ବଢିଲା ଭାରତୀୟ ଘରୋଇ କ୍ରିକେଟରଙ୍କ ଦରମା । ଜାଣନ୍ତୁ କାହାକୁ ମିଳିବ କେତେ?

355

କନକ ବ୍ୟୁରୋ : ଭାରତୀୟ କ୍ରିକେଟରଙ୍କ ପାଇଁ ଖୁସି ଖବର, ବିସିସିଆଇ କଲା ବଡ ଘୋଷଣା । ଭାରତୀୟ ଘରୋଇ କ୍ରିକେଟରଙ୍କ ପାଇଁ ବଡ ଘୋଷଣା କରିଛି ବିସିସିଆଇ । କରୋନା କାଳରେ ଭାରତୀୟ ଘରୋଇ କ୍ରିକେଟରଙ୍କ ପାରିଶ୍ରମିକ ବଢାଇଛି ବିସିସିଆଇ । ଏଣିକି ସିନିୟର ଘରୋଇ କ୍ରିକେଟରଙ୍କ ପାଇଁ ପ୍ରତି ମ୍ୟାଚ୍ ପିଛା ପାରିଶ୍ରମିକ ୬୦ ହଜାର ଟଙ୍କା ଘୋଷଣା କରିଛି ବୋର୍ଡ । କିନ୍ତୁ ଏହି ସିନିୟର ଖେଳାଳୀ ସର୍ବନିମ୍ନ ୪୦ଟି ମ୍ୟାଚ୍ ଖେଳିଥିବା ଆବଶ୍ୟକ ।

ସେହିଭଳି ୨୩ ବର୍ଷରୁ କମ ଘରୋଇ କ୍ରିକେଟର ଓ ୧୯ ବର୍ଷରୁ କମ ଘରୋଇ କ୍ରିକେଟରଙ୍କ ପାଇଁ ମ୍ୟାଚ୍ ପିଛା ପାରିଶ୍ରମିକ ଯଥାକ୍ରମେ ୨୫ ହଜାର ଓ ୨୦ ହଜାର ଟଙ୍କା ମିଳିବ ବୋଲି ଘୋଷଣା କରିଛି ବୋର୍ଡ । ଦୁବାଇରେ ବସିଥିବା ବିସିସିଆଇର ବୈଠକରେ ଏନେଇ ନିଷ୍ପତ୍ତି ନିଆଯାଇଛି । ବିସିସିଆଇ ସମ୍ପାଦକ ଜୟ ଶାହା ଟ୍ୱିଟ କରିଛନ୍ତି, ଯେଉଁ ଖେଳାଳୀ ୨୦୧୯-୨୦ ସିଜିନରେ ଘରୋଇ କ୍ରିକେଟରେ ଭାଗ ନେଇଥିଲେ ସେମାନଙ୍କୁ ଅତିରିକ୍ତ ୫୦ ପ୍ରତିଶତ ମ୍ୟାଚ୍ ପାରିଶ୍ରମିକ ଦିଆଯିବ । କାରଣ କରୋନା ପାଇଁ ୨୦୨୦-୨୧ ଘରୋଇ କ୍ରିକେଟ ସିଜିନକୁ ପୂରା ରଦ୍ଦ କରିଥିଲା ବିସିସିଆଇ  ।

ଏବେ ଭାରତୀୟ ଘରୋଇ କ୍ରିକେଟରଙ୍କୁ ରଣଜୀ, ବିଜୟ ହଜାରେ ଟ୍ରଫି ଭଳି ମ୍ୟାଚ୍ ପିଛା ୩୫ ହଜାର ଟଙ୍କା ମିଳୁଥିଲା । ସେହିଭଳି ସୟଦ ମୁସ୍ତାକ ଅଲ୍ଲୀ ଟ୍ରଫି ମ୍ୟାଚ୍ ପାଇଁ ୧୭,୫୦୦ ଟଙ୍କା ମିଳୁଥିଲା । କିନ୍ତୁ ଏବେ ମ୍ୟାଚ୍ ପିଛା ୨୫ ପ୍ରତିଶତ ପାରିଶ୍ରମିକ ବଢାଇ ଦେଇଛି ବିସିସିଆଇ । ଆସନ୍ତା ୨୧ ସେପ୍ଟେ୍ମ୍ବରରୁ ଭାରତୀୟ କ୍ରିକେଟର ଘରୋଇ ସିଜିନ ଆରମ୍ଭ ହେଉଛି ।