ଫାଙ୍କା ଏଟିଏମକୁ ନେଇ ରାଜନୀତି ! ଟଙ୍କା ସଙ୍କଟ ନେଇ ରାଜ୍ୟବ୍ୟାପୀ ବିଜେଡିର ୨ ଘଣ୍ଟିଆ ପ୍ରତିବାଦ, ଏସବିଆଇ କହିଲା, ଚେଷ୍ଟା କରୁଛୁ
କନକ ବ୍ୟୁରୋ : ଟଙ୍କା ପାଇଁ ଲୋକ ଗୋଟିଏ ଏଟିଏମରୁ ଆଉ ଗୋଟିଏ ଏଟିଏମକୁ ଧାଉଁଥିବା ବେଳେ ଆଜି ପ୍ରତିବାଦକୁ ଓହ୍ଲାଇଛି ବିଜେଡି । ରାଜ୍ୟର ସବୁ ଜିଲ୍ଲାର ବିଭିନ୍ନ ବ୍ୟାଙ୍କ ଆଗରେ ଧାରଣା ଦେବା ସହ କେନ୍ଦ୍ର ସରକାରଂକୁ କାଠଗଡ଼ାରେ ଠିଆ କରିଛି । ଏସବୁ ଭିତରେ ଏସବିଆଇ ଏଟିଏମ୍ ଉପରେ ନିର୍ଭରଶୀଳ ଥିବା ଗ୍ରାହକ ବେଶୀ ହଇରାଣ ହେଉଥିବା ଅଭିଯୋଗ ହୋଇଛି ।
Kanak News is now on WhatsApp
Join and get latest news updates delivered to you via WhatsApp
ଦେଶର ସବୁଠୁ ନିର୍ଭରଶୀଳ ବ୍ୟାଙ୍କ କୁହାଯାଉଥିବା ଭାରତୀୟ ଷ୍ଟେଟ୍ ବ୍ୟାଙ୍କ୍ ଏଟିଏମର ଅସଲ ଚିତ୍ର ଦେଖିଲେ ଆଶ୍ଚର୍ଯ୍ୟ ହେବେ । କେଉଁଠି ସଟର ପଡିଛି ତ’ ଆଉ କେଉଁଠି ଟଙ୍କା ନାହିଁ ବୋଲି ଲେଖା ରହିଛି । ମାତ୍ର ୨୪ ଘଂଟା ଭିତରେ ସ୍ୱାଭାବିକ ଅବସ୍ଥା ଫେରି ଆସିବ ବୋଲି ଦାବି କରିଥିବା ଷ୍ଟେଟ୍ ବ୍ୟାଙ୍କ ଅଧ୍ୟକ୍ଷ ରଜନୀଶ କୁମାରଙ୍କ ମନ୍ତବ୍ୟ ପରର ଦୁଇ ଦିନ ପରେ ଏଟିଏମ୍ ଗୁଡ଼ିକର ଏଭଳି ଅବସ୍ଥା । ଯାହା ଫଳରେ ଲୋକଙ୍କୁ ନିରାଶ ହୋଇ ଫେରିବାକୁ ପଡୁଛି ।
ଦେଶରେ ପ୍ରାୟ ୫୯ ହଜାର ଏସବିଆଇ ଏଟିଏମ୍ ମଧ୍ୟରୁ ଓଡ଼ିଶାରେ ରହିଛି ପ୍ରାୟ ୩ହଜାରୁ ଅଧିକ ଏଟିଏମ୍ । ଆଉ ଅଧିକାଂଶ ଏସବିଆଇ ଏଟିଏମରେ ଟଙ୍କା ବାହାରୁନଥିବା ଅଭିଯୋଗ ହୋଉଛି । ହେଲେ ଏସବିଆଇ କହୁଛି-ଆମେ ଚେଷ୍ଟା କରୁଛୁ । ଅନ୍ୟପଟେ ଏଟିଏମରେ ଟଙ୍କା ସଂକଟ ନେଇ ରାସ୍ତାକୁ ଓହ୍ଲାଇଛି ବିଜେଡି । ରାଜ୍ୟର ସମସ୍ତ ଜିଲ୍ଲାରେ ବ୍ୟାଙ୍କଗୁଡ଼ିକ ସାମ୍ନାରେ ୨ ଘଂଟିଆ ପ୍ରତିବାଦ କରିଛି ବିଜେଡି ।
ନଗଦ ସଂକଟକୁ ନେଇ ବିଜେଡି, ଅଘୋଷିତ ଜରୁରୀକାଳିନ ପରିସ୍ଥିତି ବୋଲି ଅଭିଯୋଗ କରିବା ସହ ବିଜେପି ସରକାର ନିର୍ବାଚନ ପାଇଁ ଟଙ୍କା ସଂଚୟର ବାଟ ଖୋଜୁଛନ୍ତି ବୋଲି ଅଭିଯୋଗ କରିଛି । ଯାହାକୁ ଅତି ଦୁର୍ଭାଗ୍ୟଜନକ କହି, ନିନ୍ଦା କରିଛି ବିଜେପି । ଏଟିଏମରୁ ଟଙ୍କା ବାହାରୁ ନାହିଁ । ବ୍ୟାଙ୍କଗୁଡ଼ିକ ପକ୍ଷରୁ ଗୋଟିଏ ପରେ ଗୋଟିଏ ପ୍ରତିଶ୍ରୁତି ମିଳୁଛି । ନୂଆ ୫ଶହ ଟଙ୍କା ନୋଟ୍ ଛାପିବା ନେଇ ସରକାର ଘୋଷଣା କରୁଛନ୍ତି । ଆଉ ଏସବୁ ଭିତରେ ଲୋକ ହଇରାଣ ହେଉଛନ୍ତି । ଆଉ ଏଥିରୁ ରାଜନୀତିର ରୁଟି ସେକିବାକୁ ପଛଘୁଂଚା ଦେଉ ନାହାଁନ୍ତି ରାଜନୈତିକ ଦଳ ।