ତାମିଲନାଡୁରେ ପ୍ରବାସୀ ଓଡ଼ିଆ ଶ୍ରମିକଙ୍କ ଉପରେ ଫ୍ୟାକ୍ଟ୍ରି ମାଲିକଙ୍କ ଆତଙ୍କରାଜ । ଫ୍ୟାକ୍ଟ୍ରି ମାଲିକର ଇଙ୍ଗିତରେ ଶ୍ରମିକଙ୍କୁ ଗୋଡାଇ ଗୋଡାଇ ପିଟିଲେ ଗୁଣ୍ଡାବାହିନୀ, ୪ଜଣ ମହିଳାଙ୍କ ସମେତ ୬ ଆହତ
କନକ ବ୍ୟୁରୋ: ଯେଉଁ ଶ୍ରମିକମାନେ ଦିନରାତି ପରିଶ୍ରମ କରି ମାଲିକଙ୍କ ସିନ୍ଦୁକକୁ ଭରୁଥିଲେ, ସେମାନଙ୍କୁ ଯେଉଁଭଳି ଆଚରଣ କରାଯାଉଛି ନିଜେ ଦେଖି ନିଅନ୍ତୁ । ଶ୍ରମିକମାନଙ୍କ ଉପରେ କମ୍ପାନୀ ମାଲିକଙ୍କ ଜୁଲମ୍ରେ ଲହୁଲୁହାଣ ହୋଇଯାଇଛନ୍ତି ଓଡ଼ିଆ ଶ୍ରମିକ । ପେଟପାଟଣା ପାଇଁ ନିଜ ରାଜ୍ୟଛାଡ଼ି ତାମିଲନାଡୁରେ ଧାଇଁ ଯାଇଥିଲେ ଏହି ଶ୍ରମିକମାନେ । ହେଲେ ତାଲା ବନ୍ଦ ଯୋଗୁଁ କାମ ବନ୍ଦ ହୋଇଗଲା । ଆଉ ଯେତେବେଳେ ରହିବା ଖାଇବା ସହ ବକେୟା ଟଙ୍କା ମାଗିଲେ ଶ୍ରମିକଙ୍କ ଉପରେ ଆରମ୍ଭ ହୋଇଗଲା ଅତ୍ୟାଚାର ।
Kanak News is now on WhatsApp
Join and get latest news updates delivered to you via WhatsApp
ତାମିଲନାଡୁ ତିରିପୁର ଜିଲ୍ଲା ଉତୁକୁଡି ଅଂଚଳରେ ଥିବା ଆହିଲ ଆପ୍ପାରେଲ୍ ଏକ୍ସପର୍ଟ୍ସ ଲିମିଟେଡ୍ ନାମକ ଏକ ଘରୋଇ କମ୍ପାନୀରେ କାମ କରନ୍ତି, ପ୍ରାୟ ୧ ହଜାରରୁ ଅଧିକ ଓଡିଆ ଶ୍ରମିକ । ୫ଶହ ଝିଅ ଓ ୬ଶହ ପୁଅ କମ୍ପାନୀ ମେସରେ ରହି କପଡା ସିଲାଇ କାମ କରନ୍ତି । ହେଲେ ତାଲା ବନ୍ଦ ଯୋଗୁଁ କମ୍ପାନୀରେ କାମ ନଥିବାରୁ କମ୍ପାନୀ ଶ୍ରମିକଙ୍କୁ ଖାଇବାକୁ ଦେଉନାହିଁ । ସବୁଦିନ କେବଳ ଭାତ ଆଉ ରସମ ଦେଉଥିବାରୁ ଶ୍ରମିକମାନେ ଟିକେ ଭଲ ଖାଦ୍ୟ ମାଗିଥିଲେ । ଆଉ ଏଥିରେ ରାଗି ଯାଇ କମ୍ପାନୀ ପକ୍ଷରୁ ଓଡିଆ ଶ୍ରମିକଙ୍କୁ ଆକ୍ରମଣ କରାଯାଇଛି ।
କମ୍ପାନୀ କର୍ତୃପକ୍ଷ ଓ ସିକ୍ୟୁରିଟି ଗାର୍ଡ, ଓଡିଆ ଶ୍ରମିକଙ୍କୁ ମାଡ ମାରି ଲହୁ ଲୁହାଣ କରିଦେଇଛନ୍ତି । ଏଥିରେ ୪ଜଣ ଝିଅ ଓ ୨ ଜଣ ପୁଅ ଗୁରୁତର ହୋଇଛନ୍ତି । ଆକ୍ରମଣରେ ଜଣେ ଭିନ୍ନକ୍ଷମ ଝିଅଙ୍କୁ ବି ମାଡ ମାରିବାକୁ ପଛାଇ ନାହାନ୍ତି । ଏମିତି ଗୁରୁତର ଶ୍ରମିକଙ୍କୁ ଡାକ୍ତରଖାନାକୁ ନନେଇ ଗୋଟିଏ ସ୍ଥାନରେ ବନ୍ଧକ ରଖିଥିବା ଅଭିଯୋଗ ହୋଇଛି । ଏହି ଘଟଣାରେ ସ୍ଥାନୀୟ ଜିଲ୍ଲାପାଳ ହସ୍ତକ୍ଷେପ କରିବା ସହ କଂପାନୀ କର୍ତୃପକ୍ଷଙ୍କ ସହ ଆଲୋଚନା କରିଛନ୍ତି ।