ଆଜି ବରମୁଣ୍ଡା ବସ୍ ଟର୍ମିନାଲର ଲୋକାର୍ପଣ । ଅପରାହ୍ନରେ ଉଦଘାଟନ କରିବେ ମୁଖ୍ୟମନ୍ତ୍ରୀ ।
କନକ ବ୍ୟୁରୋ: ଆଜି ଲୋକାର୍ପିତ ହେବ ବରମୁଣ୍ଡା ବସ ଟର୍ମିନାଲ । ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ଦ୍ୱାରା ନବନିର୍ମିତ ବରମୁଣ୍ଡାର ବାବା ସାହେବ ଭୀମରାଓ ଆମ୍ବେଦକର ବସଷ୍ଟାଣ୍ଡର ଉଦଘାଟନ ହେବ । ପ୍ରାୟ ୨୧୧ କୋଟି ଟଙ୍କା ବ୍ୟୟରେ ନିର୍ମିତ ଏହି ବସଷ୍ଟାଣ୍ଡରେ ଏୟାରପୋର୍ଟ ଭଳି ଅତ୍ୟାଧୁନିକ ସୁବିଧା ସୁଯୋଗ ରହିଛି । ବସଷ୍ଟାଣ୍ଡରେ ଯାତ୍ରୀଙ୍କ ପାଇଁ ସମସ୍ତ ସୁବିଧା ଉପଲବ୍ଧ ହେବ । ଯାତ୍ରୀଙ୍କ ରହଣୀ ପାଇଁ ବିଶ୍ରାମ ସ୍ଥାନଠାରୁ ଆରମ୍ଭ କରି ଲିଫ୍ଟ, ଏସ୍କେଲେଟର, ଟିକେଟ କାଉଂଟର, ଏଟିଏମ୍, କୋରିୟର ସେବା, ପୁଲିସ ଆଉଟପୋଷ୍ଟ, ଫୁଡ଼ କୋର୍ଟ, ଲଗେଜ ସ୍କାନର, କରିଡ଼ର, ଶୌଚାଳୟ ସମେତ ଭିନ୍ନକ୍ଷମଙ୍କ ପାଇିଁ ସ୍ୱତନ୍ତ୍ର ସୁବିଧା କରାଯାଇଛି ।
Kanak News is now on WhatsApp
Join and get latest news updates delivered to you via WhatsApp
କେବଳ ସେତିକି ନୁହେଁ ବସ୍ ଚଳାଚଳ ସୁବିଧାକୁ ଆଖି ଆଗରେ ରଖି ରେଡ଼ିଓ ଫ୍ରିକ୍ୱେନ୍ସି ଆଇଡେଣ୍ଟିଫିକେସନ କାର୍ଡ଼ ବାଧ୍ୟତାମୂଳକ କରାଯାଇଛି । ଏଥିପାଇଁ ଟ୍ରାଏଲ ରନ୍ ହୋଇସାରିଛି । ଟର୍ମିନାଲ ଭିତରେ ମିଶନ ଶକ୍ତି କାଫେ, ମିଲେଟ ଶକ୍ତି କାଫେ, ଆହାର କେନ୍ଦ୍ର ହୋଇଛି । ଏଥିସହ ବାବାସାହେବ ଭୀମରାଓ ଆମ୍ବେଦକରଙ୍କ ଉଦ୍ଦେଶ୍ୟରେ ଏକ ଲାଇବ୍ରେରୀ ରହିବ । ଏଠାରେ ସମ୍ବିଧାନ ପ୍ରଦର୍ଶିତ ହେବ । ଯାହାଦ୍ୱାରା ଯୁବପିଢି ଦେଶର ମହାପୁରୁଷଙ୍କ ସମେତ ସମ୍ବିଧାନକୁ ପଢିବାର ସୁଯୋଗ ପାଇ ପାରିବେ । ୨୮ ହଜାର ବର୍ଗମିଟରରେ ତିଆରି ହୋଇଥିବା ଏହି ବସ୍ ଟର୍ମିନାଲରେ ୧୫୦ଟି ବସ୍ ୱେ’ରେ ବସ୍ ଲାଗିବାର ବ୍ୟବସ୍ଥା ରହିଛି । ତେଣୁ ଏହି ଟର୍ମିନାଲର ଲୋକାର୍ପଣ ହେଲେ, ଯାତ୍ରୀମାନେ ଉପକୃତ ହେବେ ବୋଲି କୁହାଯାଉଛି ।