ବିଏମସି –ଟାଟା ପାୱାରର ଗଣ୍ଡଗୋଳ । ଟାଟା ଚିଠି ଲେଖି ଟଙ୍କା ମାଗିଲା, ବ୍ରହ୍ମପୁର ମହାନଗର ନିଗମ ବକେୟା ୨୭ କୋଟି ମାଗିଲା
କନକ ବ୍ୟୁରୋ: ନୂଆ ମୋଡରେ ବିଏମସି–ଟାଟା ପାୱାର ଗଣ୍ଡଗୋଳ । ପୂର୍ବରୁ ବକେୟା ବିଲ ପୈଠ ପାଇଁ ଧମକ ଦେଉଥିଲା ବିଜୁଳି ବିତରଣ କମ୍ପାନୀ । ଏବେ ବ୍ରହ୍ମପୁର ମହାନଗର ନିଗମ ଟାଟା ପାୱାରକୁ ବକେୟା ବାବଦରେ ୨୭କୋଟି ଟଙ୍କା ମାଗିଛି । ଗତ କିଛି ଦିନ ପୂର୍ବରୁ ବିଦ୍ୟୁତ ବିଲ୍ ୭କୋଟି ଟଙ୍କା ପୈଠ ନକଲେ ମହାନଗର ନିଗମର ବିଦ୍ୟୁତ କାଟ କରିବ ବୋଲି ଟାଟା ପାୱାର ଏକ ଧମକପୂର୍ଣ୍ଣ ଚିଠି ଲେଖିଥିଲା । ଯାହାଦ୍ୱାରା ସହର ଅନ୍ଧାର ହୋଇଥାନ୍ତା ।
Kanak News is now on WhatsApp
Join and get latest news updates delivered to you via WhatsApp
୧୬କୋଟି ଟଙ୍କା ବକେୟା ଥିବା ବେଳେ ୱାନ ଟାଇମ ସେଟେଲମେଣ୍ଟରେ ୭କୋଟି ୬୫ଲକ୍ଷ ଟଙ୍କା ଦେବା ପାଇଁ କଥା ହୋଇଥିଲା । କିନ୍ତୁ ଏହା ପୂର୍ବରୁ ଟାଟା ପାୱାର ଉପରେ ୨୭ କୋଟି ଟଙ୍କା ବାକିଥିବା ମହାନଗର ନିଗମ ଏକ ଚିଠି ଲେଖିଛି । ବ୍ରହ୍ମପୁର ମହାନଗର ନିଗମରେ ଟାଟା ପାୱାରର ୧୩ ହଜାର ବିଦ୍ୟୁତ ଖୁଣ୍ଟ ରହିଥିବା ବେଳେ, ଏହାର ଭଡା ଗୋଟିଏ ଖୁଣ୍ଟ ପ୍ରତି ୨ଶହ ଟଙ୍କା ରହିଛି । ସେହିଭଳି ୨୨୦ଟି ଟ୍ରାନ୍ସଫର୍ମର ମଧ୍ୟ ରହିଛି ଏହାର ଭଡ଼ା ମଧ୍ୟ ଗୋଟିଏ ଟ୍ରାନ୍ସଫର୍ମର ପ୍ରତି ମାସିକ ୧୦ ହଜାର ଟଙ୍କା ଟାଟା ପାୱାର ମହାନଗର ନିଗମକୁ ଦେବା କଥା । କାରଣ ମହାନଗର ନିଗମର ଜାଗାରେ ଏହିସବୁ ରହିଛି । କିନ୍ତୁ ୨୦୧୪ ମସିହା ଠାରୁ ଆଜି ପର୍ଯ୍ୟନ୍ତ କିଛି ଟଙ୍କା ପୈଠ କରି ନାହିଁ ଟାଟା ପାୱାର । ଫଳରେ ଏପର୍ଯ୍ୟନ୍ତ ବାକି ରହିଛି ପ୍ରାୟ ୨୭ କୋଟି ଟଙ୍କା ।
ଏନେଇ ବିଏମସି ମଧ୍ୟ ୨୦୨୦ ମସିହା ଫେବୃଆରୀ ମାସରେ ଏକ ଚିଠି ଦେଇଥିଲା କିନ୍ତୁ ଏବେ ବି କିଛି ଟଙ୍କା ପୈଠ କରି ନାହିଁ ଟାଟା । ଏହି ୨ ବିଭାଗରେ କାଗଜ କଲମରେ ଟଙ୍କା ନେଣ ଦେଣ ପକ୍ରିୟା ଚାଲିଥିବା ବେଳେ ଏବେ ସାଧାରଣ ଲୋକ ଚିନ୍ତାରେ । କାରଣ ସାଧାରଣ ଲୋକ ବିଦ୍ୟୁତ୍ ବିଭାଗକୁ ବିଦ୍ୟୁତ ସେବା ପାଇଁ ବିଲ ପୈଠ କରୂୁଥିବା ବେଳେ ମହାନଗର ନିଗମକୁ ମଧ୍ୟ ଟିକସ ପଇଠ କରୁଛନ୍ତି ।