ବାହନଗା ଦୁର୍ଘଟଣାକୁ ପୂରିଲାଣି ୮ ମାସ, ହେଲେ ଏବେ ଆହତ ହେଉଛନ୍ତି ହନ୍ତସନ୍ତ । ଭୁବନେଶ୍ୱର ଏମ୍ସରେ ସହାୟତା ଅପେକ୍ଷାରେ ସଲିମ୍
କନକ ବ୍ୟୁରୋ : ସେଦିନର ସେଇ ଅଘଟଣକୁ ସିନା ଦୁନିଆ ଭୁଲି ଯାଇଛି, ହେଲେ ଯିଏ ଅଙ୍ଗେ ନିଭେଇଛି, ଯନ୍ତ୍ରଣାକୁ ଅନୁଭବ କରିଛି, ଯେତେ ଭୁଲିବାକୁ ଚେଷ୍ଟା କଲେ ବି ଭୁଲି ପାରୁନି । ଜୀବନ ବଂଚି ଯାଇଥିବାରୁ ଭଗବାନକୁ ଧନ୍ୟବାଦ ଦେବେ ନା’ ଯନ୍ତ୍ରଣା ପିଛା ଛାଡୁନଥିବାରୁ ଅଭିମାନ କରିବେ ଜାଣି ପାରୁନାହାଁନ୍ତି ଏସ୍୍କେ ସଲିମ୍ । କେଉଁ ମାନସିକ ଅବସ୍ଥାରେ ବଂଚୁଛନ୍ତି ସଲିମ୍ ଥରେ ଚିନ୍ତା କରନ୍ତୁ । ୮ ମାସରେ ୫-୫ ଥର ଅପରେସନ୍ । ବାଲେଶ୍ୱରରୁ କଟକ, କଟକରୁ ଭୁବନେଶ୍ୱର ଏମ୍ସ । ମାସ ମାସ ଧରି ଚିକିତ୍ସା ପରେ ବି, ଶରୀରରୁ ନା’ ଯନ୍ତ୍ରଣା ଯାଉଛି ନା’ ଆଖିକୁ ନିଦ ଆସୁଛି । ହସ୍ପିଟାଲ ବେଡରେ ପଡ଼ି ରହିଛନ୍ତି ସଲିମ୍ ।
Kanak News is now on WhatsApp
Join and get latest news updates delivered to you via WhatsApp
କରମଣ୍ଡଳ ଏକ୍ସପ୍ରେସ୍ରେ ବାଲେଶ୍ୱରରୁ ଭୁବନେଶ୍ୱର ଆସୁଥିବା ସଲିମ୍ ଯେତେବେଳେ ଆଖି ଖୋଲିଥିଲେ, ରକ୍ତ ଜୁଡ଼ୁବୁଡ଼ୁ ଅବସ୍ଥାରେ ତଳେ ପଡ଼ିଥିଲେ । ଚିକିତ୍ସା ପାଇଁ କଟକ ଅଣାଯାଇଥିଲା, ଏକାଧିକ ଥର ଅପରେସନ୍ କରି କାମ ସାରିଦେଲେ ହସ୍ପିଟାଲ କର୍ତୃପକ୍ଷ । ହେଲେ ଅବସ୍ଥା ସୁଧୁରିଲାନି । ଶେଷରେ ଚିକିତ୍ସା ପାଇଁ ଏଏମ୍ସରେ ଭର୍ତି ହୋଇଛନ୍ତି । ପାଣି ଭଳି ଟଙ୍କା ସରିଛି, କିନ୍ତୁ ଯନ୍ତ୍ରଣା ଯାଇନି ।
ଆଉ କୌଣସି ବିକଳ୍ପ ନପାଇ, ରେଳମନ୍ତ୍ରୀଙ୍କୁ ଦୁଃଖ ଜଣାଇଛନ୍ତି ସଲିମଙ୍କ ଝିଅ । ବାପାଙ୍କ ଚିକିତ୍ସା ପାଇଁ ଆର୍ଥିକ ସହାୟତା ଯୋଗଇ ଦେବାକୁ ସୋସିଆଲ ମିଡ଼ିଆରେ ଅନୁରୋଧ କରିଛନ୍ତି ।
ସହାୟତା ଆକାରରେ ପୂର୍ବତଟ ରେଳବାଇ ପକ୍ଷରୁ ୨ ଲକ୍ଷ ଏବଂ ରାଜ୍ୟ ସରକାରଙ୍କ ପକ୍ଷରୁ ୧ ଲକ୍ଷ ମିଳିଛି ସତ । ହେଲେ ୮ ମାସର ଚିକିତ୍ସା ଏବଂ ୫-୫ ଥର ଅପରେସନ୍ ପରେ, ଯେମିତି ସଲିମ୍ଙ୍କ ପରିବାର ପାଖରେ ଆଉ ସମ୍ବଳ ନାହିଁ । ଏମିତିି କି ପ୍ରଧାନମନ୍ତ୍ରୀ ରିଲିଫ ପାଣ୍ଠିରୁ ମିଳୁଥିବା ସହାୟତା ପାଇ ନାହାଁନ୍ତି ସଲିମଙ୍କ ପରିବାର । ହେଲେ ଆଶ୍ୱସ୍ତର କଥା ହେଉଛି, ପୁରା ଚିକତ୍ସା ପ୍ରକ୍ରିୟାରେ ସଂପୂର୍ଣ୍ଣ ସହଯୋଗ କରିଛି ଏମ୍ସ ।