ବାବୁ ବନିବେ କଂଗ୍ରେସ ନେତା। ଦଳରେ ଯୋଗଦେବେ ପୂର୍ବତନ ମୁଖ୍ୟ ଶାସନ ସଚିବ ବିଜୟ ପଟ୍ଟନାୟକ।
କନକ ବ୍ୟୁରୋ: କଂଗ୍ରେସରେ ମିଶିବେ ପୂର୍ବତନ ମୁଖ୍ୟ ଶାସନ ସଚିବ । ଭୁବନେଶ୍ୱର ନୁହେଁ ଦିଲ୍ଲୀରେ ହେବ ମିଶ୍ରଣ ପର୍ବ । କିଛିଦିନ ତଳେ ବିଜୟ ପଟ୍ଟନାୟକଙ୍କୁ ନେଇ କଳ୍ପନାଜଳ୍ପନା ପ୍ରକାଶ ପାଇଥିଲା ତାହା ଏବେ ସତ ହେବାକୁ ଯାଉଛି । ଦିନେ ରାଜ୍ୟ ପ୍ରଶାସନିକ ସେବାର ମୁଖିଆ ଥିବା ପୂର୍ବତନ ମୁଖ୍ୟ ଶାସନ ସଚିବ ବିଜୟ ପଟ୍ଟନାୟକ କଂଗ୍ରେସରେ ସାମିଲ ହେବେ । ଏଥିପାଇଁ ପ୍ରସ୍ତୁତି ସରିଛି । ସୂଚନା ଅନୁସାରେ, ଦିଲ୍ଲୀରେ ଗୁରବାରଦିନ ସଭାପତି ମଲ୍ଲିକାର୍ଜୁନ ଖଡଗେ ଓ ରାଜ୍ୟ କଂଗ୍ରେସ ନେତାଙ୍କ ଉପସ୍ଥିତିରେ ବିଜୟ ପଟ୍ଟନାୟକ କଂଗ୍ରେସରେ ସାମିଲ ହେବେ । ଏଥିପାଇଁ ପିସିସି ସଭାପତିଙ୍କ ସହ ବିଜୟ ପଟ୍ଟନାୟକ ଦିଲ୍ଲୀ ଯାଇଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ମୁଖ୍ୟ ଶାସନ ସଚିବ ଥିବାବେଳେ ବିଜୟ ପଟ୍ଟନାୟକ, ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ପାଖ ଲୋକ ଥିଲେ ବୋଲି ଚର୍ଚ୍ଚା ହେଉଥିଲା । କିନ୍ତୁ ସେ ବିଜେଡିରେ ନମିଶି କଂଗ୍ରେସକୁ କାହିଁକି ଗଲେ ତାକୁ ନେଇ ଆଲୋଚନା ଆରମ୍ଭ ହୋଇଛି । ରାଜ୍ୟରେ ବୁଡିଯାଉଥିବା କଂଗ୍ରେସ ପାଇଁ ସେ କି ସଞ୍ଜିବନୀ ଦେବେ ତାକୁ ନେଇ ରାଜନୈତିକ ମହଲ ଅଙ୍କକଷା ଆରମ୍ଭ କରିଛନ୍ତି ।
ନିରଞ୍ଜନ ପଟ୍ଟନାୟକ ପିସିସି ସଭାପତି ଥିବାବେଳେ ବିଜୟ ପଟ୍ଟନାୟକ କଂଗ୍ରେସରେ ସାମିଲ ହେଉଥିବା ନେଇ ଚର୍ଚ୍ଚା ହୋଇଥିଲା । କିନ୍ତୁ କୌଣସି କାରଣରୁ ତାହା ସ୍ଥଗିତ ରହିଥିଲା । ପରେ ବାରମ୍ବାର ବୈଠକ ବସି ବିଜୟ ପଟ୍ଟନାୟକ କଂଗ୍ରେସରେ ସାମିଲ ହେବା ପାଇଁ ପଥ ପରିଷ୍କାର ହୋଇଛି । ରାଜ୍ୟର ପ୍ରଶାସନିକ ସେବାରେ ବିଜୟ ପଟ୍ଟନାୟକ ଜଣେ ଜଣାଶୁଣା ନାଁଁ ।
-୨୦୧୩ ମସିହାରେ ସେ ରାଜ୍ୟର ମୁଖ୍ୟ ଶାସନ ସଚିବ ଥିଲେ
-ଅବସର ପରେ ଷ୍ଟାଫ ସିଲେକ୍ସନ କମିଶନର ଅଧ୍ୟକ୍ଷ ହୋଇଥିଲେ
-ଏହାପରେ ମାନବାଧିକାର କମିଶନ ଭାବେ ନିଯୁକ୍ତି ପାଇଥିଲେ
-ଏହା ପରେ ବେଦାନ୍ତ ବିଶ୍ୱବିଦ୍ୟାଳୟରେ ଯୋଗଦେଇଥିଲେ
ଏବେ କଂଗ୍ରେସରେ ଯୋଗଦେବା ପରେ ତାଙ୍କ ପାଇଁ କଂଗ୍ରେସର ରଣନୀତି କଣ ହେବ ତାକୁ ନେଇ ଆଲୋଚନା ଆରମ୍ଭ ହୋଇଛି । ଗୋଷ୍ଠୀ କନ୍ଦଳ ଓ ଦୁର୍ବଳ ସଙ୍ଗଠନ ଯୋଗୁଁ ରାଜ୍ୟରେ କଂଗ୍ରେସ ସ୍ଥିତ ଖରାପ ଆଡକୁ ଯାଉଛି । ଏଭଳି ସ୍ଥଳେ ବିଜୟ ପଟ୍ଟନାୟକ କଂଗ୍ରେସରେ ନିଜ ପାଇଁ କି ଭବିଷ୍ୟତ ଦେଖିଛନ୍ତି ତାକୁ ନେଇ ଚର୍ଚ୍ଚା ଜୋର ଧରିଛି । ପ୍ରଶ୍ନ ଉଠୁଛି
-ରାଜ୍ୟରେ ବଡ ପଦବୀ ପାଇବେ କି ବିଜୟ ପଟ୍ଟନାୟକ?
-ଲୋକସଭା ନା ବିଧାନସଭା ନିର୍ବାଚନ ପାଇଁ ଲଢିବେ?
-କଂଗ୍ରେସ ହାଇକମାଣ୍ଡଙ୍କ ସହ କି ଡିଲ୍ ହୋଇଛି ?