୨୮ଟି ଜିଲ୍ଲା ପରିଷଦ ଆସନରୁ ୧୬ଟି ଦଖଲ କରିବା ସହ ଜିଲ୍ଲା ପରିଷଦ ଅଧ୍ୟକ୍ଷ ପଦ ହାତେଇଥିଲା । କିନ୍ତୁ ଏଥିପାଇଁ ଦଳକୁ କଡା ଚ୍ୟାଲେଞ୍ଜର ସମ୍ମୁଖୀନ ହେବାକୁ ପଡିଥିଲା । ତେବେ ଏଥର ଅନୁଗୋଳ ଜିଲ୍ଲା ବିଜେଡି ରାଜନୀତିରେ ବଡ ଧରଣର ଅନ୍ତଃକନ୍ଦଳ ଦଳ ପାଇଁ ବୁମେରାଂ ସାଜିପାରେ । ନେତାଙ୍କ ଭିତରେ ଥିବା କନ୍ଦଳ ଏହା ଭିତରେ ଉଗ୍ର ରୂପ ନେଇଛି । ସାଂସଦ-ବିଧାୟକଙ୍କ ମଧ୍ୟରେ ଥିବା କନ୍ଦଳ ଦଳର ଭୋଟବ୍ୟାଙ୍କକୁ ଭୟଙ୍କର ମାତ୍ରାରେ ପ୍ରଭାବିତ କରିପାରେ ବୋଲି କୁହାଯାଉଛି । ଏହାସତ୍ତେ୍ୱ ମଧ୍ୟ ଦଳ ଏଠାରେ ୨୦୧୭ ତୁଳନାରେ ଭଲ ପ୍ରଦର୍ଶନ କରିବାକୁ ଲକ୍ଷ୍ୟ ରଖିଛି । ଯେହେତୁ ଜିଲ୍ଲାର ୫ ଜଣ ବିଧାୟକ ବିଜେଡି ଦଳରୁ ରହିଛନ୍ତି, ତେଣୁ ଅଧିକରୁ ଅଧିକ ଜିଲ୍ଲା ପରିଷଦ ଜୋନ୍ ଭେଟି ଦେଇ ଆଗାମୀ ୨୦୨୪ ବିଧାନସଭା ଟିକେଟ ପକ୍କା କରିବା ଲକ୍ଷ୍ୟରେ ରହିଛନ୍ତି ବିଜେଡି ବିଧାୟକ ।
ଅନ୍ୟପଟେ ବିଜେଡି ମଧ୍ୟରେ ଥିବା ଅନ୍ତଃକନ୍ଦଳର ଫାଇଦା ନେବା ଲକ୍ଷ୍ୟରେ ରହିଛି ବିଜେପି । ଏପରିକି ଚଳିତଥର ଜିଲ୍ଲା ପରିଷଦ ଅଧ୍ୟକ୍ଷ ପଦ ହାତେଇବା ପାଇଁ ଦଳ ପକ୍ଷରୁ ବ୍ଲୁ-ପ୍ରିଣ୍ଟ ପ୍ରସ୍ତୁତ କରାଯାଉଛି । କେନ୍ଦ୍ରମନ୍ତ୍ରୀ ଧର୍ମେନ୍ଦ୍ରଙ୍କ ଅନୁଗତ କାଳନ୍ଦୀ ସାମଲ ପଞ୍ଚାୟତ ପରୀକ୍ଷାରେ ଦଳକୁ ବିଜୟୀ କରିବାକୁ ରଣନୀତି ପ୍ରସ୍ତୁତ କରୁଛନ୍ତି । ଆଉ ବିଜେପିର ପଞ୍ଚାୟତ ରଣନୀତିକୁ ବଳ ଯୋଗାଇଛି ପୂର୍ବତନ ମନ୍ତ୍ରୀ ସଞ୍ଜୀବ ସାହୁଙ୍କ ଦଳରେ ଯୋଗଦାନ । ଯାହା ବିଜେପିକୁ ପଞ୍ଚାୟତ ଫାଇଟରେ ଗୋଟିଏ ପାଦ ଆଗରେ ରଖିଛି । ଗତ ୨୦୧୭ ନିର୍ବାଚନରେ ଶାସକ ବିଜେଡିକୁ କଡା ଟକ୍କର ଦେଇଥିଲା ବିଜେପି । ଦଳ ୧୨ ଜିଲ୍ଲା ପରିଷଦ ଆସନ ହାତେଇବା ସହ ଏଠାରେ ନିଜର ଦବଦବା ଜାହିର କରିଥିଲା । ତେଣୁ ଚଳିତ ଥର ମ୍ୟାଜିକ ନମ୍ବର ହାସଲ ଲକ୍ଷ୍ୟରେ ରହିଛି ଦଳ । କିନ୍ତୁ ବିଜେପି ପାଇଁ ଏହି ବାଜି ଜିତିବା ଏତେ ସହଜ ନୁହେଁ । କାରଣ ଗତଥର ଦଳକୁ ଯେଉଁଭଳି ସଫଳତା ମିଳିଥିଲା ସେହି ଦୃଷ୍ଟିରୁ ଅନେକ ଆଶାୟୀ ବିଜେପିରୁ ପ୍ରାର୍ଥୀ ହେବାକୁ ଚାହିଁଥିଲେ । କିନ୍ତୁ ଜିଲ୍ଲା ପରିଷଦ ଆସନ ପାଇଁ ଦଳୀୟ ଟିକେଟ ଘୋଷଣା ପରେ ଦଳରେ ଅସନ୍ତୁଷ୍ଟଙ୍କ ସଂଖ୍ୟା ବଢିଛି । ଯାହା ବିଜେପିର ଅନୁଗୋଳ ବିଜୟୀ ସ୍ୱପ୍ନକୁ ଅଧାରେ ଅଟକାଇପାରେ ।
ସେହିଭଳି କଙ୍କଡାକୁ ଗୋଳି ପାଣି ସୁହାଇବା ଭଳି ବିଜେଡି-ବିଜେପି ମଧ୍ୟରେ କଡା ଫାଇଟ କଂଗ୍ରେସକୁ ବେଶ ସୁହାଇବ ବୋଲି କୁହାଯାଉଛି । ଗତ ନିର୍ବାଚନରେ ଦଳ ଦ୍ୱିତୀୟରୁ ତୃତୀୟ ସ୍ଥାନକୁ ଖସିଥିଲା ସତ କିନ୍ତୁ ଏଥର ତ୍ରିମୁଖୀ ଲଢେଇରେ ନିଜକୁ ସାମିଲ କରିଛି କଂଗ୍ରେସ । ନିଜର ପାରମ୍ପରିକ ଭୋଟ ବଳରେ ବିଜେଡି-ବିଜେପି ପାଇଁ ଅଡୁଆ ସୃଷ୍ଟି କରିପାରେ କଂଗ୍ରେସ । ଏହାଛଡା ଅଧିକରୁ ଅଧିକ ଯୁବକଙ୍କୁ ରାଜନୀତି ମୈଦାନକୁ ଓହ୍ଲାଇ ଯୁବବର୍ଗଙ୍କ ଭୋଟ ହାତେଇବା ଲକ୍ଷ୍ୟରେ ରହିଛି ଦଳ । ଆଉ ଏହାର ମଙ୍ଗ ଧରିଛନ୍ତି ପୂର୍ବତନ ବିଧାୟକ ରମେଶ ଜେନାଙ୍କ ପୁଅ ବିପ୍ଲବ ଜେନା ।
ଏସବୁ ଭିତରେ ଜିଲ୍ଲା ପରିଷଦ ନିର୍ବାଚନ ଆରମ୍ଭ ହେବା ପରଠାରୁ ଅନୁଗୋଳକୁ ବିଜେଡି ନିଜର ଗଡ କରିଛି । କେବଳ ୨୦୦୭ରେ ଏହି ଗଡକୁ ଅକ୍ତିଆର କରିଥିଲା କଂଗ୍ରେସ । କିନ୍ତୁ ୨୦୧୨ରେ ପୁରୁଣା ସଫଳତା ଦୋହରାଇ ବିଜେଡି ପୁଣିଥରେ ବିଜୟୀ ଟିକା ପିନ୍ଧିଥିଲା । କିନ୍ତୁ ୨୦୧୭ରେ ସ୍ଥିତିରେ ଯେଉଁ ପରିବର୍ତ୍ତନ ଦେଖା ଦେଇଥିଲା ତାହା ବିଜେଡି ପାଇଁ ସତର୍କଘଣ୍ଟି ବଜାଇଥିଲା । କାରଣ ଅଧିକାଂଶ ଜିଲ୍ଲା ପରିଷଦ ଆସନରେ ବିଜେଡି ପ୍ରାର୍ଥୀ ଅଳ୍ପ ଭୋଟରେ ବିଜୟୀ ହୋଇଥିଲେ । ଆଉ ଏବେ ୨୦୨୨ ନିର୍ବାଚନ ସାମ୍ନା କରିବାକୁ ଯାଉଛି ଦଳ । ଦଳ ଭିତରେ ଅନ୍ତଃକନ୍ଦଳ ଏବେ ଅନେକ ପ୍ରଶ୍ନବାଚୀ ଛିଡା କରିଛି । ପୂର୍ବ ସଫଳତା ଦୋହରାଇ ପାରିବ କି ବିଜେଡି? ନା ଅନ୍ତଃକନ୍ଦଳ ଦଳ ପାଇଁ କାଳ ହେବ । ସେହିଭଳି ବିଜେଡିର ଅନ୍ତଃକନ୍ଦଳ ବିଜେପି ପାଇଁ ସୁଯୋଗ ସୃଷ୍ଟି କରିଛି, ଏହାର ଫାଇଦା ନେଇପାରିବ ତ ଦଳ? କଂଗ୍ରେସ ମଧ୍ୟ କମବ୍ୟାକ କରିବାକୁ ସୁଯୋଗ ରହିଛି, କିନ୍ତୁ ଭୋଟରଙ୍କ ଭରସା ଜିତିପାରିବ କି ନାହିଁ ତାହା ଉପରେ ସମସ୍ତଙ୍କର ନଜର ରହିବ ।