ସ୍କୁଲବହିରେ ‘ଇଣ୍ଡିଆ’ ବଦଳରେ ଲେଖାଯିବ ‘ଭାରତ’ । ନାମ ପରିବର୍ତ୍ତନକୁ ନେଇ NCERT ର ସ୍ପଷ୍ଟୀକରଣ

କନକ ବ୍ୟୁରୋ: ସ୍କୁଲବହିରେ ‘ଇଣ୍ଡିଆ’ ବଦଳରେ ‘ଭାରତ’ ଲେଖାଯିବା ନେଇ କୌଣସି ନିଷ୍ପତି ହୋଇନି । କେନ୍ଦ୍ର ଶିକ୍ଷା ମନ୍ତ୍ରାଳୟକୁ ସ୍କୁଲ ବହିରେ ନାମକରଣ ପରିବର୍ତନକୁ ସୁପାରିସ କରିଛି ଏନସିଇଆରଟିର ୭ ଜଣିଆ କମିଟି । ଏହାପରେ ବିବାଦ ତେଜିବା ପରେ ସ୍ପଷ୍ଟୀକରଣ ରଖିଛନ୍ତି ଏନସିଇଆରଟି ଅଧ୍ୟକ୍ଷ ଦୀନେଶ ସକଲାନି ।

ଏନସିଇଆରଟି ଅଧ୍ୟକ୍ଷ ଦୀନେଶ ସକଲାନି କହିିଛନ୍ତି, ପିଲାଙ୍କୁ ଇଣ୍ଡିଆ ବଦଳରେ ଭାରତ ଲେଖିବା ଏବଂ ପ୍ରାଚୀନ ଇତିହାସ ବଦଳରେ ଶାସ୍ତ୍ରୀୟ ଇତିହାସ ପଢାଯିବାକୁ ନେଇ ସୁପାରିସ ହୋଇଛି କିନ୍ତୁ କୌଣସି ନିଷ୍ପତି ନିଆଯାଇନି । ଏନ୍ସିଇଆର୍ଟିର ୭ ଜଣିଆ କମିଟି ସୁପାରିସ କରିବା ପରେ ଉଭୟ ରାଜନୈତିକ ଏବଂ ବୁଦ୍ଧିଜୀବୀଙ୍କ ମଧ୍ୟରେ ବିତର୍କ ତେଜିଛି । ନିକଟରେ ଜି-୨୦ ନିମନ୍ତ୍ରଣ ପତ୍ରରେ ‘ପ୍ରେସିଡେଂଟ ଅଫ୍ ଇଣ୍ଡିଆ’ ପରିବର୍ତେ ‘ପ୍ରେସିଡେଂଟ ଅଫ୍ ଭାରତ’ ଲେଖିଥିଲେ କେନ୍ଦ୍ର ସରକାର । ସରକାରୀ ଭାବେ ପ୍ରଥମ ଥର ଏପରି ହୋଇଥିଲା ।

ସେହିପରି ଜି-୨୦ ବୈଠକରେ ପ୍ରଧାନମନ୍ତ୍ରୀଙ୍କ ନାମଫଳକରେ ମଧ୍ୟ ଭାରତ ଲେଖାଯାଇଥିଲା । ଏହିଠାରୁ ହିଁ ବିବାଦ ତେଜିଛି । ଏନସିଇଆରଟିର ପ୍ରସ୍ତାବ ପରେ ବିରୋଧୀ କଂଗ୍ରେସ କହିଛି, ତାଙ୍କ ପାଇଁ ଇଣ୍ଡିଆ ଓ ଭାରତ ସମାନ । କିନ୍ତୁ ଏବେର ସରକାର ଇତିହାସକୁ ନଷ୍ଟ କରିବାକୁ ପ୍ରଚେଷ୍ଟା ହେଉଛି । ବିରୋଧୀ ଇଣ୍ଡିଆ ମେଂଟକୁ ଦେଖି ପ୍ରଧାନମନ୍ତ୍ରୀ ଇଣ୍ଡିଆ ନାମରେ ପରିବର୍ତନ କରିବାକୁ ଚାହୁଁଛନ୍ତି ବୋଲି ବିରୋଧୀ କହିଛି । ବଡ କଥା ହେଉଛି ନାମ ପରିବର୍ତନ ପାଇଁ ସୁପାରିସ କରିଥିବା ଏନସିଇଆରଟିର ୭ ଜଣିଆ କମିଟିର ମୁଖ୍ୟ ସି. ଆଇ ଇସାକ ଆରଏସଏସ ସହ ଦୀର୍ଘ ବର୍ଷ ଧରି ଜଡିତ । କେନ୍ଦ୍ରର ଶାସକ ଦଳ ବିଜେପିର ବିଚାରଧାରାର ପ୍ରୟୋଗଶାଳା ହେଉଛି ଆରଏସଏସ ।