କନକ ବ୍ୟୁରୋ: ବାଂଲାଦେଶରେ ମଙ୍ଗଳବାରଦିନ ଗ୍ରୀଡ ବିଫଳ ହେବାରୁ ଦେଶରେ ଅଧିକାଂଶ ଅଂଚଳ ଅନ୍ଧାରକୁ ଚାଲିଯାଇଛି । ଏହା ଫଳରେ ଦେଶର ଅନେକ ଅଂଚଳରେ ଜରୁରୀ ସେବା ଓ ଜନଜୀବନ ପ୍ରଭାବିତ ହୋଇଛି ।
Kanak News is now on WhatsApp
Join and get latest news updates delivered to you via WhatsApp
ବାଂଲାଦେଶର ସମ୍ବାଦପତ୍ର ଢାକା ଟ୍ରିବ୍ୟୁନ୍ ଅନୁଯାୟୀ, ଜାତୀୟ ବିଦ୍ୟୁତ୍ ଗ୍ରୀଡ୍ ଅପରାହ୍ନ ୨ଟା (ସ୍ଥାନୀୟ ସମୟ) ରେ ବିଫଳ ହେବାରୁ ଅଳ୍ପ କିଛି ଅଂଚଳକୁ ଛାଡ଼ି ସମଗ୍ର ବାଂଲାଦେଶକୁ ଅନ୍ଧାର କରିଦେଇଛି ।
ବାଂଲାଦେଶ ପାୱାର ଡେଭଲପମେଣ୍ଟ ବୋର୍ଡ (ବିପିଡିବି) ଏବଂ ବାଂଲାଦେଶର ପାୱାର ଗ୍ରୀଡ କମ୍ପାନୀ (ପିଜିସିବି)ର ଅଧିକାରୀମାନେ କହିଛନ୍ତି ଯେ ପ୍ରଥମେ ଦେଶର ପୂର୍ବ ଭାଗରେ ପାୱାର ଗ୍ରୀଡ ବିଫଳ ହୋଇଯାଇଥିଲା । ଏହା ପରେ ଅନ୍ୟ ଟ୍ରାନ୍ସମିସନ ଗ୍ରୀଡଗୁଡ଼ିକ ବି ବିଫଳ ହୋଇଯାଇଥିଲେ । ଏହା ଫଳରେ ଢାକା, ଚିଟାଗଙ୍ଗ, ସିଲହେଟ୍, ବାରିସାଲ୍ ଏବଂ ମାଇମେନସିଂହ ଅଞ୍ଚଳରେ ବିଦ୍ୟୁତ୍ ସରବରାହ ବିଚ୍ଛିନ୍ନ ହୋଇଛି । ରାଇପୁର ଅଞ୍ଚଳର କେବଳ କିଛି ଜିଲ୍ଲାରେ ସ୍ଥିତି ସ୍ବାଭାବିକ ରହିଛି ।
ପାଓ୍ବାର ଗ୍ରୀଡ ଅଫ ବାଂଲାଦେଶର ମୁଖ୍ୟ ଇଞ୍ଜିନିୟର ମହମ୍ମଦ ମକସେଦୁର ରେହମାନ ଏକ ସ୍ଥାନୀୟ ସମ୍ବାଦ ଖବରକାଗଜକୁ କହିଛନ୍ତି ଯେ ଏପର୍ୟ୍ୟନ୍ତ ଅଚଳାବସ୍ଥା ଦୂର ହୋଇନାହିଁ । ତେବେ ଖୁବଶୀଘ୍ର ଅଚଳାବସ୍ଥା ଦୂର ହେବ । ବାଂଲାଦେଶର ଟେଲିକମ୍ ସେବା ପ୍ରଦାନକାରୀଙ୍କ ସଂଘ ଆସୋସିଏସନ୍ ଅଫ୍ ମୋବାଇଲ୍ ଟେଲିକମ୍ ଅପରେଟର୍ସ ଅଫ୍ ବାଂଲାଦେଶ (ଆମଟୋବ୍) ଏକ ବିବୃତ୍ତି ଜାରି କରି କହିଛନ୍ତି ଯେ ବିଦ୍ୟୁତ୍ ବିଫଳତା ଯୋଗୁଁ ଟେଲିକମ୍ ସେବା ବ୍ୟାହତ ହୋଇପାରେ ।