ରାଜଧାନୀ ଏଟିଏମ ଲୁଟର ପର୍ଦ୍ଦାଫାସ କଲା ପୋଲିସ୍ । ଲୁଟ ପଛରେ ଅନ୍ତଃରାଜ୍ୟ ଲୁଟେରା ଗ୍ୟାଙ୍ଗ
କନକ ବ୍ୟୁରୋ : ଏଟିଏମ ତାଡି ଟଙ୍କା ଗାଏବ କରିଦେଲେ ଲୁଟେରା । ଯାହାକୁ ନେଇ ରାଜଧାନୀରେ ଖେଳିଗଲା ଚାଂଚଲ୍ୟ । କିଏ , କେମିତି ଓ କେଉଁ ଉପାୟରେ ଏଟିଏମକୁ କଳାକନା ବୁଲାଇଲା ତାର ସୁରାକ ବି ପାଇନଥିଲା ପୋଲିସ୍ । ଲୁଟେରାଙ୍କୁ ଧରିବା ପାଇଁ ଦାୟିତ୍ୱ ନେଲା ସ୍ପେଶାଲ ସ୍କାର୍ଡ । ଶୁକ୍ରବାର ଏଟିଏମ ଲୁଟର ପର୍ଦାଫାସ କରିଛି ପୋଲିସ୍ । ଲୁଟ ପଛରେ ଥିଲେ ଏହି ଦୁଇ ଅଭିଯୁକ୍ତ । ଯେଉଁମାନେ କି ଭାଇଜାଗ ପୋଲିସର କବଜାରେ ଅଛନ୍ତି । ପଞ୍ଜାବର ସମରଜିତ୍ ସିଂହ ଓ କେରଳରୁ ଜଫର ସଦ୍ଦିକ । ଏମାନଙ୍କ ଲୁଟର କାହାଣୀ ଶୁଣି ପୋଲିସ ବି ଚକିତ ହୋଇ ଯାଇଥିଲା ।
Kanak News is now on WhatsApp
Join and get latest news updates delivered to you via WhatsApp
ଅପରେସନ ଥିଲା ଠିକ୍ ଏହି ପରି .. ଫ୍ଲାଇଟରେ ଆସୁଥିଲେ, ଲୁଟୁଥିଲେ, ଆଉ ଟଙ୍କା ଧରି ଅନ୍ୟ ରାଜ୍ୟକୁ ଫେରାର ହୋଇ ଯାଉଥିଲେ । ୪ ତାରିଖରେ ବାହାରି ୫ ତାରିଖ ଦିନ ଏହି ଦୁଇ ଲୁଟେରା କଲିକତାରୁ ଫ୍ଲାଇଟ୍ ଯୋଗେ ଭୁବନେଶ୍ୱରରେ ପହଁଚିଥିଲେ । ୫ତାରିଖରୁ ଏକ ହୋଟେଲରେ ରହି ପ୍ରସ୍ତୁତ କରିଥିଲେ ଲୁଟର ନକ୍ସା । ସ୍କୁଟିରେ ବୁଲି ବୁଲି ରେକି କରୁଥିଲେ ରାଜଧାନୀରେ ଥିବା ଏଟିଏମକୁ । ଗ୍ୟାସ କଟର ସାହାଯ୍ୟରେ ୧୦ ତାରିଖ ଓ ୧୧ ତାରିଖ ରାତିରେ ପିଏନବିର ଏଟିଏମରୁ ତାଡି ନେଇଥିଲେ ୨୭ ଲକ୍ଷ ୮୪ ହଜାର ଟଙ୍କା ।
ଲୁଟ କରିବା ପରେ ଭୁବନେଶ୍ୱରରୁ ଫ୍ଲାଇଟ୍ ଯୋଗେ ସକାଳ ୭ଟା ୪୦ ମିନିଟରେ ଦିଲ୍ଳୀ ବାହାରି ଯାଇଥିଲେ । ଦିଲ୍ଲୀରୁ ଟ୍ୟାକ୍ସି ଯୋଗେ ଚଣ୍ଡିଗଡରେ ପହଁଚିଥିଲେ ଲୁଟେରା । ସେଠାରୁ ଫ୍ଲାଇଟ ଯୋଗେ ବେଙ୍ଗାଲୁର ଓ ତାପରେ ଭାଇଜାଗରେ ପହଁଚି ଯାଇଥିଲେ । ସେଠାରେ ପୁଣି ଏକ ଏଟିଏମ ତାଡି ୯ ଲକ୍ଷ ଟଙ୍କା ଲୁଟ ଘଟଣାରେ ଭାଇଜାଗ ପୋଲିସ ହାତରେ ଗିରଫ ହୋଇଥିଲେ । ସେତେବେଳେ କମିଶନରେଟ ପୋଲିସ ସ୍ପେଶାଲ ସ୍କାର୍ଡ ପହଁଚିଯାଇଥିଲା ଭାଇଜାଗରେ । ଆଉ ଗୋଟି ଗୋଟି କରି ସତ ମାନି ଯାଇଥିଲା ଲୁଟେରା ।
୨୭ ଲକ୍ଷରୁ ଉର୍ଦ୍ଧ ଟଙ୍କା ଧାରିଲୁଟେରାମାନେ କେମିତି ଫ୍ଲାଇଟ୍ ଯାତ୍ରା କରିଥିଲେ ? ଭାଇଜାଗରୁ ଲୁଟ ହୋଇଥିବା ଟଙ୍କାର ସିଂହଭାଗ ସେମାନଙ୍କ ସମ୍ପର୍କୀୟଙ୍କ ଆକାଉଟରେ ଜମା କରିଦେଇଥିଲେ ଲୁଟେରା । ତେଣୁ ଭୁବନେଶ୍ୱରରୁ ଲୁଟ ହୋଇଥିବା ଟଙ୍କା କୌଣସି ସମ୍ପର୍କୀୟଙ୍କ ଆକାଉଂଟରେ ଜମା କରିଥିଲେ କି ଲୁଟେରା? ଏସବୁ ରହସ୍ୟ ଉପରୁ ପର୍ଦା ଉଠାଇବା ପାଇଁ ଲୁଟେରାଙ୍କୁ ଟ୍ରାଞ୍ଜିଟ ରିମାଣ୍ଡରେ ଆଣି ପଚରାଉଚରା କରିବ କମିଶନରେଟ୍ ପୋଲିସ ।