ଶୁଭ ମୁହୁର୍ତରେ ଅଯୋଧ୍ୟାରେ ରାମଲାଲାଙ୍କର ହେଲା ପ୍ରାଣ ପ୍ରତିଷ୍ଠା । ଦିବ୍ୟ ଦର୍ଶନ କଲା ସାରା ବିଶ୍ୱ, ପ୍ରାଣ ପ୍ରତିଷ୍ଠା ଉତ୍ସବରେ କ୍ଷମା ମାଗିଲେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ
କନକ ବ୍ୟୁରୋ : ଭବ୍ୟ, ଦିବ୍ୟ ସ୍ୱରୂପ । ମନମୋହକ ପ୍ରଭୁ ଶ୍ରୀରାମଙ୍କ ବାଳରୂପ । ଯେଉଁ ରୂପ ଦେଖିବାକୁ ବର୍ଷ ବର୍ଷ ଧରି କୋଟି କୋଟି ରାମ ଭକ୍ତ ଅପେକ୍ଷା କରିଥିଲେ, ଏବେ ଅନ୍ତ ଘଟିଛି । ଅଯୋଧ୍ୟା ନଗରୀର ଭବ୍ୟ ମନ୍ଦିରର ଗର୍ଭ ଗୃହରେ ମର୍ଯ୍ୟାଦାପୁରୁଷୋତ୍ତମ ପ୍ରଭୁ ଶ୍ରୀରାମ ବିରାଜମାନ ହୋଇଛନ୍ତି । ପଣ୍ଡିତ ଓ ସାଧୁ ସନ୍ଥଙ୍କ ମନ୍ତ୍ରଉଚ୍ଚାରଣ ଓ ପୂଜାପାଠ ଭିତରେ, ସଂପନ୍ନ ହୋଇଛି ରାମଲାଲାଙ୍କ ପ୍ରାଣ ପ୍ରତିଷ୍ଠା ।
Kanak News is now on WhatsApp
Join and get latest news updates delivered to you via WhatsApp
ରାମ ଲାଲାଙ୍କ ପ୍ରାଣପ୍ରତିଷ୍ଠା ପାଇଁ କୋଟି କୋଟି ଦେଶବାସୀଙ୍କ ଉକ୍ରଣ୍ଠା ବଢ଼ି ଚାଲିଥିବାବେଳେ, ଶୁଭ ମୁହୁର୍ତରେ ପ୍ରଭୁ ଶ୍ରୀରାମଙ୍କ ପାଇଁ ପୂଜା ସାମଗ୍ରୀ ଧରି ମନ୍ଦିରକୁ ପ୍ରବେଶ କରିଥିଲେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ । ତାପରେ ମଂଗଳ ବେଳାରେ, ଗର୍ଭ ଗୃହରେ ଆରମ୍ଭ ହୋଇଥିଲା ରାମଲାଲାଙ୍କ ପ୍ରାଣପ୍ରତିଷ୍ଠା ଉତ୍ସବ । ପଣ୍ଡିତଙ୍କ ମନ୍ତ୍ରଉଚ୍ଚାରଣ ସହ ଶ୍ରୀରାମଙ୍କ ପୂଜାର୍ଚ୍ଚନା ହୋଇଥିଲା । ପୂଜାର୍ଚ୍ଚନା ଭିତରେ ପ୍ରଧାନମନ୍ତ୍ରୀ ପ୍ରଥମେ ରାମଲାଲାଙ୍କ ଆଖିରୁ ପଟିକୁ ହଟାଇଥିଲେ । ପ୍ରଥମେ ଏକ ଆଇନାରେ ରାମଲାଲା ନିଜକୁ ଦେଖିଥିଲେ । ତାପରେ ରାମଲାଲାଙ୍କ ପାଦରେ ପୁଷ୍ପାର୍ପଣ କରିଥିଲେ ମୋଦୀ । ରାମ ଲାଲାଙ୍କ ପ୍ରାଣ ପ୍ରତିଷ୍ଠା ପରେ, ଭଗବାନଙ୍କ ଚରଣରେ ନିଜକୁ ସମର୍ପିତ କରି ସାଂଟାଙ୍ଗ ପ୍ରଣିପାତ କରିଥିଲେ । ଉପସ୍ଥିତ ପଣ୍ଡିତଙ୍କ ଆଶୀର୍ବାଦ ନେଇଥିଲେ ପ୍ରଧାନମନ୍ତ୍ରୀ ।
ରାମଲାଲାଙ୍କ ପ୍ରାଣ ପ୍ରତିଷ୍ଠା ସମୟରେ ଗର୍ଭ ଗୃହ ଭିତରେ ଉପସ୍ଥିତ ରହିଥିଲେ ସଂଘ ପ୍ରମୁଖ ମୋହନ ଭାଗବତ, ଉତରପ୍ରଦେଶ ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥ ଓ ଉତରପ୍ରଦେଶ ରାଜ୍ୟପାଳ ଆନନ୍ଦୀ ବେନ୍ ପଟେଲ୍ । ରାମଲାଲାଙ୍କ ପୂଜାର୍ଚ୍ଚନା କରିଥିଲେ । ପୁଷ୍ପାଞ୍ଜଳି ଦେଇଥିଲେ । ଶେଷରେ ଏହି ଐତିହାସିକ ମୁହୂର୍ତକୁ ବ୍ୟାଖ୍ୟା କରିଥିଲେ ପ୍ରଧାନମନ୍ତ୍ରୀ । ଭାରତ ପାଇଁ ଗର୍ବ ଓ ଗୌରବର ଦିନ ବୋଲି କହିଥିଲେ ମୋଦୀ ।
ରାମଲାଲାଙ୍କ ପ୍ରାଣପ୍ରତିଷ୍ଠା ସହ ଭାରତୀୟ ସଂସ୍କୃତିରେ ଯୋଡି ହୋଇଯାଇଛି ଆଉ ଏକ ସ୍ୱର୍ଣ୍ଣିମ ଅଧ୍ୟାୟ । କେବଳ ଭାରତ ନୁହେଁ, ସାରାବିଶ୍ୱ ଏହି ଐତିହାସିକ ମୁହୁର୍ତର ସାକ୍ଷୀ ହୋଇଛି । ବିଶ୍ୱର କୋଣ ଅନୁକୋଣରେ ଥିବା ରାମଭକ୍ତଙ୍କ ମୁହଁରୁ ସ୍ୱାଭାବିକ ଭାବେ ଆଜି ବାହାରୁଥିଲା ଜୟ ଶ୍ରୀରାମ ଧ୍ୱନି ।