ଆସନ୍ତା କାଲି ଭାରତ ବନ୍ଦ । ଜାଣନ୍ତୁ କିଏ ଦେଇଛି ଏହି ଡାକରା ଓ କେଉଁଠି ପଡିବ ପ୍ରଭାବ

5,673

କନକ ବ୍ୟୁରୋ : କେନ୍ଦ୍ର ସରକାରଙ୍କ ନୀତିକୁ ବିରୋଧ କରି ଆସନ୍ତା କାଲି ଅର୍ଥାତ ମଇ ୨୫ ତାରିଖକୁ ବନ୍ଦ ଡାକରା ଦିଆଯାଇଛି । ଅଲ୍ ଇଣ୍ଡିଆ ବେକୱାର୍ଡ ଆଣ୍ଡ ମାଇନୋରିଟି ଏମ୍ପ୍ଲଇଜି ଫେଡେରେସନ (ବିଏଏମସିଇଏଫ) ତରଫରୁ ଏହି ଡାକରା ଦିଆଯାଇଛି । ଫେଡେରେସନ ପକ୍ଷରୁ ଜାତିଗତ ଜନଗଣନାକୁ ସମର୍ଥନ କରି ଏହି ଡାକରା ଦିଆଯାଇଛି । ଏହି ବନ୍ଦ ଡାକରାକୁ ଏକମାତ୍ର ରାଜନୈତିକ ଦଳ ବହୁଜନ ମୁକ୍ତି ପାର୍ଟି ସମର୍ଥନ ଦେଇଛି ।

ଏନେଇ ବହୁଜନ ମୁକ୍ତି ପାର୍ଟିର ନେତା ନୀରଜ ଧିମାନ କହିଛନ୍ତି କି କେବଳ ଜାତିଗତ ଜନଗଣାନା ନୁହେଁ, ଏହାସହ ନିର୍ବାଚନରେ ଇଭିଏମ ବ୍ୟବହାରକୁ ବିରୋଧ, ଘରୋଇ କ୍ଷେତ୍ରରେ ପଛୁଆ ଓ ଦଳିତ ବର୍ଗ ପାଇଁ ସଂରକ୍ଷଣ ଲାଗୁ ଭଳି ଦାବି ମଧ୍ୟ ରହିଛି । ଏହି ଆନ୍ଦୋଳନକୁ ବିଏଏମସିଇଏଫ ଓ ବହୁଜନ ମୁକ୍ତି ପାର୍ଟି ସହଯୋଗ କରୁଥିବା ବେଳେ ବହୁଜନ କ୍ରାନ୍ତି ମୋର୍ଚ୍ଚା ବି ଏହି ବନ୍ଦ ଡାକରାକୁ ସମର୍ଥନ ଦେଇଛି ।

କୁହାଯାଉଛି କି ଏହି ଭାରତ ବନ୍ଦର ପ୍ରଭାବ ଦୋକାନ ଓ ପରିବହନ ଉପରେ ପଡିପାରେ । ଏହାଦ୍ୱାରା ସାଧାରଣ ଲୋକ କିଣା କିଣି ଓ ଯାତାୟତ ଉପରେ ବି ପ୍ରଭାବ ପଡିପାରେ । ସେପଟେ ଭାରତ ବନ୍ଦ ଡାକରା ଦେଇଥିବା ସଂଗଠନମାନଙ୍କ ତରଫରୁ ସୋସିଆଲ ମିଡିଆରେ ଦୋକାନୀ ଓ ପରିବହନ ସେବାକୁ ଆସନ୍ତା କାଲି ବନ୍ଦ ରଖିବାକୁ ଅନୁରୋଧ କରାଯାଇଛି ।