କେନ୍ଦ୍ରାପଡା ସାଂସଦଙ୍କୁ ବାଏ ବାଏ କଲେ ରାଜନୈତିକ ସଂଯୋଜକ, ଖୋଲିଲେ ବୈଜୟନ୍ତଙ୍କ ଗୁମର କଥା ! ବୈଜୟନ୍ତଙ୍କ ରାଜନୈତିକ ସଚିବ କହିଲେ, କୌଣସି ପ୍ରଭାବ ପଡିବନି
କନକ ବ୍ୟୁରୋ : ବୈଜୟନ୍ତଙ୍କୁ ବାଏ ବାଏ । କେନ୍ଦ୍ରାପଡା ସାଂସଦଙ୍କୁ ଲାଗିଲା ଆଉ ଏକ ଝଟକା । ବୈଜୟନ୍ତଙ୍କ ରାଜନୈତିକ ସଂଯୋଜକ ଦେବାଶିଷ ମଲ୍ଲିକ ଆଜି ନିଜ ପଦରୁ ଇସ୍ତଫା ଦେଇଛନ୍ତି । ଦୀର୍ଘ ୧୦ ବର୍ଷ ଧରି ବୈଜୟନ୍ତଙ୍କ ରାଜନୈତିକ ସଂଯୋଜକ ଭାବେ କାମ କରୁଥିବା ଦେବାଶିଷ ଆଜି ସାମ୍ବାଦିକ ସମ୍ମିଳନୀରେ ନିଜ ପଦରୁ ଇସ୍ତଫା ଦେଇଛନ୍ତି । ଏହାସହ ବୈଜୟନ୍ତଙ୍କ ବିରୋଧରେ ଦେବାଶିଷ ଆଣିଛନ୍ତି ସାଂଘାତିକ ଅଭିଯୋଗ । ଯାହା ବିଜେଡି ବିରୋଧରେ ବୈଜୟନ୍ତଙ୍କ ଅର୍ନ୍ତଘାତି କାର୍ଯ୍ୟକୁ ପଦାରେ ପକାଇଛି । ଦେବାଶିଷଙ୍କ ଅଭିଯୋଗ ଅନୁଯାୟୀ, ବୈଜୟନ୍ତ ଏବେ ବିଜେପି ମୁହାଁ ହୋଇଛନ୍ତି । ଯାହା ବୈଜୟନ୍ତଙ୍କ ବିଜେପି ଲିଙ୍କକୁ ପୁଣିଥରେ ପଦାରେ ପକାଇଛି ।
Kanak News is now on WhatsApp
Join and get latest news updates delivered to you via WhatsApp
ଏହାସହ ବିଜେଡିରେ ରହି ବୈଜୟନ୍ତ ଯେଉଁଭଳି ଦଳବିରୋଧୀ କାମ କରିଛନ୍ତି ସାମ୍ବାଦିକ ସମ୍ମିଳନୀରେ ତାହାର ଖୁଲାସା କରିଛନ୍ତି ଦେବାଶିଷ । ଗତ ପଞ୍ଚାୟତ ନିର୍ବାଚନ ଓ ବିଜେପୁର ଉପନିର୍ବାଚନରେ ବୈଜୟନ୍ତ ଦଳ ବିରୋଧରେ ଅର୍ନ୍ତଘାତୀ କାର୍ଯ୍ୟ କରୁଥିଲେ । ଯାହା ଦଳକୁ କ୍ଷତି ପହଞ୍ଚାଉଥିଲା ଏହା ଜଣା ପଡିବା ପରେ ବୈଜୟନ୍ତଙ୍କୁ ବିଜେଡିର ପ୍ରାଥମିକ ସଦସ୍ୟ ପଦରୁ ନିଲମ୍ବନ କରିଥିଲେ ବିଜେଡି ସୁପ୍ରିମୋ ନବୀନ ପଟ୍ଟନାୟକ ।
ଦିନକୁ ଦିନ ବିଜେଡି ଓ ବୈଜୟନ୍ତଙ୍କ ସର୍ମ୍ପକ ତିକ୍ତ ହେଉଥିବା ବେଳେ ଦେବାଶିଷ ସାଂସଦଙ୍କ ଆଉ ଏକ ଗୁମର ଖୋଲିଛନ୍ତି । ଯାହା ବୈଜୟନ୍ତଙ୍କ ପ୍ରକୃତ ଚେହେରାକୁ ପଦାରେ ପକାଇଛି । ଦେବାଶିଷଙ୍କ ଅଭିଯୋଗ ଅନୁଯାୟୀ, ବୈଜୟନ୍ତଙ୍କୁ ସଂସଦର ଫାଇନାନ୍ସ କମିଟିରେ ନ ରଖିବା ଯୋଗୁଁ ନବୀନଙ୍କ ସ୍ୱାସ୍ଥ୍ୟବସ୍ଥା ବିଷୟରେ ଅପପ୍ରଚାର କରିଥିଲେ କେନ୍ଦ୍ରାପଡା ସାଂସଦ । ଏହାଛଡା ନିଜ ସ୍ୱାର୍ଥ ପାଇଁ ଏବେ ପାଣ୍ଡିଆନ ଓ ତୃତୀୟ ମହଲାକୁ ବୈଜୟନ୍ତ ଟାର୍ଗେଟ କରୁଛନ୍ତି ବୋଲି କହିଛନ୍ତି ଦେବାଶିଷ । ବିଜୁ ପରିବାରରେ ରହି ବୈଜୟନ୍ତ ଯେଉଁଭଳି ଭାବେ ବିଜେଡି ବିରୋଧରେ ଅର୍ନ୍ତଘାତୀ କାର୍ଯ୍ୟ କରୁଛନ୍ତି ତାହା ତାଙ୍କ ବିବେକକୁ ବେଶ ବାଧିଛି ତେଣୁ ସେ ସଂଯୋଜକ ପଦରୁ ଇସ୍ତଫା ଦେଇଥିବା କହିଛନ୍ତି ଦେବାଶିଷ । ଏହାଛଡା ସେ ଏବେ ମଧ୍ୟ ନବୀନଙ୍କ ନେତୃତ୍ୱକୁ ସମର୍ଥନ କରୁଛନ୍ତି ଓ ବିଜୁ ଜନତା ଦଳରେ ରହିଛନ୍ତି ବୋଲି ସାମ୍ବାଦିକ ସମ୍ମିଳନୀରେ କହିଛନ୍ତି ।
ଦେବାଶିଷଙ୍କ ଏଭଳି ଅଭିଯୋଗକୁ ଖଣ୍ଡନ କରିଛନ୍ତି ବୈଜୟନ୍ତଙ୍କ ରାଜନୈତିକ ସଚିବ ଜ୍ୟୋତି ଘୋଷ । ସେ କହିଛନ୍ତି, ବୈଜୟନ୍ତଙ୍କ ବିରୋଧରେ ସଂଯୋଜକ ଯେଉଁ ଅଭିଯୋଗ ଆଣିଛନ୍ତି ତାହା ସମ୍ପୂର୍ଣ୍ଣ ଭାବେ ଭିତ୍ତିହୀନ । ଏହାଛଡା ଦେବାଶିଷ ନିଜର ନ୍ୟସ୍ତସ୍ୱାର୍ଥ ପାଇଁ କାହା ଇଙ୍ଗିତରେ ହୁଏତ ଏଭଳି ନିଷ୍ପତି ନେଇଛନ୍ତି ଯାହା ଆଗାମୀ ଦିନରେ ସ୍ପଷ୍ଟ ହୋଇଯିବ ।ତେବେ ଏଥିରେ ଆଦୌ ବିଚଳିତ ହେବାର କୌଣସି କାରଣ ନାହିଁ ବୋଲି କହିଛନ୍ତି ଜ୍ୟୋତି ପ୍ରକାଶ ଘୋଷ । ଗୋଟିଏ ପଟେ ବିଜେଡ଼ି ଓ ବୈଜୟନ୍ତ ବିବାଦ ବଢୁଥିବା ବେଳେ ଦେବାଶିଷଙ୍କ ଅଭିଯୋଗକୁ ନେଇ ଏବେ ରାଜନୈତିକ ମହଲରେ ଜୋର ଚର୍ଚ୍ଚା ଧରିଛି ।