ନବରଙ୍ଗପୁର ବ୍ଲକ୍ କାର୍ଯ୍ୟାଳୟ ନିକଟ ଏଟିଏମ ଲୁଟ ଘଟଣା । ଡାବୁଗାଁ ଜଙ୍ଗଲରୁ ଧରାପଡିଲେ ୫ ଅନ୍ତରାଜ୍ୟ ଲୁଟେରା କାର ସହ ଟଙ୍କା ଜବତ ।

କନକ ବ୍ୟୁରୋ: ଏଟିଏମ୍ ତାଡି ଟଙ୍କା ଲୁଟ ଘଟଣାରେ ସମସ୍ତ ୫ ଲୁଟେରାଙ୍କୁ ଗିରଫ କଲା ନବରଙ୍ଗପୁର ପୋଲିସ । ସର୍ଚ୍ଚ ଅପରେସନ୍ବେଳେ ଡାବୁଗାଁ ଜଙ୍ଗଲରେ ଲୁଚି ରହିଥିବାବେଳେ ୫ଜଣ ଚୋରଙ୍କୁ ଗିରଫ କରିଛି ପୋଲିସ । ସମସ୍ତ ଲୁଟେରା ବାହାର ରାଜ୍ୟର । ୪ ଜଣ ହରିୟାଣାର ହୋଇଥିବାବେଳେ ଜଣେ ଲୁଟେରା ଛତିଶଗଡର । ସମସ୍ତ ଲୁଟେରାଙ୍କୁ ଜଙ୍ଗଲରୁ ଗିରଫ କରିବା ସହ ସେମାନଙ୍କ କାର ଏବଂ ଲୁଟ ଟଙ୍କା ଜବତ କରିଛି ପୋଲିସ । ତେବେ କେତେ ଟଙ୍କା ଜବତ ହୋଇଛି ସେନେଇ କୌଣସି ସୂଚନା ମିଳିନାହିଁ ।

ଗତକାଲି ବିଳମ୍ବିତ ରାତିରେ ନବରଙ୍ଗପୁର ବ୍ଲକ୍ କାର୍ଯ୍ୟାଳୟ ନିକଟ ଏଟିଏମକୁ କାଟି ଟଙ୍କା ଲୁଟି ନେଇଥିଲେ ଏହି ଲୁଟେରା । କଟରରେ କାଟିବା ସମୟରେ ଏଟିଏମ୍ରେ ନିଆଁ ଲାଗି ଯାଇଥିବାରୁ ଖବର ପାଇ ଘଟଣା ସ୍ଥଳରେ ପହଞ୍ଚି ନିଆଁକୁ ଆୟତ୍ତ କରିଥିଲା ପୋଲିସ । ତେବେ ନିଆଁ ଲାଗି କିଛି ଟଙ୍କା ପୋଡି ଯାଇଥିବାରୁ ସେଗୁଡିକୁ ଦୁର୍ବୃତ୍ତମାନେ ସେଠାରେ ଛାଡି ଚାଲିଯାଇଥିବା ପୋଲିସ ଦେଖିବାକୁ ପାଇଥିଲା । ପରେ ଲୁଟେରାଙ୍କୁ କାବୁ କରିବା ପାଇଁ ପିଛା କରିଥିଲା ପୋଲିସ ପାଟ୍ରୋଲିଂ ଟିମ୍ । ଲୁଟେରାମାନେ ତିରିଶ କିଲୋମିଟର ଦୂର ଡାବୁଗାଁ ନିକଟ ଜଙ୍ଗଲରେ ଗାଡି ଛାଡି ଲୁଚି ରହିଥିଲେ । ସର୍ଚ୍ଚ ଅପରେସନ୍ କରି ସମସ୍ତ ଲୁଟେରାଙ୍କୁ ଗିରଫ କରିବାରେ ସଫଳ ହୋଇଛି ନବରଙ୍ଗପୁର ପୋଲିସ ।