କନକ ବ୍ୟୁରୋ : ନବରଙ୍ଗପୁରରୁ ଆସିଛି ଲୋମଟାଙ୍କୁରା ଦୃଶ୍ୟ । ଭୋକ ପାଇଁ ଭାଲୁଙ୍କ ସଂଘର୍ଷ । ଖାଦ୍ୟ ଅନ୍ୱେଷଣରେ ଆସି ଗାଁରେ ପଶିଲେ ଭାଲୁ । ଖାଦ୍ୟ ପାଇଁ କଲେ ଜୋରଦାର ଲଢେଇ । ନବରଙ୍ଗପୁର ଜିଲ୍ଲା ନନ୍ଦାହାଣ୍ଡି ବ୍ଲକ ଦହଣା ଗାଁରେ ଗତକାଲି ରାତିରେ ପଶିଛନ୍ତି ୨ଟି ଭାଲୁ । ଭୋକ ମେଂଟାଇବାକୁ ଗାଁରେ ଦୁଇଟି ଭାଲୁ ପଶିଥିବା ବେଳେ ସେମାନଙ୍କ ମଧ୍ୟରେ ଆରମ୍ଭ ହୋଇଥିଲା ଲଢେଇ । ଆକ୍ରମଣ ପ୍ରତି ଆକ୍ରମଣରେ କମ୍ପିଥିଲା ଅଂଚଳ ।
Kanak News is now on WhatsApp
Join and get latest news updates delivered to you via WhatsApp
ଦୀର୍ଘ ସମୟ ସଂଘର୍ଷ କରିବା ପରେ ଦହଣା ଗାଁର କିଶୋର ଚନ୍ଦ୍ର ମିଶ୍ରଙ୍କ ବାଡିରେ ପଶି ବିଭିନ୍ନ ଫଳ ଗଛ ନଷ୍ଟ କରିବା ସହ ଆଖୁ ବାଡିରେ ପଶିଥିଲେ ଦୁଇ ଭାଲୁ । ଆଗରୁ ଗୋଟିଏ ଭାଲୁ ଏହି ପରି ତାଙ୍କ ବାଡିରେ ପଶି ପନିପରିବା ଓ ଫସଲ ଖାଇ ଚାଲି ଯାଉଥିଲା । ତେବେ ଏବେ ଦୁଇଟି ଭାଲୁ ଆସି ଏପରି ଖାଦ୍ୟ ପାଇଁ ଲଢେଇ କରିବା ପୁରା ଅଂଚଳରେ ଆତଙ୍କ ଖେଳାଇ ଦେଇଛି ।
ସେପଟେ ଘଟଣା ସମ୍ପର୍କରେ ବନବିଭାଗ ଖବର ପାଇବା ପରେ ଅଂଚଳରେ ପାଟ୍ରୋଲିଂ ଆରମ୍ଭ କରିଛି । ଭାଲୁଗୁଡିକର ଗତିବିଧି ଉପରେ ନଜର ରଖାଯାଇଥିବା କହିଛନ୍ତି ନବରଙ୍ଗପୁର ଡିଏଫଓ । ଭାଲୁକୁ କାବୁ କରିବା ପାଇଁ ସମସ୍ତ ଆବଶ୍ୟକ ସରଞ୍ଜାମ ସହ ବନବିଭାଗ କର୍ମଚାରୀ ଅପେକ୍ଷା କରିଥିବା ସୂଚନା ଦେଇଛନ୍ତି ଡିଏଫଓ ।