ମା’ ହୋଟେଲରେ ଗ୍ରାହକଙ୍କୁ ମାଡ଼ । ସାମାନ୍ୟ ୫ ଟଙ୍କା ପାଇଁ ପ୍ରବଳ ପିଟିଲେ ମାଲିକ ବାପ-ପୁଅ । ଭିଡ଼ିଓ ଭାଇରାଲ….
କନକ ବ୍ୟୁରୋ: ୫ ଟଙ୍କା ପାଇଁ ମାଡ଼ । ୫ ଟଙ୍କା ପାଇଁ ଜଣେ ଗ୍ରାହକଙ୍କୁ ବିଚ୍ ରାସ୍ତାରେ ଅମାନୁଷିକ ଭାବେ ହୋଟେଲ ମାଲିକ ଓ ତାଙ୍କ ପୁଅ ମାଡ ମାରିବାର ଭିଡ଼ିଓ ଭାଇରାଲ ହେଉଛି । ଗ୍ରାହକ ଜଣଙ୍କ ଗୋଡ଼ ହାତ ଧରି ନେହୁରା ହେଲେ ମଧ୍ୟ ନିଷ୍ଠୁର ବାପା ଓ ପୁଅ ତାଙ୍କ କଥା ଶୁଣିନଥିଲେ । ଏଭଳି ଅଭାବନୀୟ ଘଟଣା ଦେଖିବାକୁ ମିଳିଛି କେନ୍ଦୁଝର ଘଷିପୁରା ଥାନା ଘଷିପୁରା ଲକ୍ଷ୍ମୀ ବଜାରରେ ।
Kanak News is now on WhatsApp
Join and get latest news updates delivered to you via WhatsApp
ସୂଚନା ମୁତାବକ, ଘଷିପୁରା ଲକ୍ଷ୍ମୀ ବଜାରରେ ଥିବା ମା’ ହୋଟେଲକୁ ଜିତେନ୍ଦ୍ର ଦେହୁରୀ ନାମକ ଜଣେ ବ୍ୟକ୍ତି ଖାଇବାକୁ ଯାଇଥିଲେ । ସେଠାରେ ସେ ଭାତ, ଡ଼ାଲି, ତରକାରୀ ଓ ଖଟା ଖାଇଥିଲେ । ମାଲିକ ତାଙ୍କୁ ୪୫ ଟଙ୍କା ଦେବା ପାଇଁ କହିଥିଲେ । ଜିତେନ୍ଦ୍ରଙ୍କ ପାଖରେ ଥିବା ୪୦ ଟଙ୍କା ହୋଟେଲ ମାଲିକଙ୍କୁ ଦେଇଥିଲେ । ବାକି ୫ ଟଙ୍କା ସଂଧ୍ୟାରେ ଦେବାକୁ କହିଥିଲେ । ଏହି ଘଟଣାକୁ ନେଇ ଉଭୟଙ୍କ ମଧ୍ୟରେ ବଚସା ହୋଇଥିଲା । ହେଟେଲ ମାଲିକ ରାଗିଯାଇ ବିଚ୍ ରାସ୍ତାରେ ତାଙ୍କୁ ନିର୍ଧୁମ୍ ପିଟିଥିଲେ । ଯାହାର ଭିଡ଼ିଓ ଏବେ ଭାଇରାଲ ହୋଇଛି । ଏନେଇ ଜିତେନ୍ଦ୍ର ଘଷିପୁର ଥାନାରେ ଅଭିଯୋଗ କରିଛନ୍ତି ।
ତେବେ କୁହାଯାଏ ଗ୍ରାହକ ହେଉଛନ୍ତି ଇଶ୍ୱର । ସେଥିପାଇଁ ଦୋକାନୀମାନେ ଗ୍ରାହକଙ୍କୁ ସବୁବେଳେ ସମ୍ମାନ ଦେବାର ନଜିର ରହିଛି । ହେଲେ ଘଷିପୁରାର ମା’ ଲକ୍ଷ୍ମୀ ହୋଟେଲର ମାଲିକ ବାପ-ପୁଅ ଜଣେ ଗ୍ରାହକଙ୍କ ଉପରେ ଏମିତି ଅତ୍ୟାଚାର ତା’ପୁଣି କେବଳ ୫ ଟଙ୍କା ପାଇଁ ନିହାତି ଏ ମଣିଷଣିଆ ଉପରେ ଏକ ପ୍ରଶ୍ନର ପାହାଡ଼ ଛିଡ଼ା କରିଛି । ସତରେ କ’ଣ ଆମେ ଏତେ ତଳକୁ ଖସିଗଲେଣି? କ’ଣ ଆମ ଭିତରେ ମାନବିକତାର ମୃତ୍ୟୁ ହୋଇଗଲାଣି କି? ନା ଗର୍ବ ଅଂହକାରର ଶେଷସୀମା ଟପି ମଣିଷକୁ ମଣିଷ ଭଳି ଦେଖୁନାହୁଁ? ସାମାନ୍ୟ ୫ ଟଙ୍କା ପାଇଁ ଜଣେ ଗ୍ରାହକକୁ ଏମିତି ନିଷ୍ଠୁର, ବର୍ବର ଆଉ ଅକଥନୀୟ ଭାବେ ଆକ୍ରମଣ କରିବା କେତେ ଯୁକ୍ତିଯୁକ୍ତ? ଯଦି ଗ୍ରାହକ ଜଣକ ଇଶ୍ୱର ବୋଲାଇବାକୁ ଆଦିଅନାଦି କାଳରୁ କୁହାଯାଉଛି ତେବେ ହୋଟେଲ ମାଲିକ ଜଣକ ହୃଦୟହୀନ ହେଲେ କେମିତି?