ଲିଟରେ ପେଟ୍ରୋଲକୁ ଶହେ ଟଙ୍କା ! ନେଲେ ନିଅନ୍ତୁ ନନେଲେ ନାହିଁ… ଭାରତ ବନ୍ଦର ଭରା ଫାଇଦା ଉଠାଇଲେ, ଚଢା ଦରରେ ବିକି ମାଲାମାଲ ହେଲେ ବେପାରୀ
କନକ ବ୍ୟୁରୋ: “ପେଟ୍ରୋଲ ଲିଟର ଶହେ ଟଙ୍କା । ନେଲେ ନିଅନ୍ତୁ ନନେଲେ ନାହିଁ… ଶହେରୁ କିନ୍ତୁ ଟଙ୍କାଟେ ବି କମିବନି… ଆପଣ ନେଲେ ଖୁସି ନନେଲେ ବି ଖୁସି, ଶହେ ଟଙ୍କାରେ ନେବାକୁ ଅନେକ ଲୋକ ଅଛନ୍ତି…’’
Kanak News is now on WhatsApp
Join and get latest news updates delivered to you via WhatsApp
ଭାରତ ବନ୍ଦ ବେଳେ ରାଜଧାନୀରେ ମାତିଛନ୍ତି ତେଲ ବେପାରୀ । ପେଟ୍ରୋଲ ପମ୍ପ ବନ୍ଦ ଥିବାରୁ କିଛି ବେପାରୀ ରାସ୍ତା କଡରେ ଡିଜେଲ, ପେଟ୍ରୋଲ ଚଢା ଦରରେ ବିକୁଛନ୍ତି । ଆଉ ଦର ନେଇ ପ୍ରଦିବାଦ କଲେ ଏମିତି କିଛି କଥା କହୁଛନ୍ତି ।
ତେବେ ଗୋଟିଏ ପଟେ ଭାରତ ବନ୍ଦ ପାଇଁ ସାରା ଦେଶ ପ୍ରଭାବିତ ହୋଇଥିବା ବେଳେ ରାଜଧାନୀ ଭୁବନେଶ୍ୱରରେ ମଧ୍ୟ ଏହାର ପ୍ରଭାବ ଦେଖିବାକୁ ମିଳିଛି । ଟ୍ରେଡ ୟୁନିୟନ ଓ କଂଗ୍ରେସ ପକ୍ଷରୁ ବନ୍ଦ ପାଳନ କରାଯାଉଥିବାରୁ ଆଜି କୌଣସି ବି ଦୋକାନ ବଜାର କି ପେଟ୍ରୋଲ ପମ୍ପ ଖୋଲାଯାଇନି । ଯାହା ଫଳରେ କିଛି ଲୋକେ ଗାଡିରେ ତେଲ ପକାଇବାକୁ ହନ୍ତସନ୍ତ ହୋଇଛନ୍ତି । ଆଉ ଲୋକଙ୍କ ଏହି ହନ୍ତସନ୍ତର ଫାଇଦା ଉଠାଇଛନ୍ତି ଚୋରାରେ ଖୁଲମଖୁଲା ତେଲ ବିକୁଥିବା ବେପାରୀ ।
କେବଳ ରାଜଧାନୀ ରାସ୍ତା କଡରେ ନୁହେଁ ବରଂ କିଛି ଲୋକ ପେଟ୍ରୋଲ ପମ୍ପ ଆଗରେ ବୋତଲରେ ତେଲ ଭରି ବିକ୍ରି କରୁଛନ୍ତି । ଲିଟର ପିଛା ଶହେ କହୁଥିଲେ ବି ଉକ୍ତ ବୋତଲରେ ଥିବା ପେଟ୍ରୋଲ ଏକ ଲିଟର ଭଳି ଦେଖାଯାଉ ନାହିଁ । ସେ ଯାହା ବି ହେଉନା କାହିଁକି ବନ୍ଦର ମୋକା ନେଇ ରାଜଧାନୀରେ ମାତିଛନ୍ତି ତେଲ ବେପାରୀ ।
ଗାଡିରେ ତେଲ ଆବଶ୍ୟକତା ଥିବାରୁ କେଉଁଠି କେଉଁଠି ଲୋକେ ଦେଢ ଶହ ଟଙ୍କା ବି ଦେଇଛନ୍ତି । ତେବେ ଆଜି ଭାରତ ବନ୍ଦ ଥିବାରୁ ଗତକାଲି ପେଟ୍ରୋଲ ପମ୍ପରେ ଅସମ୍ଭାଳ ଭିଡ ପରିଲକ୍ଷିତ ହୋଇଥିଲା । ତେଣୁ କିଛି ଲୋକ ନିଜ ଗାଡିରେ ପେଟ୍ରୋଲ କିମ୍ବା ଡିଜେଲ ଭରି ନଥିଲେ । ମାତ୍ର ଆଜି ହଠାତ କିଛି ଗୁରୁତ୍ୱପୂର୍ଣ୍ଣ କାମରେ ଘରୁ ଗାଡି କାଢିବାକୁ ପଡିବାରୁ ବାଧ୍ୟ ହୋଇ ଚଢା ଦରରେ ତେଲ କିଣିବାକୁ ପଡୁଛି ବୋଲି ସମସ୍ୟା ଭୋଗୁଥିବା କିଛି ଲୋକ କହିଛନ୍ତି । ସେପଟେ ପାଟ୍ରୋଲିଂ କରୁଥିବା ପୋଲିସ ନଜରରେ ଚଢା ଦରରେ ବିକୁଥିବା ବେପାରୀମାନେ ପଡୁଛନ୍ତି କି ନାହିଁ ବୋଲି କ୍ଷୁବ୍ଧ ହୋଇ କିଛି ଲୋକେ କହିଛନ୍ତି । ତେବେ କେବଳ ଆଜି ନୁହେଁ
ସବୁ ବନ୍ଦ ପାଳନ ବେଳେ ପେଟ୍ରୋଲ ଡିଜେଲର ଚଢା ଦରରେ ବିକ୍ରି ନେଇ ଏମିତି କିଛି ଅଭିଯୋଗ ଆସେ ଆଉ ଲୋକ ବି ଚଢା ଦର ଦେଇ ଗାଡିରେ ତେଲ ପକାନ୍ତି ।