ଭଣ୍ଡାରିପୋଖରୀର ଭବିଷ୍ୟତ କିଏ? ହ୍ୟାଟ୍ରିକ ବିଜୟ ଲକ୍ଷ୍ୟରେ ବିଜେଡି, ଖାତା ଖୋଲିବା ଲକ୍ଷ୍ୟରେ ବିଜେପି । କଂଗ୍ରେସ ଖେଳିପାରେ ବଡ ଚାଲ
କନକ ବ୍ୟୁରୋ : ଭଣ୍ଡାରିପୋଖରୀର ଭବିଷ୍ୟତ କିଏ । କାହା ଭାରକୁ ଯିବ ଭଣ୍ଡାରିପୋଖରୀ । ଭଦ୍ରକ ଜିଲ୍ଲାର ଏକ ହାଇଭୋଲଟେଜ ଆସନ ମଧ୍ୟରେ ଭଣ୍ଡାରିପୋଖରୀ ଜଣାଶୁଣା । କାରଣ ଏଠାରେ ଏବେ ବିଜେଡି ଦଳର ପ୍ରତିନିଧିତ୍ବ କରୁଛନ୍ତି ବିଧାୟକ ତଥା ମହିଳା ଓ ଶିଶୁ ବିକାଶ ମନ୍ତ୍ରୀ ପ୍ରଫୁଲ୍ଲ ସାମଲ। ପ୍ରଫୁଲ୍ଲ ବାବୁ ଏଇ ନିର୍ବାଚନ ମଣ୍ଡଳୀରୁ ୨୦୦୯ ଓ ୨୦୧୪ ସାଧାରଣ ନିର୍ବାଚନରେ ଦୁଇ ଦୁଇ ଥର ବିଧାୟକ ହୋଇଛନ୍ତି । ଆଗାମୀ ୨୦୧୯ ସାଧାରଣ ନିର୍ବାଚନରେ ପ୍ରଫୁଲ୍ଲ ପୁଣି ଭଣ୍ଡାରିପୋଖରୀରୁ ପ୍ରାର୍ଥୀ ହେବା ନେଇ ଚର୍ଚ୍ଚା ହେଉଥିବା ବେଳେ ବିଜେଡି ଦଳରୁ ଏଇ ଆସନରୁ ଯୁବନେତା ଉଦୟ ନନ୍ଦ, ପୂର୍ବତନ ଜିଲ୍ଲା ପରିଷଦ ଅଧ୍ୟକ୍ଷ ଜଗନ୍ନାଥ ସ୍ବାଇଁ, ଧାମନଗର ବ୍ଲକ ଅଧ୍ୟକ୍ଷ ଅଶୋକ ନାୟକଙ୍କ ନାଁ ବି ରହିଛି ଚର୍ଚ୍ଚାରେ। ବିଜେଡି ସୁପ୍ରିମୋ ଭଣ୍ଡାରିପୋଖରୀ ବିଧାନସଭା କ୍ଷେତ୍ର ପାଇଁ ଏଇ ଚାରି ନେତାଙ୍କ ମଧ୍ୟରୁ ଏଥର କାହାକୁ ଦଳୀୟ ପ୍ରାର୍ଥୀ କରୁଛନ୍ତି ତାହାକୁ କର୍ମୀ ଅପେକ୍ଷା କରୁଛନ୍ତି।
Kanak News is now on WhatsApp
Join and get latest news updates delivered to you via WhatsApp
କଂଗ୍ରେସ ଦଳ ମଧ୍ୟ ଏହି ଆସନକୁ ନେଇ ବେଶ ଆଶାବାଦୀ ଓ ଉତ୍ସାହିତ। ୨୦୧୪ ନିର୍ବାଚନରେ କଂଗ୍ରେସର ସୁବ୍ରତ ଦାସ ଏଠାରୁ ଦଳୀୟ ପ୍ରାର୍ଥୀ ହୋଇଥିଲେ। ହେଲେ ଏଥର ଭଣ୍ଡାରିପୋଖରୀ ଆସନରୁ ପିସିସି ସଭାପତି ନିରଂଜନ ପଟ୍ଟନାୟକ କାଳେ ପ୍ରାର୍ଥୀ ହେବେ ବୋଲି କର୍ମୀ ମହଲରେ ବେଶ୍ କିଛିଦିନ ହେଲା ଚର୍ଚ୍ଚା ଚାଲିଛି। ନିରଂଜନ ଭଣ୍ଡାରିପୋଖରୀ ନିର୍ବାଚନମଣ୍ଡଳୀକୁ ବିଭିନ୍ନ କାର୍ଯ୍ୟକ୍ରମରେ ଆସୁଥିବା ଯୋଗୁଁ କର୍ମୀଙ୍କ ଏହି ଚର୍ଚ୍ଚାକୁ ଆଧାର ମିଳୁଛି। ତେବେ ନିରଂଜନ ଏଠାରୁ ପ୍ରାର୍ଥୀ ହେବେ କି ନାହିଁ ସେ ବିଷୟରେ ସ୍ପଷ୍ଟ ମତ ରଖି ନାହାନ୍ତି।
ଅନ୍ୟମାନଙ୍କ ମଧ୍ୟରେ ସୁବ୍ରତ ଦାସ, କଂଗ୍ରେସ ସଂପାଦିକା ସୁଜାତା ଜେନା, ଦଳର ରାଜ୍ୟ ମୁଖପାତ୍ର ସତ୍ୟ ପ୍ରକାଶ ନାୟକଙ୍କ ନାଁକୁ ନେଇ ବି ଆଲୋଚନା ହେଉଛି। ଯଦି ଶ୍ରୀ ପଟ୍ଟନାୟକ ପ୍ରାର୍ଥୀ ନ ହୁଅନ୍ତି, ତେବେ ଦଳ ସତ୍ୟପ୍ରକାଶଙ୍କୁ ପ୍ରାର୍ଥୀ କରିବାର ସମ୍ଭାବନା ରହିଛି। ବଡ କଥା ହେଉଛି ଦଳର ଆଶାୟୀ ପ୍ରାର୍ଥୀ ସୁବ୍ରତ ଦାସ ମଧ୍ୟ ନିଜେ ମୁହଁ ଖୋଲି କହିଲେଣି, ଯଦି ଭଣ୍ଡାରିପୋଖରୀରୁ ନିରଂଜନ ବାବୁ ଦଳୀୟ ପ୍ରାର୍ଥୀ ହୁଅନ୍ତି , ତେବେ ତାଙ୍କ ପ୍ରତି ଆମର ପୂର୍ଣ୍ଣ ସମର୍ଥନ ରହିବ। ତେବେ କିଏ ପ୍ରାର୍ଥୀ ହେବ ସେ ନେଇ କର୍ମୀଙ୍କ ମହଲରେ ଉତ୍କଣ୍ଠା ପ୍ରକାଶ ପାଇଛି।
ନିର୍ବାଚନମଣ୍ଡଳୀର ତୃତୀୟ ରାଜନୈତିକ ଶକ୍ତି ଭାବେ ଉଭା ହୋଇଛି ବିଜେପି।ତେବେ ଏଠାରେ ଖାତା ଖୋଲିପାରିନଥିବା ବିଜେପି ଚଳିତଥର ପଦ୍ମ ଫୁଟାଇବାକୁ ଲକ୍ଷ୍ୟ ରଖିଛି । କଂଗ୍ରେସ କ୍ୟାମ୍ପ ଛାଡି ୨୦୧୪ରେ ଏଠାରୁ ବିଜେପିର ଜିଲ୍ଲା ସଭାପତି ବଦ୍ରୀ ନାରାୟଣ ଧଳ ପ୍ରାର୍ଥୀ ହୋଇଥିଲେ। ଏଥର ମଧ୍ୟ ବଦ୍ରି ଏଇ ଆସନରୁ ନିର୍ବାଚନ ଲଢିବା ପାଇଁ ସଂଗଠନ ଚଳାଇ ଆସୁଛନ୍ତି। କିନ୍ତୁ ଦଳର ନେତା ପଞ୍ଚାନନ ରାଉତଙ୍କ ନାମକୁ ନେଇ ବି ଚର୍ଚ୍ଚା ଆରମ୍ଭ ହୋଇଛି। ପଞ୍ଚାନନ ଆରଏସଏସ ସଂଗଠନର ଜଣେ ପ୍ରମୁଖ ପ୍ରଚାରକ। ବିଜେପିର ଏଇ ଦୁଇନେତା ବଦ୍ରୀ ଓ ପଞ୍ଚାନନଙ୍କ ମଧ୍ୟରୁ କାହାକୁ ଦଳୀୟ ଟିକଟ ମିଳିବ ତାହା ସ୍ପଷ୍ଟ ହୋଇ ନାହିଁ।
ଏସବୁ ଭିତରେ ବିଜେଡି ଗଠନ ପରଠାରୁ ଦଳ ଏଠାରେ ତିନି ଥର ବିଜୟ ହାସଲ କରିଥିବା ବେଳେ ୨୦୦୪ରେ ଏଠାରୁ କଂଗ୍ରେସ ପ୍ରାର୍ଥୀ ଅନନ୍ତ ସେଠୀ ବାଜିମାତ୍ କରିଥିଲେ । ତେବେ ଗତ ଦୁଇଟି ନିର୍ବାଚନରେ ବିଜେଡି ବଡ ବ୍ୟବଧାନରେ ବିଜୟୀ ହୋଇଥିବାରୁ ଚଳିତ ଥର ମଧ୍ୟ ଏହି ଧାରା ବଜାୟ ରଖିବାକୁ ଆଶା ରଖିଛି । ଏପରିକି ପ୍ରଫୁଲ ମଧ୍ୟ ଏଠାରୁ ହ୍ୟାଟ୍ରିକ ବିଜୟ ହାସଲ କରିବାକୁ ଜୋରଦାର ଉଦ୍ୟମ କରୁଛନ୍ତି । ତେବେ ପ୍ରକୃତରେ ଭୋଟର ବାଛିବେ ଭଣ୍ଡାରିପୋଖରୀର ଭବିଷ୍ୟତ କିଏ ।