ଭୁବନେଶ୍ୱର ରହସ୍ୟମୟ ଛୁରାମାଡ ଘଟଣା : ଗିରଫ ହେଲେ ରୂପେଶ ପଣ୍ଡା
ଲୁଟ ଉଦ୍ୟମ ପାଇଁ ୩୯୩ ଓ ହତ୍ୟା ଉଦ୍ୟମ ପାଇଁ ଲାଗିଲା ୩୦୭ ଦଫା; ଲୁଟ ପାଇଁ ରୂପେଶ ଯୁବତୀ ବେଶରେ ଆସିଥିବା ଧୀରେ ଧୀରେ ହେଉଛି ସ୍ପଷ୍ଟ
କନକ ବ୍ୟୁରୋ : ଭୁବନେଶ୍ୱରରେ ଯୁବତୀ ବେଶରେ ଘରେ ପଶି ମାଆ, ଝିଅଙ୍କୁ ମରଣାନ୍ତକ ଆକ୍ରମଣ ଘଟଣାରେ ଅଭିଯୁକ୍ତ ଗିରଫ । ଅଭିଯୁକ୍ତ ପଡୋଶୀ ରୁପେଶ ପଣ୍ଡାକୁ ଗିରଫ କଲା ପୋଲିସ । ଲୁଟ୍ ପାଇଁ ଯୁବତୀ ବେଶରେ ଯାଇ ଏଭଳି କାଣ୍ଡ ଘଟାଇଥିବା ସ୍ପଷ୍ଟ ହେଉଛି । ରୂପେଶ ବିରୋଧୀରେ ସଂଗୀନ ଦଫା ଲାଗିଛି । ୩୦୭ ହତ୍ୟା ଉଦ୍ୟମ, ୩୯୩ ଲୁଟ୍ ଉଦ୍ୟମ ପରି ଦଫା ଲାଗିଛି । ଗତକାଲି ହସ୍ପିଟାଲରୁ ଡିସଚାର୍ଜ ହେବା ପରେ ଚନ୍ଦ୍ରଶେଖରପୁର ଥାନାରେ ରୁପେଶ ପଣ୍ଡାକୁ ଅଟକ ରଖିଥିଲା ପୋଲିସ । ସୋମବାର ଦିନ ପ୍ରାୟ ୧୨ଟା ବେଳେ ରାଜଧାନୀର ଶୈଳଶ୍ରୀବିହାର ଅଂଚଳରେ ଯୁବତୀ ବେଶରେ ପଡୋଶୀଙ୍କ ଘରେ ପଶି ରୂପେଶ ପଣ୍ଡା ଉନ୍ମତକାଣ୍ଡ ଘଟାଇଥିଲେ ।
Kanak News is now on WhatsApp
Join and get latest news updates delivered to you via WhatsApp
ସୂଚନାଯୋଗ୍ୟ, ଶୈଳଶ୍ରୀବିହାର ଭିଆଇଏମ୍ କଲୋନିରେ ରହୁଥିବା ଅବସରପ୍ରାପ୍ତ ପ୍ରଫେସର ସୁରେଶ ମିଶ୍ରା ଘରେ ନଥିବା ବେଳେ ହଠାତ୍ ରୂପେଶ ମ୍ୟାକ୍ସି ପିନ୍ଧି ତାଙ୍କ ଘରେ ପଶିଥିଲା । ମୁଣ୍ଡରେ ହେଲ୍ମେଟ୍ ଥିବାରୁ ପ୍ରଫେସର ମିଶ୍ରାଙ୍କ ସ୍ତ୍ରୀ ଓ ଝିଅ ରୂପେଶକୁ ଚିହ୍ନି ପାରିନଥିଲେ । ସେମାନେ କବାଟ ଖୋଲିବା ମାତ୍ରେ ରୂପେଶ ଏକ ଖେଳଣା ବନ୍ଧୁକ ଓ ଛୁରି ଦେଖାଇ ମା’ ଝିଅଙ୍କୁ ରଶିରେ ବାନ୍ଧିବାକୁ ଉଦ୍ୟମ କରିଥିଲା । ମାତ୍ର ସାହସ ଜୁଟାଇ ମା’, ଝିଅ ରୂପେଶକୁ ପାଲଟା ଆକ୍ରମଣ କରିଥିଲେ। ଧସ୍ତାଧସ୍ତିରେ ଉଭୟ ପକ୍ଷ ଆହତ ହୋଇଥିଲେ । ପାଟି ଶୁଣି ସ୍ଥାନୀୟ ଲୋକେ ସେଠାରେ ପହଞ୍ଚିଯିବା ପରେ ମ୍ୟାକ୍ସି ପିନ୍ଧା ଲୋକଟି ରୂପେଶ ବୋଲି ଜଣା ପଡ଼ିଥିଲା ।