କାଲି କଡା ଟକ୍କର ! ବର୍ମିଂହାମରେ ବାଂଲାଦେଶ ବିପକ୍ଷରେ ଲଢିବ ବିରାଟ ବାହିନୀ, ସେମିଫାଇନାଲରୁ ଗୋଟିଏ ପାଦ ପଛରେ ଭାରତ ।
କନକ ବ୍ୟୁରୋ : ୨୦୧୯ ବିଶ୍ୱକପ କ୍ରିକେଟରେ ବିଜୟଧାରା ବଜାୟ ରଖିଥିବା ଟିମ୍ ଇଣ୍ଡିଆକୁ କିନ୍ତୁ ଇଂଲଣ୍ଡ ବିପକ୍ଷ ମ୍ୟାଚରେ ପରାଜୟର ସାମ୍ନା କରିବାକୁ ପଡିଛି । ସେମିଫାଇନାଲ ଠାରୁ ଗୋଟିଏ ପାଦ ପଛରେ ରହିଥିବା ଭାରତ ପାଇଁ ଆଗାମୀ ମ୍ୟାଚ୍ ଅନେକ ଗୁରୁତ୍ୱପୂର୍ଣ୍ଣ ଅଟେ । ଆସନ୍ତାକାଲି ବିଶ୍ୱକପରେ ଖେଳାଯିବ ରୋମାଞ୍ଚକର ମ୍ୟାଚ୍ । ବର୍ମିଂହାମର ଏଜବାଷ୍ଟନ୍ ଗ୍ରାଉଣ୍ଡରେ ଅପରାହ୍ନ ୩ଟାରେ ମୁହାଁମୁହିଁ ହେବେ ଭାରତ ଏବଂ ବାଂଲାଦେଶ । ଏହି ମ୍ୟାଚ୍ ଜିତିଲେ ସିଧାସଳଖ ଦ୍ୱିତୀୟ ଦଳ ଭାବେ ସେମିଫାଇନାଲରେ ପ୍ରବେଶ କରିବ ବିରାଟ ବାହିନୀ ।
Kanak News is now on WhatsApp
Join and get latest news updates delivered to you via WhatsApp
ତେବେ ସବୁଠାରୁ ବଡ କଥା ହେଉଛି, ଏହି ମ୍ୟାଚ୍ ପୂର୍ବରୁ ବାଂଲାଦେଶର ତାରକା ଅଲରାଉଣ୍ଡର ଖେଳାଳୀ ସକିବ୍ ଅଲ ହାସନ୍ ଭାରତକୁ ଖୋଲା ଚେତାବନୀ ଦେଇଥିଲେ । ବିରାଟ ବାହିନୀକୁ ବିଶ୍ୱକପରେ ପରାସ୍ତ କରିବ ବୋଲି ଦମ୍ଭ ଦେଖାଇଥିଲେ ସାକିବ । ସାକିବ କହିଥିଲେ, ଭାରତ ଚଳିତ ବିଶ୍ୱକପରେ ଶ୍ରେଷ୍ଠ ଦଳ ମଧ୍ୟରୁ ଅନ୍ୟତମ । ଏପରିକି ବିଶ୍ୱକପ ଟାଇଟଲ ରେସରେ ମଧ୍ୟ ଭାରତ ଆଗରେ ରହିଛି । ଜବରଦସ୍ତ ଫର୍ମରେ ଥିବା ଟିମ୍ ଇଣ୍ଡିଆକୁ ହରାଇବା ମଧ୍ୟ ସହଜ ନୁହେଁ । କିନ୍ତୁ ଭାରତ ବିପକ୍ଷରେ ଆମେ ଆମର ଭଲ ପ୍ରଦର୍ଶନ କରିବୁ । ଭାରତକୁ ହରାଇବା ଆମର ସର୍ବଶ୍ରେଷ୍ଠ ପ୍ରଦର୍ଶନ ହେବ । ଭାରତ ପାଖରେ ବିଶ୍ୱସ୍ତରୀୟ ଖେଳାଳି ରହିଛନ୍ତି ଯେଉଁମାନେ ଏକାକୀ ମ୍ୟାଚ୍ ଜିତାଇବାକୁ ସକ୍ଷମ । କିନ୍ତୁ ଏହା ସତ୍ୱେ ମଧ୍ୟ ଆମେ ଟିମ୍ ଇଣ୍ଡିଆକୁ ହରାଇପାରିବୁ । ଭାରତ ବିପକ୍ଷରେ ସ୍ୱତନ୍ତ୍ର ରଣନୀତି କରି ବାଂଲାଦେଶ ଟିମ୍ ପଡିଆକୁ ଓହ୍ଲାଇବ ବୋଲି କହିଥିଲେ ସାକିବ ।
ଅନ୍ୟପଟେ ଯଦି ବିଶ୍ୱକପ ଇତିହାସ ଉପରେ ନଜର ପକାଇବା, ତେବେ ଆଇସିସି କ୍ରିକେଟ୍ ବିଶ୍ୱକପରେ ମୋଟ୍ ୩ ଥର ମୁହାଁମୁହିଁ ହୋଇଛନ୍ତି ଭାରତ ଏବଂ ବାଂଲାଦେଶ । ଯେଉଁଥିରେ ଭାରତ ୨ଟି ମ୍ୟାଚରେ ବାଜି ମାରିଥିବା ବେଳେ ବାଂଲାଦେଶ ମଧ୍ୟ ଗୋଟିଏ ମ୍ୟାଚରେ ଭାରତକୁ ପରାସ୍ତ କରିଛି । ତେବେ ଚଳିତ ବିଶ୍ୱକପର ଅଭ୍ୟାସ ମ୍ୟାଚରେ ମୁହାଁମୁହିଁ ହୋଇଥିଲେ ଉଭୟ ଦଳ । ଯେଉଁଥିରେ ବାଂଲାଦେଶକୁ ମାତ୍ ଦେଇଥିଲା ବିରାଟ ବାହିନୀ ।
ଏବେ ନଜର ପକାଇବା ପଏଂଟ ଟେବୁଲ ଉପରେ । ୮ଟି ମ୍ୟାଚରୁ ୧୪ ପଏଂଟ ପାଇ ପ୍ରଥମ ସ୍ଥାନରେ ରହିଛି ଅଷ୍ଟ୍ରେଲିଆ । ୭ଟି ମ୍ୟାଚରୁ ୧୧ ପଏଂଟ ପାଇ ଭାରତ ରହିଛି ଦ୍ୱିତୀୟ ସ୍ଥାନରେ । ୮ଟି ମ୍ୟାଚରୁ ୧୧ ପଏଂଟ ପାଇ ତୃତୀୟ ସ୍ଥାନରେ ରହିଛି ନ୍ୟୁଜିଲାଣ୍ଡ । ଏବଂ ୮ଟି ମ୍ୟାଚରୁ ୧୦ ପଏଂଟ ପାଇ ଚତୁର୍ଥ ସ୍ଥାନରେ ରହିଛି ଇଂଲଣ୍ଡ । ତେବେ ୮ଟି ମ୍ୟାଚରୁ ୯ ପଏଂଟ ପାଇ ପଂଚମ ସ୍ଥାନରେ ରହିଛି ପାକିସ୍ତାନ । ଏବେ ପ୍ରଶ୍ନ ଉଠୁଛି ପାକିସ୍ତାନ ଏବଂ ଇଂଲଣ୍ଡ ମଧ୍ୟରୁ ସେମିଫାଇନାଲ ଖେଳିବ କିଏ । ଯଦି ପାକିସ୍ତାନ ଆଫଗାନିସ୍ତାନକୁ ହରାଏ ଏବଂ ଇଂଲଣ୍ଡ ନ୍ୟୁଜିଲାଣ୍ଡ ଠାରୁ ହାରି ଯାଏ ତେବେ ପାକିସ୍ତାନ ସେମିଫାଇନାଲ ଖେଳିବାର ସମ୍ଭାବନା ଅଛି । ଆଉ ଇଂଲଣ୍ଡ ଟିମ୍ ସେମିଫାଇନାଲ ଖେଳିବାରୁ ବଂଚିତ ହେବ । ଇଂଲଣ୍ଡ ଭାରତକୁ ହରାଇବା ପରେ ସେମିଫାଇନାଲ ଖେଳିବାର ଆଶା ଉଜ୍ଜିବୀତ ହୋଇଛି ସତ । ଆଗକୁ ଖେଳାଯିବାକୁ ଥିବା ମ୍ୟାଚ ଜିତିବାକୁ ପଡିବ ଇଂଲଣ୍ଡକୁ ।