ସ୍ମାର୍ଟ ସିଟି ଭୁବନେଶ୍ୱରରେ ମାତିଛନ୍ତି ଅପରାଧୀ । କମିସନରେଟ୍ ପୁଲିସଙ୍କୁ ଖୋଲା ଚ୍ୟାଲେଂଜ, ରାସ୍ତା ଉପରେ ଅସାମାଜିକଙ୍କ ଦୌରାତ୍ମା
କନକ ବ୍ୟୁରୋ : ସ୍ମାର୍ଟ ସିଟି ଭୁବନେଶ୍ୱରରେ ମାତିଛନ୍ତି ସ୍ମାର୍ଟ ଅପରାଧୀ । ଯାହା ସବୁ ଘଟଣା ଘଟୁଛି ସବୁ କିଛି ଯେମିତି ସିନେମାର ଷ୍ଟଂଟ ସିନ । ଆଉ ଏହି ସବୁ ଘଟଣା ଲୋକଙ୍କ ଛାତି ଥରାଇବା ସ୍ୱଭାବିକ । ଯାଗମରାରେ ରାସ୍ତା ଉପରେ ଭାଇଗିରିର ତାଣ୍ଡବ ଭିଡିଓ ଦେଖି ଅଂଚଳବାସୀ ରାତି ହେଲେ ଘରୁ ବାହାରିବାକୁ ଡରୁଛନ୍ତି । ଘଟଣା ପରେ ଉକ୍ତ ଖଟିକୁ ଭଙ୍ଗା ଯାଇଛି ସତ, ହେଲେ ରାଜରାସ୍ତାକୁ ହାଇଯାକ କରି, ମାଡ ମାରିବା ଘଟଣା ଲୋକଙ୍କ ମନରେ କୋକୁଆ ଭୟ ସୃଷ୍ଟି କରିଛି । ସେପଟେ କିଟ ଅଂଚଳର ଜଣେ ଡ୍ରାଇଭର ୨ କିଲୋମିଟର ପର୍ଯ୍ୟନ୍ତ ଗାଡି ଘୋଷାଡିନେବା ଦୃଶ୍ୟ ବି ଲୋକଙ୍କ ମନରୁ ଲିଭୁନି । ଆଉ ପଦାକୁ ବାହାରିବା କଥା ଛାଡନ୍ତୁ, ଘର ଭିତରେ ପଶି ଲୁଟେରା ତାଡିବା ଆରମ୍ଭ କରିଛନ୍ତି । ଏକୁଟିଆ ଘର ତ ଘର ଆପାର୍ଟମେଂଟରେ ସିରିଜ ଚୋରି ଲୋକଙ୍କ ନିଦ ହଜାଇ ଦେଇଛି ।
![](https://cdn-icons-png.flaticon.com/512/2504/2504957.png)
Kanak News is now on WhatsApp
Join and get latest news updates delivered to you via WhatsApp
ଅନ୍ୟପଟେ ଭୁବନେଶ୍ୱରେ ଗତ କିଛି ଦିନ ହେବ ବଢି ଚାଲିଥିବା ଅପରାଧକୁ ନେଇ ନିନ୍ଦା କରିଛନ୍ତି ପୁର୍ବତନ ସିଟି ଡିଏସପି । ଟ୍ରାଫିକ ସମସ୍ୟା ଠାରୁ ଆରମ୍ଭ କରି ସାଇବର ଅପରାଧ । ଆପାର୍ଟମେଂଟ ଲୁଟ ଠାରୁ ଆରମ୍ଭ କରି ରାସ୍ତାରେ ହଣାକଟା ଭଳି ଘଟଣା ସାମନାକୁ ଆସିବା ପରେ, ଆଇନ ଶୃଙ୍ଖଳା ବ୍ୟବସ୍ଥାକୁ ନେଇ ପ୍ରଶ୍ନ ଉଠିଛି ।
ରାଜଧାନୀ ରାସ୍ତାରେ ଅପରାଧୀଙ୍କ ହାଇଡ୍ରାମା ଦେଖିଲେ ଲାଗୁଛି ଯେମିତି କମିଶନରେଟ ପୁଲିସକୁ ଚ୍ୟାଲେଞ୍ଜ ଅପରାଧୀ ମାନେ ଦେଉଛନ୍ତି । ଏମାନଙ୍କୁ କଡା ଦଫା ଲଗାଇ ଜେଲ ପଠା ଯାଉଛି । କିନ୍ତୁ ଜେଲ ଫେରନ୍ତା ଅପରାଧୀମାନେ ପୁଣି ଆଇନକୁ ହାତକୁ ନେଉଛନ୍ତି । ଆଉ ଭାଇଗିରି ଆରମ୍ଭ କରି ଦେଉଛନ୍ତି । ତେବେ ଏହି ପେସାଦାର ଅପରାଧୀ ଓ ଅସାମାଜିକଙ୍କୁ ଖୁବଶୀଘ୍ର ତଡିପାର ପାଇଁ ପୁଲିସ ପ୍ରକ୍ରିୟା ଆରମ୍ଭ କରିଥିବା ଜଣା ପଡିଛି ।