ହଳଲଙ୍ଗଳ ଧରି ଶିକ୍ଷକ ଆଶାୟୀଙ୍କ ଆନ୍ଦୋଳନ । ଗ୍ରହଶାନ୍ତି ପୂଜା କଲେ ହାଇସ୍କୁଲ ଶିକ୍ଷକ, ବିଜୁଳି ଦରବୃଦ୍ଧି ପ୍ରତିବାଦରେ ବିଧାନସଭା ଘେରିଲା ବିଜେପି ।
କନକ ବ୍ୟୁରୋ : ବିଧାନସଭା ଚାଲିଛି ଆଉ ଗାନ୍ଧି ମାର୍ଗରେ ସରକାରଙ୍କ ଦୃଷ୍ଟି ଆକର୍ଷଣ କରିବାକୁ ପ୍ରତିବାଦ ହେଉଛି । ଗଣଶିକ୍ଷା ମନ୍ତ୍ରୀ ସମୀର ଦାସ ଦେଇଥିବା ପ୍ରତିକ୍ରିୟାକୁ ବିରୋଧ କରି ହାତରେ ହଳ ଲଙ୍ଗଳ ଧରି ବିରୋଧ ପ୍ରଦର୍ଶନ କରିଥିଲେ କନିଷ୍ଠ ଶିକ୍ଷକ ଆଶାୟୀ ସଂଘ । ଅଭିଯୋଗ ଅନୁସାରେ, ମନ୍ତ୍ରୀ କୁଆଡେ କହିଥିଲେ, ଯଦି ଚାକିରି ନମିଳୁଛି, ଚାଷ କରି ପରିବାର ପୋଷ । ଏହା ପ୍ରତିବାଦରେ ସରକାର ଜମି ଯୋଗାଇ ଦିଅନ୍ତୁ ବୋଲି ଦାବି ଧରି ରାସ୍ତାକୁ ଆସିଥିଲେ ସଂଘ ସଦସ୍ୟ । ସେପଟେ ବିଜୁଳି ଦର ବୃଦ୍ଧି ପ୍ରତିବାଦରେ ଏବଂ ଅନୁଦାନରୁ ବଞ୍ଚିତ ଶିକ୍ଷକ ସଂଘ ମଧ୍ୟ ଗାନ୍ଧି ମାର୍ଗରେ ବିକ୍ଷୋଭ ପ୍ରଦର୍ଶନ କରିଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ରାଜ୍ୟବାସୀଙ୍କ ଦୃଷ୍ଟି ଆକର୍ଷଣ କରିବା ସହ ସରକାରଙ୍କ ଉପରେ ଚାପ ପକାଇବାକୁ ପ୍ରତିବାଦର ପ୍ରମୁଖ ପେଣ୍ଠ ପାଲଟିଛି ଭୁବନେଶ୍ୱର ଲୋୟର ପିଏମଜି । ବିଧାନସଭାର ମୌସୁମୀ ଅଧିବେଶନ ଚାଲିଥିବାରୁ ସରକାର ବିରୋଧୀ ସ୍ୱରକୁ ଜୋରଦାର କରିଛି ରାଜ୍ୟ ବିଜେପି । ଆଜି ବିଦ୍ୟୁତ ଦର ବୃଦ୍ଧିକୁ ପ୍ରସଙ୍ଗ କରି ମାଷ୍ଟରକ୍ୟାଣ୍ଟିନ ଛକରୁ ଏକ ବିରାଟ ଶୋଭାଯାତ୍ରାରେ ବାହାରି ଭୁବନେଶ୍ୱର ଜିଲ୍ଲା ବିଜେପିର ଶତାଧିକ କର୍ମୀ ବିଧାନସଭା ଆଗରେ ପ୍ରତିବାଦ କରିଛନ୍ତି । ସେହିପରି ମାହାଙ୍ଗା ଡବଲ ମର୍ଡର ଘଟଣାରେ ଆଇନମନ୍ତ୍ରୀ ପ୍ରତାପ ଜେନାଙ୍କ ଇସ୍ତଫା ଦାବିକୁ ଦୋହରାଇଛି ଦଳ । ତେବେ ବ୍ୟାରିକେଡ ଭାଙ୍ଗିବାକୁ ଉଦ୍ୟମ କରିବାବେଳେ ଉଠାଇ ନେଇଛି ପୋଲିସ ।
ହାତରେ ହଳ ଲଙ୍ଗଳ ଧରି ପ୍ରତିବାଦକୁ ଓହ୍ଲାଇଛନ୍ତି କନିଷ୍ଠ ଶିକ୍ଷକ ଆଶାୟୀ ସଂଘର ସଦସ୍ୟ । ନିଯୁକ୍ତି ଦାବିରେ ୨୦ ଦିନ ହେଲା ଲୋୟର ପିଏମଜିରେ ଧରଣା ଦେବା ପରେ ଏଭଳି ଅଭିନବ ଉପାୟରେ ଆନ୍ଦୋଳନ କରିଛନ୍ତି । କାରଣ କନିଷ୍ଠ ଶିକ୍ଷକ ପଦବୀ ସୃଷ୍ଟି ନେଇ ଗଣଶିକ୍ଷା ମନ୍ତ୍ରୀଙ୍କୁ ଭେଟିବା ପରେ ମିଳିଥିଲା ଅଜବ ଉତ୍ତର । ଚାକିରି ନମିଳିଲେ ଚାଷବାସ କରନ୍ତୁ ବୋଲି ଅତି ଖାମଖିଆଲି ଢଙ୍ଗରେ କହିଥିଲେ ମନ୍ତ୍ରୀ ସମୀର ଦାସ । ତେଣୁ ହଳ ଲଙ୍ଗଳ ଧରି ପ୍ରତିବାଦକୁ ଓହ୍ଲାଇବା ସହ ଚାଷବାସ ପାଇଁ ମନ୍ତ୍ରୀ କ୍ଷେତ ଯୋଗାଇଦେବାକୁ ଦାବି କରିଛନ୍ତି ଏହି ଚାକିରୀ ଆଶାୟୀମାନେ ।
ବିଧାନସଭା ଚାଲୁଥିବାରୁ ପ୍ରତିବାଦର ପ୍ରମୁଖ ପେଣ୍ଠ ପାଲଟିଥିବା ଭୁବନେଶ୍ୱର ଲୋୟର ପିଏମଜିରେ ବି ଦେଖିବାକୁ ମିଳିଛି ପୂଜାପାଠ ଓ ହୋମଯଜ୍ଞ । ଶନିଦଶା କଟିବା ସହ ସରକାରଙ୍କ ଶୁଭଦୃଷ୍ଟି ପଡିବା ଆଶାରେ ଏଭଳି ଗ୍ରହଶାନ୍ତି ପୂଜା କରିଛନ୍ତି ୧୭୭ ହାଇସ୍କୁଲ ଶିକ୍ଷକ, ଶିକ୍ଷୟିତ୍ରୀ । ସରକାରୀ ଅନୁଦାନରୁ ବଞ୍ଚିତ ଏହି ଶିକ୍ଷକ ସଂଘ ସପ୍ତାହେ ହେଲା ବିଧାନସଭା ସମ୍ମୁଖରେ ଧାରଣା ଦେଇଥିଲେ ମଧ୍ୟ ସରକାରଙ୍କ ଦୃଷ୍ଟି ପଡୁନଥିବା ଅଭିଯୋଗ ହୋଇଛି ।
ବିଧାନସଭା ସହିତ ଆରମ୍ଭ ହୋଇଯାଏ ପ୍ରତିବାଦର ରୁତୁ । ଚଳଚଞ୍ଚଳ ହୋଇପଡେ ଭୁବନେଶ୍ୱର ଲୋୟର ପିଏମଜି ଅଞ୍ଚଳ । ଆଗକୁ ପଞ୍ଚାୟତ ଓ ପୌର ନିର୍ବାଚନ ଥିବାରୁ ବିରୋଧୀ ରାଜନୈତିକ ଦଳ ସମେତ ଅନ୍ୟାନ୍ୟ ସଂଗଠନ ମଧ୍ୟ ସକ୍ରିୟ ହୋଇପଡିଛନ୍ତି ।