ଆମେରିକାରେ ଭାଙ୍ଗିବ ଦୀର୍ଘ ବର୍ଷର ପରମ୍ପରା । ଡୋନାଲ୍ଡ ଟ୍ରମ୍ପଙ୍କୁ ଗୋପନୀୟ ସୂଚନା ଦେବ ନାହିଁ ବାଇଡେନ ସରକାର ।
କନକ ବ୍ୟୁରୋ: ଆମେରିକାର ପୂର୍ବତନ ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କୁ ଗୋପନୀୟ ସୂଚନା ଦେବ ନାହିଁ ବାଇଡେନ ସରକାର । ଦୀର୍ଘ ଦିନ ହେଲା ଅନୁସରଣ କରାଯାଇ ଆସୁଥିବା ଏହି ପରମ୍ପରା ଭାଙ୍ଗିବାକୁ ଯାଉଛି । ଆମେରିକାର ଏକ ଟିଭି ଚ୍ୟାନଲେକୁ ସାକ୍ଷାତକାର ଦେଇ ରାଷ୍ଟ୍ରପତି ଜୋ ବାଇଡେନ ଏହା ସ୍ପଷ୍ଟ କରିଛନ୍ତି । ସେ କହିଛନ୍ତି, ଟ୍ରମ୍ପ ଗୁଇନ୍ଦା ସୂଚନା ପାଇବା ଦେଶପ୍ରତି ବିପଦ ଓ ତାଙ୍କ ପାଟି ଲଗାମହୀନ । ତେଣୁ ଗୁଇନ୍ଦା ସୂଚନା ମିଳିଲେ ଟ୍ରମ୍ପ ଇୟାଡୁ ସିୟାଡୁ ବୟାନ ଦେଇ ଦେଶର ସମସ୍ୟା ବଢାଇବେ ବୋଲି କହିଛନ୍ତି ବାଇଡେନ ।
Kanak News is now on WhatsApp
Join and get latest news updates delivered to you via WhatsApp
ଆମେରିକା ଇତିହାସରେ ପ୍ରଥମ ଥର ପାଇଁ କୌଣସି ପୂର୍ବତନ ରାଷ୍ଟ୍ରପତିଙ୍କୁ କ୍ଲାସିଫାଇଡ ଇଂଟିଲିଜେନ୍ସ ବା ଗୁଇନ୍ଦା ତଥ୍ୟ ଦିଆଯିବ ନାହିଁ । ଆମେରିକା ରାଷ୍ଟ୍ରପତି ଜୋ ବାଇଡେନ ଶୁକ୍ରବାର ଏହା ସ୍ପଷ୍ଟ କରିଛନ୍ତି । ଆମେରିକା ଚ୍ୟାନାଲ ସିବିଏସ ନ୍ୟୁଜକୁ ସାକ୍ଷାତକାର ଦେଇ ବାଇଡେନ କହିଛନ୍ତି, ଟ୍ରମ୍ପଙ୍କୁ କୌଣସି ପ୍ରକାର ଗୋପନୀୟ ତଥ୍ୟ ଦିଆଯିବ ନାହିଁ । କାରଣ ଡୋନାଲ୍ଡ ଟ୍ରମ୍ପଙ୍କ ବ୍ୟବହାର ଓ ତାଙ୍କ ପାଟି ଉପରେ ଭରସା କରାଯାଇ ପାରିବ ନାହିଁ ।
ଆମେରିକା ରାଷ୍ଟ୍ରପତି ଜୋ ବାଇଡେନଙ୍କ ଏପରି ଘୋଷଣା ବିସ୍ମୟଜନକ । କାରଣ ଆମେରିକାରେ ଦୀର୍ଘ ଦିନରୁ ପରମ୍ପରା ରହିଛି, ବର୍ତମାନର ରାଷ୍ଟ୍ରପତି ଯେତିକି ଗୁଇନ୍ଦା ସୂଚନା ପାଆନ୍ତି, ସେତିକି ସୂଚନା ପୂର୍ବତନ ରାଷ୍ଟ୍ରପତିଙ୍କୁ ମଧ୍ୟ ଦିଆଯାଇ ଥାଏ । ହେଲେ ଏଥର ସେହି ପରମ୍ପରା ଭାଙ୍ଗିବାକୁ ଯାଉଛି ।
ଏହାପୂର୍ବରୁ ହ୍ୱାଇଟ ହାଉସର ପ୍ରେସ ସେକ୍ରେଟାରୀ ଜେନ ସାକି ଚଳିତ ସପ୍ତାହର ଆରମ୍ଭ କହିଥିଲେ, ଟ୍ରମ୍ପଙ୍କୁ ଗୁଇନ୍ଦା ସୂଚନା ଦିଆଯିବ ନା ନାହିଁ, ସେ ଉପରେ ବିଚାର ବିମର୍ଶ ଚାଲିଛି । ଏବେ ଆଭିମୁଖ୍ୟ ସ୍ପଷ୍ଟ କରିଛନ୍ତି ରାଷ୍ଟ୍ରପତି ଜୋ ବାଇଡେନ୍ । ହୁଏତ କ୍ୟାପିଟଲ ହିଲ ଦଙ୍ଗା ପରେ ଟ୍ରମ୍ପ ଉପରେ ଭରସା କରିପାରୁ ନାହାନ୍ତି ବାଇଡେନ । ଅନ୍ୟପଟେ ଗୋଇନ୍ଦା ସୂଚନା ପାଇବା ପୂର୍ବତନ ରାଷ୍ଟ୍ରପତିଙ୍କ ଅଧିକାର ପରିସର ଭୁକ୍ତରୁ ବଂଚିତ ହେବା ଟ୍ରମ୍ପଙ୍କ ପାଇଁ ଯେ ଏକ ବଡ ଅପମାନ ଏଥିରେ ସନ୍ଦେହ ନାହିଁ । ସେପଟେ ଟ୍ରମ୍ପଙ୍କ ବିରୋଧରେ ମହାଭିଯୋଗ ପ୍ରକ୍ରିୟା ଆରମ୍ଭ ହୋଇଥିବା ବେଳେ ଫେବୃୟାରୀ ୮ ପରେ ଯେକୌଣସି ଦିନ କ୍ୟାପିଟଲ ଦଙ୍ଗା ନେଇ ବୟାନ ଦେବା ପାଇଁ ତାଙ୍କୁ ସିନେଟକୁ ଡକାଯାଇପାରେ