ଆଜି ବି ବନ୍ଦ ରହିବ ବ୍ୟାଙ୍କ : ଘରୋଇ କରଣକୁ ବିରୋଧ କରି ଦୁଇ ଦିନିଆ ଧର୍ମଘଟ ଚଳାଇଛନ୍ତି କର୍ମଚାରୀ
ଆନ୍ଦୋଳନକୁ ସମର୍ଥନ କରିଛନ୍ତି ୯ କର୍ମଚାରୀ ଓ ଅଧିକାରୀ ସଂଘ, ଗ୍ରାହକ ହନ୍ତସନ୍ତ
କନକ ବ୍ୟୁରୋ : ଆଜି ବି ବନ୍ଦ ରହିବ ବ୍ୟାଙ୍କ । କେନ୍ଦ୍ର ସରକାରଙ୍କ ବ୍ୟାଙ୍କ ଘରୋଇ କରଣ ନିଷ୍ପତିକୁ ବିରୋଧ କରି ଆନ୍ଦୋଳନକୁ ଓହ୍ଲାଇଛି ୟୁନାଇଟେଡ୍ ଫୋରମ୍ ଅଫ୍ ବ୍ୟାଙ୍କ ୟୁନିଅନ୍ । ଏହାକୁ ସମର୍ଥନ କରିଛନ୍ତି ୯ଟି ବ୍ୟାଙ୍କ କର୍ମଚାରୀ ଓ ଅଧିକାରୀ ସଂଘ । ସର୍ବଭାରତୀୟ ସ୍ତରରେ ଏହି ଧର୍ମଘଟରେ ପ୍ରାୟ ୧୦ ଲକ୍ଷ କର୍ମଚାରୀ ସାମିଲ ହୋଇଛନ୍ତି । ବ୍ୟାଙ୍କ କର୍ମଚାରୀ ଦୁଇ ଦିନିଆ ଧର୍ମଘଟ ଘୋଷଣା କରିଥିବାରୁ ଗତକାଲି ବ୍ୟାଙ୍କ ବନ୍ଦ ରହିଥିଲା ଓ ଆଜି ବି ବନ୍ଦ ରହିବ ।
Kanak News is now on WhatsApp
Join and get latest news updates delivered to you via WhatsApp
ଅନ୍ୟପଟେ କର୍ମଚାରୀଙ୍କ ଧର୍ମଘଟ ଯୋଗୁଁ, ବ୍ୟାଙ୍କ ଶାଖାରେ ହେଉଥିବା କାରବାର, କ୍ଲିୟରିଂ ଆଦି ଗୁରୁତର ଭାବେ ପ୍ରଭାବିତ ହୋଇଛି । ସେପଟେ ବ୍ୟାଙ୍କ ବନ୍ଦ ଯୋଗୁଁ ଅସୁବିଧା ଭୋଗିଛନ୍ତି ବ୍ୟାଙ୍କ ଗ୍ରାହକ । ତେବେ ଏହି ଧର୍ମଘଟ ଯୋଗୁଁ ଅନଲାଇନ ଓ ଡିଜିଟାଲ ବ୍ୟାଙ୍କିଙ୍ଗରେ କୌଣସି ଅସୁବିଧା ହେବ ନାହିଁ ବୋଲି କୁହାଯାଉଛି । ଅନ୍ୟପଟେ ବ୍ୟାଙ୍କଗୁଡିକ ଏଟିଏମରେ ପର୍ଯ୍ୟାପ୍ତ ଟଙ୍କା ରଖିଥିବାରୁ ଏଟିଏମ୍ ରୁ ଟଙ୍କା ଉଠାଣ ମଧ୍ୟ ପ୍ରଭାବିତ ହେବାର ଆଶଙ୍କା କମ୍ ରହିଛି ।
କେନ୍ଦ୍ର ଅର୍ଥମନ୍ତ୍ରୀ ନିର୍ମଳା ସୀତାରମଣ ବଜେଟରେ ୧.୭୫ ଲକ୍ଷ କୋଟି ଟଙ୍କା ଯୋଗାଡ କରିବା ପାଇଁ ବ୍ୟାଙ୍କର ଘରୋଇ କରଣ ପାଇଁ ଘୋଷଣା କରିଥିଲେ । ଏହାକୁ ବିରୋଧ କରି ଆନ୍ଦୋଳନକୁ ଓହ୍ଲାଇଛନ୍ତି ବ୍ୟାଙ୍କ କର୍ମଚାରୀ । ଶନିବାର ଓ ରବିବାର ଦୁଇ ଦିନ ବନ୍ଦ ରହିବା ପରେ ଏହି ଦୁଇ ଦିନ ଧର୍ମଘଟ ଯୋଗୁଁ ବନ୍ଦ ରହୁଛି ବ୍ୟାଙ୍କ । ଫଳରେ ଦୀର୍ଘ ୪ ଦିନ ପରେ ଆସନ୍ତାକାଲି ଖୋଲିବ ବ୍ୟାଙ୍କ ।