ମନ୍ତ୍ରୀ ପୁଅଙ୍କ ଦାଦାଗିରି ! ଘଷିପୁରାରେ ପିସିସି ସଭାପତିଙ୍କ ଗାଡ଼ି ଉପରକୁ ଆକ୍ରମଣ, ମନ୍ତ୍ରୀ ବଦ୍ରି ପାତ୍ର ପୁଅଙ୍କ ସମ୍ପୃକ୍ତି ଥିବା ଅଭିଯୋଗ କଲା କଂଗ୍ରେସ, ୧୫ କଂଗ୍ରେସ କର୍ମୀ ଆହତ ।
କନକ ବ୍ୟୁରୋ: କେନ୍ଦୁଝରରେ ବଢୁଛି ନିର୍ବାଚନୀ ହିଂସା । ପିସିସି ସଭାପତି ନିରଞ୍ଜନ ପଟ୍ଟନାୟକଙ୍କ ଗାଡ଼ି ଉପରକୁ ଆକ୍ରମଣ । ଘଷିପୁରା ନିର୍ବାଚନ ମଣ୍ଡଳୀ ଭଣ୍ଡାରୀପଡ଼ା ଛକଠାରେ ପିସିସି ସଭାପତିଙ୍କ ଗାଡ଼ି ଉପରକୁ ଆକ୍ରମଣ ହୋଇଥିବା ସୂଚନା ମିଳିଛି । ଏହି ଆକ୍ରମଣରେ ୧୫ ଜଣରୁ ଅଧିକ କଂଗ୍ରେସ କର୍ମୀ ଆହତ ହୋଇଥିବା ସୂଚନା ମିଳିଛି । ଏପରିକି ଗାଡ଼ି ଭିତରେ ଥିବା କିଛି କଂଗ୍ରେସ କର୍ମୀଙ୍କ ଗୋଡ଼ରେ ଗୁଳି ବାଜି ଆହତ ହୋଇଥିବା ଜଣାପଡ଼ିଛି ।
Kanak News is now on WhatsApp
Join and get latest news updates delivered to you via WhatsApp
ଅନ୍ୟପଟେ ଏହି ଆକ୍ରମଣ ମନ୍ତ୍ରୀ ବଦ୍ରି ପାତ୍ରଙ୍କ ପୁଅ ଦେବାଶିଷ ପାତ୍ରଙ୍କ ସମ୍ପୃକ୍ତି ରହିଥିବା ଅଭିଯୋଗ କରିଛନ୍ତି କଂଗ୍ରେସ ଜିଲ୍ଲା ଉପସଭାପତି ରତିକାନ୍ତ ବରାଳ । ଏପରିକି ଦେବାଶିଷଙ୍କ ଉପସ୍ଥିତିରେ ଦୁର୍ବୁତ୍ତମାନେ ପିସିସି ସଭାପତିଙ୍କ ଗାଡ଼ି ଉପରକୁ ଆକ୍ରମଣ କରିଥିବା ଅଭିଯୋଗ ହୋଇଛି । ସେପଟେ ଏନେଇ ରାମଚନ୍ଦ୍ରପୁର ଥାନାରେ କଂଗ୍ରେସ ତରଫରୁ ଲିଖିତ ଅଭିଯୋଗ ହୋଇଛି । ଘଟଣା ସ୍ଥଳରେ ପୁଲିସ ପହଁଚି ତଦନ୍ତ ଆରମ୍ଭ କରିଛି । ଘଟଣାକୁ ନେଇ ଜିଲ୍ଲା ଏସପି କହିଛନ୍ତି କି, ଘଟଣା ଉପରେ ନଜର ରଖାଯାଇଛି । ଦୋଷୀଙ୍କ ବିରୋଧରେ ଉପଯୁକ୍ତ କାର୍ଯ୍ୟାନୁଷ୍ଠାନ ନିଆଯିବ ।
ସୂଚନା ମୁତାବକ ବଦ୍ରୀପାତ୍ରଙ୍କ ପୁଅଙ୍କ ନାଁରେ ଗତକାଲି ମଧ୍ୟ କଂଗ୍ରେସ କର୍ମୀଙ୍କୁ ଆକ୍ରମଣ କରିଥିବା ଅଭିଯୋଗ ହୋଇଥିଲା । ଘସିପୁରା ନିର୍ବାଚନମଣ୍ଡଳୀର ଅଙ୍ଗାରୁଆ ଗ୍ରାମରେ ଜଣେ କଂଗ୍ରେସ କର୍ମୀଙ୍କୁ ଆକ୍ରମଣ ହୋଇଥିବା ଅଭିଯୋଗ ହୋଇଥିଲା । ଏହି ଘଟଣାରେ ମନ୍ତ୍ରୀ ବଦ୍ରି ପାତ୍ରଙ୍କ ପୁଅ ଦେବାଶିଷ୍ ପାତ୍ର ଓରଫ ଟୁଟୁଙ୍କ ନାଁରେ ମାମଲା ମଧ୍ୟ ରୁଜୁ କରାଯାଇଥିଲା । ତେବେ ଗୋଟିଏ ପଟେ ଗତକାଲିର ଘଟଣାର ତଦନ୍ତ ପୋଲିସ କରୁଥିବାବେଳେ ପୁଣି ପିିସିସି ସଭାପତିଙ୍କ ଗାଡ଼ି ଉପରେ ଆକ୍ରମଣ ସ୍ଥାନୀୟ ଅଞ୍ଚଳରେ ସୁରକ୍ଷା ବ୍ୟବସ୍ଥାକୁ ପ୍ରଶ୍ନବାଚୀ ଉଠାଇଛି ।