ଆଜି ବିଶ୍ୱକପରେ ଆଉ ଏକ ବଡ଼ ଲଢ଼େଇ : ମୁହାଁମୁହିଁ ହେବେ ଅଷ୍ଟ୍ରେଲିଆ ଓ ପାକିସ୍ତାନ; ସେମିଫାଇନାଲ ଦୌଡ଼ ପାଇଁ ବିଜୟ ଜରୁରୀ
କନକ ବ୍ୟୁରୋ : ଆଜି ବିଶ୍ୱକପରେ ଆଉ ଏକ ବଡ଼ ଲଢ଼େଇ । ମୁହାଁମୁହିଁ ହେବେ ଅଷ୍ଟ୍ରେଲିଆ ଓ ପାକିସ୍ତାନ । ଖରାପ ଆରମ୍ଭ କରିଥିବା ଅଷ୍ଟ୍ରେଲିଆ ଗତ ମ୍ୟାଚ୍ରେ ଶ୍ରୀଲଙ୍କାକୁ ହରାଇ ମନୋବଳକୁ ଦୃଢ଼ କରିଛି । ପ୍ରଥମ ଦୁଇ ମ୍ୟାଚ୍ରେ ଏହି ଦଳ ଭାରତ ଓ ଦକ୍ଷିଣ ଆଫ୍ରିକାଠୁ ପରାଜିତ ହୋଇଥିଲା । ଏହି ଦୁଇ ମ୍ୟାଚ୍ରେ ଦଳର ବ୍ୟାଟିଂ ବିପର୍ଯ୍ୟୟ ଦେଖିବାକୁ ମିଳିଥିଲା । ଶ୍ରୀଲଙ୍କା ବିପକ୍ଷ ଲୋ ସ୍କୋରିଂ ମ୍ୟାଚ୍କୁ କିନ୍ତୁ ସହଜରେ ଜିତି ନେଇଥିଲା । ଏହି ବିଶ୍ବକପ୍ରେ କେବଳ ଜୋସ ଇଙ୍ଗଲିସ ଓ ମିଚେଲ ଷ୍ଟାର୍କ ଅର୍ଦ୍ଧଶତକ ଅର୍ଜନ କରିବାକୁ ସମର୍ଥ ହୋଇଛନ୍ତି ଏବଂ ମୋଟ ଉପରେ ୩ ମ୍ୟାଚ୍ରେ ମାର୍ନସ ଲବୁସାନ ୧୦୦ ରନ୍ ପାର କରିଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ଅନ୍ୟପକ୍ଷରେ ପ୍ରଥମ ଦୁଇ ମ୍ୟାଚ୍ରେ ନେଦରଲାଣ୍ଡ୍ସ ଓ ଶ୍ରୀଲଙ୍କାକୁ ହରାଇ ଥିଲା ପାକିସ୍ତାନ। କିନ୍ତୁ ଭାରତ ବିପକ୍ଷ ମ୍ୟାଚ୍ ଖେଳିଲା ବେଳେ ଦଳ ଚାପରେ ରହି ଶୋଚନୀୟ ଭାବେ ହାରିଥିଲା । ତେବେ ଦଳର ବ୍ୟାଟର୍ମାନେ ଭଲ ପ୍ରଦର୍ଶନ ଦେଇଛନ୍ତି । କେବଳ ଓପନର୍ ଇମାମ-ଉଲ୍-ହକ୍ ଓ ଅଧିନାୟକ ବାବର ଆଜମ ସେତେଟା କମାଲ କରି ନାହାନ୍ତି । ଇମାମ ୩ ମ୍ୟାଚ୍ରେ ୬୩ ରନ୍ କରିଥିଲା ବେଳେ ପ୍ରଥମ ଦୁଇ ମ୍ୟାଚ୍ରେ ଖରାପ ଖେଳି ଆଉଟ୍ ହୋଇଥିବା ବାବର ଭାରତ ବିପକ୍ଷରେ ଅର୍ଦ୍ଧଶତକ ହାସଲ କରିଥିଲେ । ଆହତ ନସୀମ ଶାହଙ୍କ ଅନୁପସ୍ଥିତରେ ବୋଲିଂ ଭାର ୨୩ ବର୍ଷୀୟ ଦ୍ରୁତ ବୋଲର ସାହିନ ଶାହ ଆଫ୍ରିଦିଙ୍କ କାନ୍ଧରେ ରହିବ । ଏହି ବାମହାତୀ ଦ୍ରୁତ ବୋଲର ଚଳିତ ପ୍ରତିଯୋଗିତାରେ ନିଜର ଶ୍ରେଷ୍ଠ ଦେଖାଇଛନ୍ତି । ଅଷ୍ଟ୍ରେଲିଆ ଓ ପାକିସ୍ତାନ ମଧ୍ୟରେ ବିଜୟ-ପରାଜୟ ବ୍ୟବଧାନ ମୋଟ ଉପରେ ୬୯-୩୪ ଥିଲା ବେଳେ ଦିନିକିଆ ବିଶ୍ବକପ୍ରେ ୬-୪ ରହିଛି ।
ସମ୍ଭାବ୍ୟ ଅଷ୍ଟ୍ରେଲିଆ ଏକାଦଶ : ମିଚେଲ ମାର୍ସ, ଡେଭିଡ ୱାର୍ଣ୍ଣର, ଷ୍ଟିଭ ସ୍ମିଥ୍, ମାର୍ନସ ଲବୁସାନ, ଜୋସ ଇଙ୍ଗଲିସ (ୱିକେଟ୍ ରକ୍ଷକ), ଗ୍ଲେନ ମ୍ୟାକ୍ସୱେଲ, ମାର୍କସ ଷ୍ଟୋଇନିସ, ମିଚେଲ ଷ୍ଟାର୍କ, ପ୍ୟାଟ କମିନ୍ସ (ଅଧିନାୟକ), ଆଦାମ ଜାମ୍ପା, ଜୋସ ହାଜେଲଉଡ଼ ।
ସମ୍ଭାବ୍ୟ ପାକିସ୍ତାନ ଏକାଦଶ : ଫକର ଜମାନ, ଇମାମ ଉଲ ହକ୍, ବାବର ଆଜମ (ଅଧିନାୟକ), ମହମ୍ମଦ ରିଜୱାନ (ୱିକେଟ୍ ରକ୍ଷକ), ସାଉଦ ସକିଲ, ଇଫତିକାର ଅହମ୍ମଦ, ଉସ୍ମା ମିର, ହାରିସ ରୌଫ, ସାହିନ ସାହ ଆଫ୍ରିଦି, ହାସନ ଅଲ୍ଲୀ, ମହମ୍ମଦ ନୱାଜ ।