ଉତ୍ତର ଭାରତ ପରେ ଏବେ ଦକ୍ଷିଣ ଭାରତରେ କରୋନା ସ୍ଥିତି ସାଂଘାତିକ । ୪ ରାଜ୍ୟରୁ ୨୪ ଘଂଟାରେ ୧.୩୭ ଲକ୍ଷ ସଂକ୍ରମିତ ଚିହ୍ନଟ
କନକ ବ୍ୟୁରୋ : ଦେଶରେ କରୋନାର ଦ୍ୱିତୀୟ ଲହରି ଚାଲିଥିବା ବେଳେ ତୃତୀୟ ଲହରି ନେଇ ଚେତାବନୀ ଦେଇସାରିଲେଣି କେନ୍ଦ୍ର ସରକାର । ସରକାରଙ୍କ ପ୍ରିନ୍ସପାଲ ସାଇଣ୍ଟିଫିକ ଉପଦେଷ୍ଟା ବିଜୟ ରାଘବନଙ୍କ କହିବା ମୁତାବକ କରୋନାର ତୃତୀୟ ଲହର ନିଶ୍ଚିନ୍ତ ଓ ଶୀଘ୍ର ଆସିବ । ଏହାରି ଭିତରେ ଦକ୍ଷିଣ ଭାରତରେ ପୁଣିଥରେ କରୋନା ସଂକ୍ରମଣ ଦ୍ରୁତ ଗତିରେ ବଢିଚାଲିଛି । ଗତ ୨୪ ଘଂଟା ମଧ୍ୟରେ ଦକ୍ଷୀଣ ଭାରତର କେବଳ ୪ ଟି ରାଜ୍ୟରେ ୧.୩୭,୫୭୯ ଜଣ ନୂଆ ସଂକ୍ରମିତ ଚିହ୍ନଟ ହୋଇଛନ୍ତି । ଏହାସହ ୫୬୫ ଜଣ ଲୋକଙ୍କର ଜୀବନ ଯାଇଛି ।
Kanak News is now on WhatsApp
Join and get latest news updates delivered to you via WhatsApp
ଏହାରି ମଧ୍ୟରୁ କେବଳ କର୍ଣ୍ଣାଟକରେ ଗୋଟିଏ ଦିନରେ ୫୦ ହଜାରରୁ ଉର୍ଦ୍ଧ ସଂକ୍ରମିତ ଚିହ୍ନଟ ହୋଇଛନ୍ତି । ଦିଲ୍ଲୀ ଭଳି ବେଙ୍ଗାଲୁରରେ ବି କରୋନାର ବିସ୍ଫୋଟକ ସ୍ଥିତି ଦେଖିବାକୁ ମିିଳିଛି । ଗତ ୨୪ ଘଂଟାରେ କେବଳ ବେଙ୍ଗାଲୁର ସହରରେ ୨୩ ହଜାର ସଂକ୍ରମିତ ଚିହ୍ନଟ ହୋଇଛନ୍ତି । ଗୋଟିଏ ଦିନରେ ଏତେମାତ୍ରାରେ ସଂକ୍ରମିତ ଚିହ୍ନଟ ହୋଇଥିବା ସହର ମଧ୍ୟରେ ବେଙ୍ଗାଲୁର ପ୍ରଥମ ସ୍ଥାନରେ ପହଂଚିଯାଇଛି । ଏହାସହ କର୍ଣ୍ଣାଟକ ହୁବଲୀ ଠାରେ ଏକ ମେଡିକାଲରେ ଅକ୍ସିଜେନ ଅଭାବରୁ ୫ ଜଣ ସଂକ୍ରମିତଙ୍କର ମୃତ୍ୟୁ ହୋଇଛି ।
ସେହିଭଳି ଯଦି ଦିଲ୍ଲୀ କଥା କୁହାଯିବ ତେବେ କିଛିଦିନ ହେବ ସେଠାରେ ଦୈନିକ ସଂକ୍ରମଣ ୨୦ ହଜାର ଭିତରେ ରହୁଛି । ହେଲେ ସବୁଠାରୁ ବଡକଥା କରୋନା ସଂକ୍ରମଣ ଠାରୁ ମେଡିକାଲରେ ବେଡ, ମେଡିସିନ ଓ ଅକ୍ସିଜେନର ଅଭାବ ଏବେ ଲୋକଙ୍କ ମନରେ ଭୟ ସୃଷ୍ଟି କରୁଛି ।