ପରିବାର ଚିହ୍ନିଲେ ପୁଅର ମୃତଦେହ । ମୁକୁଳା ଡ୍ରେନରେ ଭାସିଯାଇ ପ୍ରାଣ ହରାଇଛନ୍ତି ଜ୍ୟୋତିପ୍ରକାଶ
କନକ ବ୍ୟୁରୋ : ଏମ୍ସରେ ଜ୍ୟୋତିପ୍ରକାଶଙ୍କ ମୃତଦେହ ଚିହ୍ନିଲେ ପରିବାର । ମୁକୁଳା ଡ୍ରେନରେ ଭାସିଯାଇ ପ୍ରାଣ ହରାଇଛନ୍ତି ଜ୍ୟୋତିପ୍ରକାଶ । ମୃତଦେହକୁ ଦେଖି ହସ୍ପିଟାଲରେ ସମ୍ପର୍କୀୟ ଅଚେତ ହୋଇପଡୁଛନ୍ତି । ଜ୍ୟୋତିପ୍ରକାଶଙ୍କ ମୃତଦେହକୁ ତାଙ୍କ ମାଉସୀ ଚିହ୍ନିଛନ୍ତି । ଡ୍ରେନ୍ ନିକଟ ବୁଦା ମୂଳରୁ ମୃତଦେହ ମିଳିଥିଲା । ମାଉସୀଙ୍କ କହିବାନୁସାରେ, ଡ୍ରେନରେ ସ୍ଲାବ ପଡିଥିଲେ ହୁଏତଃ ପିଲାଟିର ଜୀବନ ବଞ୍ଚି ଯାଇଥାନ୍ତା । ବେପରୁଆ କାମ ଯୋଗୁଁ ଆଜି ରାଜା ଆମ ଗ୍ରହଣରେ ନାହିଁ । ରାଜାଙ୍କ ମାଆ ଏ ଘଟଣାକୁ ଏବେ ବି ଗ୍ରହଣ କରିପାରୁନାହାନ୍ତି । ମିନିଟରେ ଚେତାଶୂନ୍ୟ ହୋଇପଡୁଛି । ପରିବାରରେ ଶକ୍ତ ଆଘାତ ଲାଗିଛି । ପରିବାର ଲୋକଙ୍କ ଗୋଟିଏ ଆଶା ଥିଲା ରାଜାଙ୍କୁ ସୁରକ୍ଷିତ ଉଦ୍ଧାର କରାଯାଇପାରିଥାନ୍ତା । କିନ୍ତୁ ସବୁ ଆଶା ମଉଳି ଯାଇଛି ।
Kanak News is now on WhatsApp
Join and get latest news updates delivered to you via WhatsApp
ସୂଚନାଯୋଗ୍ୟ,୧୯ ଘଣ୍ଟାର ଅପରେସନ ପରେ ପଞ୍ଚସଖା ନଗର ମୁଖ୍ୟ ଡ୍ରେନ୍ ନିକଟ ବୁଦା ଭିତରୁ ମୃତଦେହକୁ ଉଦ୍ଧାର କରାଯାଇଛି । କାଲିଠାରୁ ନିଖୋଜ ଥିଲେ ଦଶମ ଶ୍ରେଣୀର ଛାତ୍ର ଜ୍ୟୋତିପ୍ରକାଶ। ମୁକୁଳା ଡ୍ରେନରେ ଭାସିଯାଇ ସେ ନିଖୋଜ ଥିଲେ। ୩୪ ଜଣ ଅଗ୍ନିଶମ କର୍ମଚାରୀ ଉଦ୍ଧାର କାର୍ଯ୍ୟରେ ସାମିଲ ହୋଇଥିଲେ । ଛାତ୍ର ଜଣକ ଶିରିପୁର ଶତାବ୍ଦୀ ନଗର ବ୍ୟାଙ୍କ କଲୋନିର । ପ୍ରବଳ ବର୍ଷା ପରେ ଡ୍ରେନରେ ଚାଲିଥିବା ପାଣି ସୁଅରେ ପଡ଼ିଯିବାରୁ ଭାସି ଯାଇଥିଲେ ଛାତ୍ର ଜଣକ । ତେବେ ସ୍ଥାନୀୟ ଲୋକଙ୍କ କହିବା ମୁତାବକ ଛାତ୍ର ଜଣକ ଡ୍ରେନ ପାଖ ଦେଇ ଆସୁଥିବା ବେଳେ ତାଙ୍କ ଗୋଡ଼ ଖସିଯାଇଥିଲା । ଫଳରେ ସେ ଡ୍ରେନରେ ପଡ଼ି ଭାସିଯାଇଥିଲେ ।
ତେବେ ରବିବାର ଅପରାହ୍ଣ ପ୍ରାୟ ୨ଟା ବେଳେ ରାଜା ଘରୁ ବାହାରି ସଂସ୍କୃତ ଟ୍ୟୁସନ୍ ପାଇଁ ସୌଭାଗ୍ୟନଗର ଅଭିମୁଖେ ବାହାରିଥିଲେ। ବର୍ଷା ଛାଡ଼ି ସାରିଥିଲେ ବି ରାସ୍ତା ବୁଡ଼ି ଯାଇଥିବାରୁ ମା’ ଟ୍ୟୁସନ୍ ଯିବାକୁ ବାରଣ କରିଥିଲେ । କିନ୍ତୁ ଏକ ପ୍ରୋଜେକ୍ଟ କାମ ସାରି ସାଙ୍ଗେସାଙ୍ଗେ ଫେରି ଆସିବ କହି ରାଜା ସାଇକେଲ ଧରି ଘରୁ ବାହାରି ଯାଇଥିଲେ । ମାତ୍ର ବାଟରେ ଯେ ମୁକୁଳା ଡ୍ରେନ୍ ମୃତ୍ୟୁ ଫାଶ ହୋଇ ବସିଛି ବୋଲି କେହି ଜାଣିପାରିନଥିଲେ । ଏମିତିକି ଟ୍ୟୁସନ୍ ଯିବା ବାଟରେ ପଡ଼ୁଥିବା ନାଳରେ ବର୍ଷା ଜଳର ସୁଅ ପଡ଼ିଥିବା ବୋଲି ମା’ ରାଜାକୁ ସତର୍କ କରାଇଥିଲେ ।