ମମତାଙ୍କ ପରେ ଇଣ୍ଡିଆ ମେଣ୍ଟକୁ ଝଟକା ଦେବାକୁ ଆପ୍ ପ୍ରସ୍ତୁତ । ପଞ୍ଜାବରେ ଏକାକୀ ଲଢିବା ନେଇ ସଂକେତ ଦେଲେ ଭଗୱନ୍ତ ମାନ୍ ।
କନକ ବ୍ୟୁରୋ : ଇଣ୍ଡିଆ ମେଣ୍ଟକୁ ମମତା ବାନାର୍ଜୀ ଝଟକା ଦେବା ପରେ ଏବେ ପଞ୍ଜାବରେ ମଧ୍ୟ ସମାନ ସ୍ଥିତି ଦେଖିବାକୁ ମିଳିପାରେ । ପଶ୍ଚିମବଙ୍ଗରେ ମମତା ବାର୍ନାଜୀ ଏକାକୀ ଲଢିବା ନେଇ ଘୋଷଣା କରିବା ପଞ୍ଜାବରେ ମଧ୍ୟ ଆପ୍ ଏକାକୀ ଲଢିବା ନେଇ ସଂକେତ ଦେଇଛନ୍ତି ପଞ୍ଜାବ ମୁଖ୍ୟମନ୍ତ୍ରୀ ଭଗୱନ୍ତ ମାନ୍ । ଭଗୱନ୍ତ କହିଛନ୍ତି, ପଞ୍ଜାବରେ ଆପ୍ ଦଳ ୧୩ଟି ଆସନରେ ନିର୍ବାଚନ ଜିତିବ ।
Kanak News is now on WhatsApp
Join and get latest news updates delivered to you via WhatsApp
ମିଳିଥିବା ସୂଚନା ମୁତାବକ, ପଞ୍ଜାବରେ ଆପ୍ ଏକାକୀ ନିର୍ବାଚନ ଲଢିବା ପ୍ରସ୍ତାବକୁ ଆପ୍ ମୁଖ୍ୟ ତଥା ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିୱାଲ ସବୁଜ ସଂକେତ ଦେଇଛନ୍ତି । ସିଟ୍ ଭାଗବଣ୍ଟାକୁ ନେଇ କଂଗ୍ରେସର ଯେଉଁ ଆଭିମୁଖ୍ୟ ରହିଛି ତାହାକୁ ଦାୟୀ କରିପାରେ ଆପ୍ । ଖୁବଶୀଘ୍ର ପଞ୍ଜାବରେ ଏକାକୀ ଲଢିବା ନେଇ ଘୋଷଣା କରିପାରେ ଆପ୍ ।
ଏହାପୂର୍ବରୁ ପଶ୍ଚିମବଙ୍ଗର ମୁଖ୍ୟମନ୍ତ୍ରୀ ମମତା ବାନାର୍ଜୀ ଏକାକୀ ଲଢିବା ନେଇ ଘୋଷଣା କରିଥିଲେ । ମମତା କହିଛନ୍ତି, ମୁଁ ଯାହା ବି ପରାମର୍ଶ ଓ ପ୍ରସ୍ତାବ ଦେଇଥିଲି ତାହାକୁ ଗ୍ରହଣ କରାଯାଇନାହିଁ । ଯେଉଁଥିପାଇଁ ପଶ୍ଚିମବଙ୍ଗରେ ଆମେ ଏକାକୀ ଲଢିବାକୁ ନିଷ୍ପତ୍ତି ନେଇଥିବା କହିଛନ୍ତି ମମତା । ଆଗକୁ ପଶ୍ଚିମବଙ୍ଗ ଦେଇ ଯାତ୍ରା ଯିବ, କିନ୍ତୁ ଏବାବଦରେ ଆମ ଦଳକୁ ସୌଜନ୍ୟତା ଦୃଷ୍ଟିରୁ ମଧ୍ୟ ଜଣାଗଲା ନାହିଁ । ଏହାପୂର୍ବରୁ ପଶ୍ଚିମବଙ୍ଗରେ କଂଗ୍ରେସକୁ ମାତ୍ର ୨ଟି ସିଟ୍ ଦେବାକୁ କହିଥିଲେ ମମତା । ଗତ ନିର୍ବାଚନରେ କଂଗ୍ରେସ ଯେଉଁ ୨ଟି ଆସନରେ ବିଜୟୀ ହୋଇଥିଲା ସେହି ୨ ଆସନକୁ ବାଦ୍ ଦେଲେ ଅନ୍ୟ ଆସନରେ ଟିଏମସି ଲଢିବ ବୋଲି ସ୍ପଷ୍ଟ କରିଥିଲେ ମମତା । ଯାହାକୁ ନେଇ କଂଗ୍ରେସ ଓ ଟିଏମସି ମତାନ୍ତର ଦେଖିବାକୁ ମିଳିଥିଲା ।