ଆସାମ କୋଭିଡ ହସ୍ପିଟାଲରେ ଡାକ୍ତରଙ୍କୁ ମରଣାନ୍ତକ ଆକ୍ରମଣ । ଆକ୍ରାନ୍ତଙ୍କ ମୃତ୍ୟୁ ପରେ ମାଡ ମାରିଲେ ଉତ୍ୟକ୍ତ ସଂପର୍କୀୟ
କନକ ବ୍ୟୁରୋ: କରୋନା ଆକ୍ରାନ୍ତଙ୍କ ମୃତ୍ୟୁ ପରେ ଡାକ୍ତରଙ୍କୁ ମରଣାନ୍ତକ ଆକ୍ରମଣ କଲେ ମୃତକଙ୍କ ସଂପର୍କୀୟ । ଡାକ୍ତକଙ୍କୁ ଘେରିଯାଇ ଉତ୍ୟକ୍ତ ସଂପର୍କୀୟ ଥାଳିରେ, ବାଡିରେ ମାଡ ମାରିବା ସହ ଗୋଇଠା ଚାପୁଡା ବର୍ଷା କରିଥିଲେ । ଆସାମ ହୋଜାଇ ଜିଲ୍ଲା ଉଦାଲିର କୋଭିଡ କେୟାର ସେଂଟର ଏହି ବର୍ବର ଦୃଶ୍ୟ, ଏବେ ସୋସିଆଲ ମିଡିଆରେ ଭାଇରାଲ ହେବାରେ ଲାଗିଛି । ଭିଡିଓ ଭାଇରାଲ ପରେ ପୁଲିସ ମୁଖ୍ୟ ଅଭିଯୁକ୍ତଙ୍କ ସମେତ ଘଟଣାରେ ସଂପୃକ୍ତ ୨୪ ଜଣଙ୍କୁ ଗିରଫ କରିଛି । ଖୋଦ ମୁଖ୍ୟମନ୍ତ୍ରୀ ହେମନ୍ତ ବିଶ୍ୱଶର୍ମା ଟୁଇଟ କରି ଦୋଷୀଙ୍କ ବିରୋଧରେ କଡା କାର୍ଯ୍ୟାନୁଷ୍ଠାନ ନେବାକୁ ନିର୍ଦ୍ଦେଶ ଦେଇଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ମଙ୍ଗଳବାର ଡାକ୍ତରଙ୍କୁ ଆକ୍ରମଣର ପ୍ରତିବାଦରେ ଡାକ୍ତରଙ୍କ ସୁରକ୍ଷାକୁ ନେଇ ଓପିଡି ବନ୍ଦ କରି ଆନ୍ଦୋଳନକୁ ଓହ୍ଲାଇଛନ୍ତି ଗୌହାଟିର ଡାକ୍ତର ସଂଘ । ଦୋଷୀଙ୍କୁ ଦୃଷ୍ଟାନ୍ତମୂଳକ ଦଣ୍ଡ ଦେବା ସହ ଡାକ୍ତରଙ୍କ ସୁରକ୍ଷା ପାଇଁ ହସ୍ପିଟାଲ ବାହାରେ ସଶସ୍ତ୍ର ସୁରକ୍ଷାକର୍ମୀ ନିୟୋଜିତ କରିବାକୁ ଦାବି କରିଛନ୍ତି । ଏଥିସହ ସରକାର ଡାକ୍ତରଙ୍କ ସୁରକ୍ଷା ଦେବା ପାଇଁ କଡା ଆଇନ ଆଣିବାକୁ ଦାବି କରିଛନ୍ତି ଆନ୍ଦୋଳନକାରୀ ଡାକ୍ତର ।
ମଙ୍ଗଳବାର ଦିନ କୋଭଡି କେୟାର ସେଂଟରରେ ଗିୟାଜ ଉଦ୍ଦିନ ନାମକ ଜଣେ ଆକ୍ରାନ୍ତଙ୍କ ମୃତ୍ୟୁ ହୋଇଥିଲା । ଏହି ସୂଚନା ଡାକ୍ତର ସୁଏଜ କୁମାର ସେନାପତି ସଂପର୍କୀୟଙ୍କୁ ଦେବା ପରେ ସେମାନେ ରାଗିଯାଇ ଏଭଳି ବର୍ବର ଆକ୍ରମଣ କରିଥିଲେ । ଏବେ ଡାକ୍ତର ସୁଏଜଙ୍କୁ ମେଡିକାଲରେ ଭର୍ତି କରାଯାଇଥିବା ବେଳେ ତାଙ୍କ ସ୍ୱାସ୍ଥ୍ୟବସ୍ଥା ସ୍ଥିର ରହିଛି ।