ରାଜଧାନୀରେ ଲୁଟେରାଙ୍କୁ ଚକମା ଦେଲେ ବ୍ୟବସାୟୀ ! ବାରମ୍ବାର ଲୁଟ ଘଟଣା ପରେ କମିସନରେଟ ପୁଲିସର ତତ୍ପରତା , ୩ ଗିରଫ, ୧୪୦ ଗ୍ରାମ ସୁନା ଓ ୩୧ ଭରି ରୂପା ଜବତ ।

ଚୋର ଖାଇଗଲେ ଚକମା । ରାଜଧାନୀରେ ଗଲା କିଛି ଦିନ ହେବ ଚୋରଙ୍କ ଉପଦ୍ରବ ବଢିବାରେ ଲାଗିଛି । ଲୋକଙ୍କୁ ଭୟଭୀତ କରି ନିଛାଟିଆ ସ୍ଥାନରୁ ଲୁଟି ନେଉଛନ୍ତି ଲୁଟେରା ଗ୍ୟାଙ୍ଗ । ଏହାରି ଭିତରେ ସାମନାକୁ ଆସିଛି ଭୁବନେଶ୍ୱର ଜଣେ ବ୍ୟବସାୟୀଙ୍କ ବୁଦ୍ଧିମତାର ଘଟଣା । ଲୁଟ୍ ଉଦ୍ୟମ ବେଳେ ପୁଲିସ ହାତରେ ଲୁଟେରାଙ୍କୁ ଧରାଇଦେଇଛନ୍ତି ବ୍ୟବସାୟୀ । ସହିଦନଗର ଅଂଚଳ ବିକ୍ରମ କେଶରୀ ଧଳ ଗତକାଲି ରାତିରେ ଘରକୁ ଫେରୁଥିବା ବେଳେ ଲୁଟ ଉଦ୍ୟମ ହୋଇଥିବା ଅଭିଯୋଗ ହୋଇଛି । ୭ ଜଣ ଦୁର୍ବୃତ ୩ଟି ବାଇକରେ ଆସି ବିକ୍ରମ କେଶରୀ ଧଳଙ୍କୁ କିଛି ସମୟ ଧରି ପିଛା କରିବା ପରେ ତାଙ୍କ ଠାରୁ ସୁନା ଗହଣା ଓ ଟଙ୍କା ଲୁଟି ନେବାକୁ ଉଦ୍ୟମ କରିଥିଲେ । ଦୁର୍ବୃତଙ୍କ ହାତରେ ମାରାଣାସ୍ତ୍ର ଥିବା ବେଳେ ଗାଡି ଭିତରେ ବ୍ୟବସାୟୀ କିଛି ଉପାୟ ନପାଇ ଏକ ପିସିଆର ଭ୍ୟାନ ନିକଟରେ ଅଟକି ଯାଇଥିଲେ । ଆଉ ବ୍ୟବସାୟୀଙ୍କ ଉପସ୍ଥିତ ବୁଦ୍ଧି ଯୋଗୁଁ ପୁଲିସ ହାବୁଡରେ ଫସିଯାଇଥିଲେ ଲୁଟେରା ।

ରାଜଧାନୀରେ ମାତିଛନ୍ତି ଲୁଟେରା । ଗତ କିଛି ଦିନ ହେବ ଲୁଟେରାଙ୍କ ଉତ୍ପାତ ଦେଖିବାକୁ ମିଳିଥିବା ବେଳେ ୩ଜଣ ଲୁଟେରାଙ୍କୁ ଗିରଫ କରିଛି ପୁଲିସ । ସେମାନଙ୍କ ନିକଟରୁ ୧୪୦ ଗ୍ରାମ ସୁନା ଓ ୩୧ ଭରି ରୁପା ଜବତ କରିଛି ପୁଲିସ । ମଂଚେଶ୍ୱର ଥ।।ନା ପୁଲିସ ଏହି ୩ ଲୁଟେରାଙ୍କୁ ଗିରଫ କରିଛି । ବିଶେଷ କରି ବାତ୍ୟା ଫନି ପରେ ରାଜଧାନୀରେ ଲୁଟେରାଙ୍କ ଆତଙ୍କ ବଢିଛି । କେଉଁଠି ଝରକା କିମ୍ବା ଗ୍ରୀଲ ତାଡି ଲକ୍ଷାଧିକ ଟଙ୍କାର ସୁନାଗହଣା ବୋହିନେଲେଣି ତ କେଉଁଠି ଘରେ ପଶି ହାତ ଗୋଡ ବାନ୍ଧି ଡକାୟତି କଲେଣି । କାର ଚାଳକଙ୍କୁ କଟୁରୀ ହାଣି ଟଙ୍କା ଗହଣା ଛଡାଇନେଉଛନ୍ତି ତ କେଉଁଠି ଚେନ ଝାମ୍ପି ନେଉଛନ୍ତି । ପ୍ରତ୍ୟେକ ଦିନ ରାଜଧାନୀରେ ଏଭଳି ଘଟଣା ଘଟୁଛି । ବାଲିଅନ୍ତା, ଖଣ୍ଡଗିରି, ସହିଦନଗର, ମଂଚେଶ୍ୱର, ନୂଆପଲ୍ଲୀ ଆଦି ଅଂଚଳରୁ ଏଭଳି ଅନେକ ଅଭିଯୋଗ ଥାନାରେ ପହଚୁିଁଛି । ଏହା ପରେ ତତ୍ପରତା ପ୍ରକାଶ କରିଛି କମିସନରେଟ ପୁଲିସ ।