କରୋନ ଔଷଧ ନାଁରେ ବିକ୍ରି ହୋଇଗଲା ବାବା ରାମଦେବଙ୍କ କରୋନିଲ ଔଷଧ । ୪ମାସରେ ୨୪୧ କୋଟି ଟଙ୍କାର ବ୍ୟବସାୟ କଲା ପତଞ୍ଜଳୀ । ଡାକ୍ତର କହିଲେ, କରୋନା ଔଷଧ ନୁହେଁ, ବୃଦ୍ଧି କରୁଥାଇପାରେ ସାମାନ୍ୟ ରୋଗ ପ୍ରତିରୋଧକ ଶକ୍ତି
କନକ ବ୍ୟୁରୋ : କରୋନାରୁ ମୁକ୍ତି ପାଇବା ପାଇଁ ସାରା ଦୁନିଆଁ ଟିକାକୁ ଚାହିଁ ବସିଛି । ହେଲେ କେବେ ଟିକା ଆସିବ ଏହା ସଠିକ୍ ଭାବେ କାହାକୁ ଜଣା ନାହିଁ । ଏଭଳି ସମୟରେ ଇମ୍ୟୁନିଟି ବୁଷ୍ଟର ଭାବେ ବାବା ରାମଦେବ ବଜାରକୁ ଆଣିଥିବା କରୋନିଲ କିଟ୍ ରେକର୍ଡ ସଂଖ୍ୟକ ବିକ୍ରି ହୋଇଛି । ଭାସି ଗଲା ବେଳେ କୂଟା ଖିଅକୁ ଆଶ୍ରା ଭଳି ଯୋଗଗୁରୁ ରାମଦେବଙ୍କ ଉପରେ ଭରଷା କରି ତାଙ୍କ କରୋନିଲ କିଟକୁ କିଣି ନେଇଛନ୍ତି ଲକ୍ଷ ଲକ୍ଷ ଲୋକ । ଆଉ ମାଲାମାଲ ହୋଇଛନ୍ତି ବାବା ରାମଦେବ ।
Kanak News is now on WhatsApp
Join and get latest news updates delivered to you via WhatsApp
କରୋନା କବଳରୁ ରକ୍ଷା କରିପାରୁ କି ନପାରୁ, କିନ୍ତୁ ବ୍ୟବସାୟ ସଫଳତା ହାସଲ କରିବାରେ ସଫଳ ହୋଇଛି ବାବା ରାମଦେବଙ୍କ ଆୟୁର୍ବେଦ କମ୍ପାନୀ ପତଞ୍ଜଳି ଦ୍ୱାରା ପ୍ରସ୍ତୁତ କରୋନିଲ୍ । ବଜାରକୁ ଆସିବାର ମାତ୍ର ୪ ମାସରେ କରୋନିଲ କିଟ୍ ଓ ଏହାର ଏକକ ଉତ୍ପାଦ ୮୫ ଲକ୍ଷ ୟୁନିଟ୍ ବିକ୍ରି ହୋଇଛି । ଯାହାର, ବଜାର ମୂଲ୍ୟ ପ୍ରାୟ ୨୪୧ କୋଟି ଟଙ୍କା ବୋଲି କୁହାଯାଉଛି ।
ତେବେ ଏହା ରାମଦେବଙ୍କ ମାର୍କେଟିଂ ଷ୍ଟ୍ରାଟେଜୀ ଯୋଗୁଁ ସମ୍ଭବ ହୋଇ ପାରିଛି ବୋଲି କହିଛନ୍ତି ଚିକିିତ୍ସା ବିଶେଷଜ୍ଞ । କରୋନା ଉପରେ କରୋନିଲର କଣ ରହିଛି ପ୍ରଭାବ? ଏହା କରୋନାକୁ ରୋକିବାରେ କେତେ ସକ୍ଷମ ? ଏନେଇ ଚିକିତ୍ସା ବିଶେଷଜ୍ଞଙ୍କ ନିକଟରେ କୌଣସି ସଠିତ ତଥ୍ୟ ନାହିଁ । ହେଲେ ଯୋଗଗୁରୁ ବାବା ରାମଦେବଙ୍କ ଉପରେ ଲୋକଙ୍କ ଭରଷା ଥିବାରୁ ତାଙ୍କ ନିର୍ମିତ ଔଷଧ ଲୋକଙ୍କ ମନ ଜିଣିବାରେ ସକ୍ଷମ ହୋଇପାରିଛି ବୋଲି ଆଉ କିଛି ଡାକ୍ତର କହିଛନ୍ତି ।
ଜୁନ୍ ୨୩ରେ କରୋନିଲ୍ କିଟର ବଜାର ପ୍ରବେଶ କରାଇଥିଲେ ବାବା ରାମଦେବ । ହେଲେ ଏହାର କୌଣସି କ୍ଲିନିକାଲ ଟ୍ରାଏଲ ହୋଇନଥିବାରୁ ଏହାର କାର୍ଯ୍ୟକାରିତା ନେଇ ସୃଷ୍ଟି ହୋଇଥିଲା ବିବାଦ । ତାପରେ ଆୟୁଷମନ୍ତ୍ରାଳୟ ଏହାକୁ କେବଳ ଇମ୍ୟୁନିଟି ବୁଷ୍ଟର ଭାବେ ବିକ୍ରି କରିବାକୁ ଅନୁମତି ଦେଇଛି ।