୬୫ବର୍ଷରେ ନ୍ୟାୟ ପାଇଁ ସାଇକେଲରେ ଗଲେ ୭୦ କିଲୋମିଟର : ନୂଆପଡାରେ ଗଣପତିଙ୍କ ଜାରି ରହିଛି ଲଢେଇ
ଚକ୍ରାନ୍ତ କରି ଜମି ବାଡି ଛଡାଇ ନେବା ପରେ ଜିଲ୍ଲାପାଳଙ୍କ ଦ୍ୱାରସ୍ଥ ହେଲେ ବି ମିଳୁନି ନ୍ୟାୟ
କନକ ବ୍ୟୁରୋ : ନ୍ୟାୟ ପାଇଁ ୭୦ କିଲୋମିଟର ସାଇକେଲରେ ଆସିଲେ ବୃଦ୍ଧ । ୬ବର୍ଷ ତଳେ ବରଗାଁ ନିକଟ ପୋଡ଼ାପାଲି ଗାଁର ସାବିତ୍ରୀ ଡ଼ମ୍ବଙ୍କ ଠାରୁ ୬ଡ଼ିସିମିଲ ଘରଡ଼ିହ କିଣିଥିଲେ ଖଡ଼ିଆଳ ଥାନା ବରପଦର ଗାଁର ଗଣପତି ଦୁରିଆ । ଏବେ ସେହି ଜମିରେ ଗାଁର ଶ୍ୟାମ ଶଗରିଆ ଓ ନିଅମତି ଶଗରିଆ ଘର ନିର୍ମାଣ କରୁଛନ୍ତି । ଏହାକୁ ବିରୋଧ କଲେ ସେମାନେ ଝଗଡ଼ା କରିବା କରିବା ସହ ମାଡ଼ପିଟ କରୁଥିବାର ସେ ଅଭିଯୋଗ କରିଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ଏନେଇ ଗଣପତି ଦୁରିଆ ଖଡ଼ିଆଳ ଥାନାରେ ଲିଖିତ ଅଭିଯୋଗ କରିଥିଲେ ମଧ୍ୟ ପୋଲିସ କାର୍ଯ୍ୟାନୁଷ୍ଠାନ ନନେବାରୁ ସେ ଖଡ଼ିଆଳ ବିଡିଓଙ୍କୁ ଲିଖିତ ଅଭିଯୋଗ କରିଥିଲେ । ସେଠାରେ ବିଡ଼ିଓ ତାଙ୍କୁ ଡ଼ିମାର୍କେଶନ କରିବାକୁ ପରାମର୍ଶ ଦେଇଥିଲେ । ଖଡ଼ିଆଳ ତହସିଲଦାରଙ୍କ ନିର୍ଦ୍ଦେଶକ୍ରମେ ରାଜସ୍ୱ ନିରୀକ୍ଷକ ତଦନ୍ତ କରିଥିଲେ । ଗଣପତିଙ୍କ ଘରଡ଼ିହକୁ ଶ୍ୟାମ ଶଗରିଆଙ୍କ ବୋଲି କହିଥିଲେ । ନ୍ୟାୟ ପାଇଁ ବାର ଦୁଆର ହେବା ପରେ ଶେଷରେ ଜିଲ୍ଲାପାଳଙ୍କ ଦ୍ୱାରସ୍ଥ ହେବା ପାଇଁ ଚିନ୍ତା କରିଥିଲେ ଗଣପତି ଦୁରିଆ ।
ବସଭଡ଼ା ପାଇସା ନଥିବାରୁ ନିଜ ଘରୁ ଦୀର୍ଘ ୭୦ କିଲୋମିଟର ସାଇକେଲରେ ଯାଇ ଜିଲ୍ଲାପାଳଙ୍କୁ ଭେଟିଛନ୍ତି ଗଣପତି । ତେବେ ସବୁଠାରୁ ଦୁଃଖର କଥା ହେଉଛି ବୃଦ୍ଧ ଜଣଙ୍କ ଏତେବାଟ ସାଇକେଲରେ ଯାଇଥିଲେ ମଧ୍ୟ ଜିଲ୍ଲାପାଳ କୋଭିଡ କଟକଣା ବାହାନା କରି ତାଙ୍କୁ ଭେଟିନଥିଲେ । ।ତେଣୁ ଏହି ଘଟଣାର ଉଚ୍ଚ ସ୍ତରୀୟ ତଦନ୍ତ କରି ଗଣପତିଙ୍କୁ ନ୍ୟାୟ ଦେବାକୁ ସାଧାରଣରେ ଦାବି ହୋଇଛି ।