କନକ ବ୍ୟୁରୋ: ବାରବାଟୀରେ ମୁଖ୍ୟ ଆକର୍ଷଣ ହେବେ ଭାରତୀୟ କ୍ରିକେଟ୍ ଦଳର ଅଧିନାୟକ ବିରାଟ କୋହଲି। ଗତକାଲି ସେ ଅଭ୍ୟାସ କରିବାକୁ ପଡ଼ିଆକୁ ଓହ୍ଲାଇଲା ବେଳେ ସର୍ବାଧିକ କରତାଳି ଓ ଉତ୍ସାହ ତାଙ୍କୁ ହିଁ ମିଳିଥିଲା। ହେଲେ ଏହି ଷ୍ଟାଡିୟମରେ କୋହଲିଙ୍କ ବ୍ୟକ୍ତିଗତ ପ୍ରଦର୍ଶନ ସେତେଟା ଭଲ ନାହିଁ। କୋହଲି ୨୦୧୧ରେ ୱେଷ୍ଟଇଣ୍ଡିଜ୍ ବିପକ୍ଷରେ ପ୍ରଥମ ଥର ପାଇଁ ବାରବାଟୀରେ ଦିନିକିଆ କ୍ରିକେଟ୍ ଖେଳିଥିଲେ। ସେହି ମ୍ୟାଚରେ ସେ ମାତ୍ର ୩ ରନ୍ କରି ପାରିଥିଲେ। ୨୦୧୪ରେ ଶ୍ରୀଲଙ୍କା ବିପକ୍ଷରେ ଭାରତୀୟ ଦଳର ନେତୃତ୍ବ ନେଇଥିଲେ କୋହଲି। ଚତୁର୍ଥ ସ୍ଥାନରେ ବ୍ୟାଟିଂ କରିବାକୁ ଆସି ୨୨ ରନ୍ ଆଗକୁ ବଢ଼ି ନ ଥିଲେ ସେ।
Kanak News is now on WhatsApp
Join and get latest news updates delivered to you via WhatsApp
୨୦୧୭ରେ ଇଂଲଣ୍ଡ ବିପକ୍ଷରେ ଖେଳିଥିବା ତୃତୀୟ ତଥା ଶେଷ ଦିନିକିଆରେ ମଧ୍ୟ କୋହଲି ପ୍ରଶଂସକଙ୍କ ଆଶା ପୂରଣ କରି ନଥିଲେ। ଏହି ମ୍ୟାଚରେ ସେ ମାତ୍ର ୮ ରନ୍ କରିଥିଲେ। ବାରବାଟୀରେ ଖେଳା ଯାଇଥିବା ଦୁଇଟି ଟ୍ବେଣ୍ଟି-୨୦ ମଧ୍ୟରୁ ୨୦୧୫ରେ ଦକ୍ଷିଣ ଆଫ୍ରିକା ବିପକ୍ଷରେ କୋହଲି ମାତ୍ର ୧ ରନରେ ରନଆଉଟ୍ ହୋଇ ଯାଇଥିଲେ। ୨୦୧୭ର ଶ୍ରୀଲଙ୍କା ବିପକ୍ଷ ଦ୍ବିତୀୟ ଟ୍ବେଣ୍ଟି-୨୦ରେ ସେ ଖେଳି ନ ଥିଲେ। ଚଳିତ ଭାରତ-ୱେଷ୍ଟଇଣ୍ଡିଜ୍ ଶୃଙ୍ଖଳାରେ କୋହଲି ଦୁଇଟି ମ୍ୟାଚରେ ମାତ୍ର ୫ ବଲର ସମ୍ମୁଖୀନ ହୋଇ ୪ ରନ୍ କରିଛନ୍ତି। ଏଣୁ ରବିବାର ମ୍ୟାଚରେ ସ୍ଥାନୀୟ ପ୍ରଶଂସକଙ୍କ ସହ ସମସ୍ତଙ୍କ ନଜର କୋହଲିଙ୍କ ଉପରେ ରହିବ।