କରୋନାର ତୃତୀୟ ଲହର ପାଇଁ ପ୍ରସ୍ତୁତ ହେଉଛି ଅସ୍ତ୍ର । ୬-୧୨ ବର୍ଷର ପିଲାମାନଙ୍କ ଠାରେ କୋଭାକ୍ସିନର ଦ୍ୱିତୀୟ ଖୋରାକ ପରୀକ୍ଷଣ । ସେପ୍ଟେମ୍ବରରେ ବଜାରକୁ ଆସିବା ନେଇ ସମ୍ଭାବନା
କନକ ବ୍ୟୁରୋ : କରୋନା ସଂକ୍ରମଣର ତୃତୀୟ ଲହର ଆସୁଥିବା ନେଇ କେନ୍ଦ୍ର ସରକାର ଚେତାବନୀ ଦେଇ ସାରିଛନ୍ତି । ଏହାରି ଭିତରେ ଛୋଟ ପିଲାମାନଙ୍କ ଟିକା ଦେବା ନେଇ ପ୍ରସ୍ତୁତ ଜୋରଦାର କରିଛନ୍ତି ଟିକା ନିର୍ମାତା କମ୍ପାନୀ ମାନେ । ଏହି କ୍ରମରେ ଭାରତ ବାୟୋଟେକ ଜୁନ ମାସରୁ ଛୋଟ ପିଲାମାନଙ୍କୁ ଟିକା ଦେବା ନେଇ ପରୀକ୍ଷଣ ଆରମ୍ଭ କରିଛି । ଏହାରି ମଧ୍ୟରେ ସୂଚନା ମିଳିଛି କି, କୋଭାକ୍ସିନ ଟିକା ପରୀକ୍ଷଣରେ ସାମିଲ ହୋଇଥିବା ପିଲାମାନଙ୍କୁ କୋଭାକ୍ସିନର ଦ୍ୱିତୀୟ ଖୋରାକ ଦିଆଯିବା ନେଇ ପ୍ରସ୍ତୁତି ଆରମ୍ଭ ହୋଇଛି ।
Kanak News is now on WhatsApp
Join and get latest news updates delivered to you via WhatsApp
ସୂତ୍ର ମାଧ୍ୟମରୁ ମିଳିଥିବା ସୂଚନା ମୁତାବକ ଦିଲ୍ଲୀ ଏମ୍ସରେ ପରୀକ୍ଷଣରେ ସାମିଲ ହୋଇଥିବା ପିଲାମାନଙ୍କୁ କୋଭାକ୍ସିନର ଦ୍ୱିତୀୟ ଖୋରାକ ଦିଆଯାଇଛି । ଏହାସହ ଆଗାମୀ ସପ୍ତାହରେ ପରୀକ୍ଷଣରେ ସାମିଲ ଥିବା ୨-୬ ବର୍ଷର ପିଲାଙ୍କୁ ଦ୍ୱିତୀୟ ଖୋରାକ ଦିଆଯିବ । ଅନ୍ୟପଟେ ଚଳିତମାସ ଶେଷ ସୁଦ୍ଧା ଅନ୍ତରୀଣ ରିପୋର୍ଟ ଆସିପାରେ ବୋଲି ଆଶା କରାଯାଉଛି । କହିରଖୁ କି କରୋନାର ସାମ୍ଭାବ୍ୟ ତୃତୀୟ ଲହର ମଧ୍ୟରେ ମେ ୧୨ ତାରିଖରେ ଉପଦେଷ୍ଟା ବିଶେଷଜ୍ଞ କମିଟି ପିଲାମାନଙ୍କ ଉପରେ କୋଭାକ୍ସିନ ଟିକାକୁ ପରୀକ୍ଷଣ ନେଇ ସୁପାରିଶ କରିଥିଲା । ଏହାପରେ ଡିସିଜିଆଇ ଏହାକୁ ମଞ୍ଜୁରୀ ପ୍ରଦାନ କରିଥିଲା ।
ଏହି ପରୀକ୍ଷଣ ଦେଶର ମୋଟ ୫୨୫ ଜଣ ପିଲାଙ୍କ ଠାରେ କରାଯାଉଛି । ଏଥିରେ ପ୍ରତି ୧୭୫ ଜଣ ପିଲାଙ୍କୁ ନେଇ ଗୋଟିଏ ଲେଖାଏଁ ଗ୍ରୁପ କରାଯାଇଛି । ପ୍ରଥମ ଗ୍ରୁପରେ ୬-୧୨, ଦ୍ୱିତୀୟ ଗ୍ରୁପରେ ୧୨-୧୮ ଓ ତୃତୀୟ ଗ୍ରୁପରେ ୨-୬ ବର୍ଷର ପିଲାଙ୍କୁ ସାମିଲ କରାଯାଇଛି ।
ଏହି ପିଲାମାନଙ୍କୁ ୨୮ ଦିନ ଅନ୍ତରରେ ଟିକାର ଗୋଟିଏ ଗୋଟିଏ ମାତ୍ରା ଦିଆଯାଉଛି । ଫଳା ଫଳ ଆସିବା ପରେ ପିଲାମାନଙ୍କ ଉପରେ ଏହି ଟିକା ବ୍ୟବହାର ହେବା ନେଇ ଡିସିଜିଆଇ ମଞ୍ଜୁରୀ ପ୍ରଦାନ କରିବ । କିଛିଦିନ ପୂର୍ବରୁ ଦିଲ୍ଲୀ ଏମ୍ସର ନିର୍ଦ୍ଦେଶକ ରଣଦୀପ ଗୁଲେରିଆ କହିଥିଲେ କି ସେପ୍ଟେମ୍ବର ମାସ ସୁଦ୍ଧା ପିଲାମାନଙ୍କ ପାଇଁ କୋଭିଡ ଟିକା ଆଶିପାରେ ବୋଲି କହିଥିଲେ ।