ଚାଷୀଙ୍କ ଆକ୍ରୋଶର ଶିକାର ହେଲେ ତହସିଲଦାର । ବେଆଇନ୍ ଇଟାଭାଟି ବନ୍ଦ କରିବା ଦାବିରେ ତହସିଲ୍ ଅଫିସ୍ ଭିତରେ ପଶି ତହସିଲଦାରଙ୍କୁ ଆକ୍ରମଣ 

କନକ ବ୍ୟୁରୋ : ତହସିଲଦାରଙ୍କୁ ଆକ୍ରମଣ । ଚାଷୀଙ୍କ ଆକ୍ରୋଶର ଶିକାର ହେଲେ ତହସିଲଦାର । ବେଆଇନ୍ ଇଟାଭାଟି ବନ୍ଦ କରିବା ଦାବିରେ ତହସିଲଦାର ଅଫିସ୍ ଭିତରେ ପଶି ତହସିଲଦାରଙ୍କୁ ଆକ୍ରମଣ କଲେ ଚାଷୀ । କେନ୍ଦ୍ରାପଡ଼ା ଜିଲ୍ଲା ପଟ୍ଟାମୁଣ୍ଡାଇରେ ଦେଖିବାକୁ ମିଳିଛି ଏମିତି ଦୃଶ୍ୟ । ପଟ୍ଟାମୁଣ୍ଡାଇର କଣିପାଳ ଗାଁର ଚାଷୀ, ଦୀର୍ଘ ଦିନ ହେବ ଗାଁରେ ଚାଲିଥିବା ବେଆଇନ୍ ଇଟାଭାଟିକୁ ବନ୍ଦ କରିବାକୁ ତହସିଲଦାରଙ୍କ ନିକଟରେ ବାରମ୍ବାର ଅଭିଯୋଗ କରିଆସୁଥିଲେ । ହେଲେ ତହସିଲଦାର ଆଜିକାଲି କହି ଏହା ଉପରେ କୌଣସି କାର୍ଯ୍ୟାନୁଷ୍ଠାନ ନେଇନଥିଲେ । ତହସିଲଦାରଙ୍କ ଠାରୁ ବାରମ୍ବାର ନିରାଶ ହେବା ପରେ ଗାଁର ଚାଷୀମାନେ ଧାରଣାରେ ବସିଥିଲେ ।

ତେବେ ତହସିଲଦାର ଓ ପୋଲିସ୍ ଇଟାଭାଟି ବନ୍ଦ କରିବାକୁ ପ୍ରତିଶ୍ରୁତି ଦେବା ପରେ ଧାରଣାରୁ ଉଠିଥିଲେ ଚାଷୀ । କିନ୍ତୁ ଗତକାଲି ସେହି ବେଆଇନ୍ ଇଟାଭାଟିରେ ଇଟା ପୋଡ଼ି ହେବାରୁ ଉତକ୍ଷୀପ୍ତ ହୋଇପଡ଼ିଥିଲେ ଚାଷୀ । ଏହାକୁ ନେଇ ଆଜି ପୁଣି ତହସିଲଦାରଙ୍କୁ ଅବଗତ କରାଇଥିଲେ ଚାଷୀ । ଆଉ ଏହି ସମୟରେ ତହସିଲଦାର ଅଫିସରେ ଉତେଜନା ସୃଷ୍ଟି ହୋଇଥିଲା । ଉତକ୍ଷୀପ୍ତ ଚାଷୀ ତହସିଲଦାର କାର୍ଯ୍ୟାଳୟର କର୍ମଚାରୀଙ୍କ ମଧ୍ୟରେ ଠେଲାପେଲା ହୋଇଥିଲା । ଏପରିକି ତହସିଲଦାର ମଧ୍ୟ ଚାଷୀଙ୍କ ଆକ୍ରୋଶର ଶିକାର ହୋଇଥିଲେ । ଖବର ପାଇ ପୋଲିସ୍ ଘଟଣା ସ୍ଥଳରେ ପହଂଚିଥିଲା । ପୋଲିସ ଦୁଇଜଣଙ୍କୁ ଅଟକ ରଖିଛି । ସେପଟେ ତହସିଲଦାର କହିଛନ୍ତି, ଇଟାଭାଟି ବନ୍ଦ କରିବା ପାଇଁ ପୋଲିସ୍ ଓ ଅଗ୍ନିଶମ ବିଭାଗକୁ ଚିଠି ଲେଖାସରିଛି । ଏହାସତ୍ୱେ କିଛି ଚାଷୀ ତହସିଲଦାର କାର୍ଯ୍ୟାଳୟରେ ଉତେଜନା ସୃଷ୍ଟି କରିଥିବା କହିଛନ୍ତି ତହସିଲଦାର ।