ପ୍ରତି ୪ ଜଣରେ ଜଣେ ମହିଳା ଘରେ କରୁଛନ୍ତି ଗର୍ଭପାତ। ବିନା ପ୍ରସ୍ତୁତିରେ ଗର୍ଭଧାରଣ ମୁଖ୍ୟ କାରଣ।
କନକ ବ୍ୟୁରୋ : ଭାରତରେ ମହିଳା ସଶକ୍ତିକରଣକୁ ନେଇ ଅନେକ ଚର୍ଚ୍ଚା ହେଉଛି, ଆଲୋଚନା ବି ହେଉଛି । ତେବେ ବାସ୍ତବତା କିଛି ଅଲଗା । ତେବେ ନିକଟ ସାଂଘାତିକ ତଥ୍ୟ ବାହରକୁ ଆସିଛି ଯାହା ଆମର ଏହି କଥାକୁ ନେଇ ଅନେକ ପ୍ରଶ୍ନ ସୃଷ୍ଟି କରିଛି । ୨୦୧୯-୨୦୨୧ରେ ସରକାରୀ ତଥ୍ୟକୁ ବିଶ୍ଳେଷଣ ପରେ ଜଣାପଡିଛି ଦେଶରେ ଆଜି ମଧ୍ୟ ପ୍ରତି ୪ଟି ଗର୍ଭପାତ ମାମଲାରୁ ଗୋଟିଏ ମାମଲା ଘରେ ହେଉଛି । ମହିଳା ବା ଝିଅମାନେ ଘରେ ନିଜେ ଗର୍ଭପାତ କରୁଛନ୍ତି ।
Kanak News is now on WhatsApp
Join and get latest news updates delivered to you via WhatsApp
କେବଳ ଏତିକି ନୁହେଁ, ଅନୁସନ୍ଧାନରୁ ଜଣାପଡିଛି ଯେ ଅଧା ମହିଳାଙ୍କ କହିବା କଥା ଏହି ଗର୍ଭପାତର ମୁଖ୍ୟ କାରଣ ବିନା ପ୍ରସ୍ତୁତିରେ ଗର୍ଭଧାରଣ । ସରକାରୀ ତଥ୍ୟରୁ ଏହି ସବୁ ସାମ୍ନାକୁ ଆସିଛି । ମହିଳା ମାନେ ନିଜେ ଘରେ ଗର୍ଭପାତ କରୁଛନ୍ତି । ୨୦୧୫-୧୬ ବର୍ଷ ତୁଳନାରେ ଏହା ଗୋଟିଏ ପ୍ରତିଶତ ବଢିଛି । ରାଷ୍ଟ୍ରୀୟ ପରିବାର ସ୍ୱାସ୍ଥ୍ୟ ସର୍ଭେକ୍ଷଣ-୫ର ରିପୋର୍ଟ ଅନୁସାରେ ପାଖ ପାଖି ଏକ ଚତୁର୍ଥାଂଶ ବା ୨୭ ପ୍ରତିଶତ ଗର୍ଭପାତ ମହିଳା ନିଜେ ଘରେ କରିଥାନ୍ତି । ଘରେ ଗର୍ଭପାତ କରିବାରେ ସହର ଅନୁପାତ ୨୨.୧ ପ୍ରତିଶତ ଥିବା ବେଳେ ଗ୍ରାମାଞ୍ଚଳରେ ୨୮.୭ ପ୍ରତିଶତ ରହିଛି । ଅର୍ଥାତ ଗାଁର ମହିଳା ମାନେ ସହରର ମହିଳାଙ୍କ ତୁଳନାରେ ଘରେ ଅଧିକ ଗର୍ଭପାତ କରୁଛନ୍ତି ।
ଗର୍ଭପାତ ପାଇଁ ମହିଳାଙ୍କ ପ୍ରଥମ ପସନ୍ଦ ଡାକ୍ତର ହୋଇଥାନ୍ତି । ୫୫ ପ୍ରତିଶତ ଗର୍ଭପାତ ପାଇଁ ମହିଳା ଡାକ୍ତରଙ୍କ ସହାୟତା ନେଇଥାନ୍ତି । ସେହିପରି ୨୭ ପ୍ରତିଶତ ମହିଳା ଘରେ ନିଜେ ଗର୍ଭପାତ କରିଥାନ୍ତି । ୪୮ ପ୍ରତିଶତ ମହିଳା ଗର୍ଭପାତର କାରଣ ବିନା ପ୍ରସ୍ତୁତିରେ ଗର୍ଭଧାରଣକୁ ଦାୟୀ କରିଛନ୍ତି । ଏହା ପରେ ତାଙ୍କ ଶରୀର ପୁଣି ଥରେ ଗର୍ଭଧାରଣ ପାଇଁ ସୁଯୋଗ ଦେଇନଥାଏ । କେବଳ ଏତିକି ନୁହେଁ ୧୦ ପ୍ରତିଶତ ମହିଳାଙ୍କ କହିବା କଥା ଗର୍ଭପା କରିବା ପରେ ପୁଣି ଗର୍ଭଧାରଣ କରିବା ବେଳେ ସେମାନଙ୍କ ପ୍ରଥମ ଶିଶୁର ବୟସ ବହୁତ କମ ହୋଇଥାଏ ।
ଏନଏଚଏଫଏସ-୫ର ଅନୁସାରେ, ଅନେକ ବେସରକାରୀ ଡାକ୍ତରଖାନାରେ କରାଯାଇଥାଏ । ପାଖପାଖି ୫୩ ପ୍ରତିଶତ କ୍ଷେତ୍ରରେ ଏହା ଦେଖାଯାଇଥାଏ । ଯେତେବେଳେ କି ସାର୍ବଜନୀନ କ୍ଷେତ୍ର ବା ସରକାରୀ ଡାକ୍ତରଖାନାରେ ଗର୍ଭପାତର ହାର ୨୦ ପ୍ରତିଶତ । ୨୦୧୫-୧୬ରେ ଏକଚତୁର୍ଥାଂଶରୁ ଅଧିକ ମହିଳା ଘରେ ଗର୍ଭପାତ କରାଉଥିଲେ ।
ବିଭିନ୍ନ ରାଜ୍ୟରେ ଗର୍ଭପାତର ସ୍ଥିତି କ’ଣ ?
ଭାରତରେ ସବୁଠାରୁ ଅଧିକ ଲୋକସଂଖ୍ୟା ରହିଛି ଉତ୍ତରପ୍ରଦେଶରେ । ଏହି ରାଜ୍ୟରେ ନିଜେ ଗର୍ଭପାତ କରୁଥିବା ହାର ୩୪ ପ୍ରତିଶତରୁ ଅଧିକ । ଏହା ପରେ ଡାକ୍ତର, ନର୍ସ, ଏଏନଏମ ଭଳି ସ୍ୱାସ୍ଥ୍ୟକର୍ମୀଙ୍କ ପାଖରେ ୩୦ ପ୍ରତିଶତ ଗର୍ଭପାତ କରାଇଥାନ୍ତି । ଗର୍ଭପାତ ପାଇଁ ଏଠାରେ ଦୁଇଟି କାରଣକୁ ଦାୟୀ କରାଯାଉଛି । ପ୍ରଥମଟି ବିନା ପ୍ରସ୍ତୁତିରେ ଗର୍ଭଧାରଣ । ଏହାର ହାର ୫୦ ପ୍ରତିଶତ ରହିଛି । ସେହିଭଳି ଗର୍ଭାବସ୍ଥାରେ ଅସୁବିଧା କାରଣରୁ ୧୪ ପ୍ରତିଶତ ଗର୍ଭପାତ କରିଥାନ୍ତି । ତେବେ ଉତ୍ତରପ୍ରଦେଶରେ ଦେଖାଯାଉଛି ୩୯ ପ୍ରତିଶତ ଗର୍ଭପାତ ଘରେ ହୋଇଥାଏ । ଏବଂ ସାର୍ବଜନୀନ କ୍ଷେତ୍ରରେ ୩୮ ପ୍ରତିଶତ ଗର୍ଭପାତ ହୋଇଥାଏ ।
ରାଜସ୍ଥାନରେ ସବୁଠାରୁ ଅଧିକ ଗର୍ଭପାତ
ସରକାରୀ ତଥ୍ୟରୁ ଜଣାପଡିଛି, ରାଜସ୍ଥାନରେ ସବୁଠାରୁ ଅଧିକ ଗର୍ଭପାତ ହେଉଛି । ଏଠାରେ ୩୮ ପ୍ରତିଶତ ଘରେ ଗର୍ଭପାତ କରାଉଛନ୍ତି । ଏହା ପରେ ଡାକ୍ତରଙ୍କ ପାଖକୁ ଯାଇ ଗର୍ଭପାତର କରାଇବାର ହାର ୩୬ ପ୍ରତିଶତ ରହିଛି । ଗର୍ଭପାତ କରିବା ପାଇଁ ରାଜସ୍ଥାନରେ ତିନୋଟି କାରଣ ରହିଛି । ୬୧ ପ୍ରତିଶତ ବିନା ପ୍ରସ୍ତୁତିରେ ଗର୍ଭଧାରଣ କରିଥିବାରୁ ଗର୍ଭପାତ କରାଉଛନ୍ତି । ଗର୍ଭାବସ୍ଥାରେ ଅସୁବିଧା ଏବଂ ଡାକ୍ତରଙ୍କ ଅନୁମତି ନମିଳିବାରୁ ୬ ପ୍ରତିଶତ ଗର୍ଭପାତ ହେଉଛି ।
ଦିଲ୍ଲୀରେ ଗର୍ଭପାତର ଦୁଇଟି କାରଣ
ରାଜଧାନୀ ଦିଲ୍ଲୀରେ ମଧ୍ୟ ଗର୍ଭପାତର ସ୍ଥିତି ସଙ୍ଗୀନ ରହିଛି । ଏଠାରେ ଦୁଇଟି କାରଣ ପାଇଁ ଗର୍ଭପାତ କରୁଛନ୍ତି ମହିଳା । ପ୍ରଥମଟି ବିନା ପ୍ରସ୍ତୁତିରେ ଗର୍ଭଧାରଣ । ପ୍ରାୟ ୭୪ ପ୍ରତିଶତ ବିନା ପ୍ରସ୍ତୁତିରେ ଗର୍ଭପାତ କରାଇଥାନ୍ତି । ଦ୍ୱିତୀୟଟି ହେଉଛି ଗର୍ଭାବସ୍ଥାରେ ଅସୁବିଧା ପାଇଁ ୫ ପ୍ରତିଶତ ଗର୍ଭପାତ କରାଉଛନ୍ତି । ୪୯ ପ୍ରତିଶତ ମହିଳା ବେସରକାରୀ ଡାକ୍ତରଖାନାରେ ଗର୍ଭପାତ କରୁଥିବା ବେଳେ ୧୬ ପ୍ରତିଶତ ସରକାରୀ ମେଡିକାଲରେ ଗର୍ଭପାତ କରୁଛନ୍ତି । ଏଠାରେ ଅଧିକ ସଂଖ୍ୟାରେ ଡାକ୍ତର ଗର୍ଭପାତ କରାଉଛନ୍ତି ।
ତାମିଲନାଡୁରେ ୮୦ ପ୍ରତିଶତ ମହିଳା ଗର୍ଭପାତ ପାଇଁ ଡାକ୍ତରଙ୍କ ସହାୟତା ନେଇଥାନ୍ତି । ଏଠାରେ ୬୫ ପ୍ରତିଶତ ଗର୍ଭପାତ ପାଇଁ ବେସରକାରୀ ଡାକ୍ତରଖାନାକୁ ପସନ୍ଦ କରିଥାନ୍ତି । ସେହିଭଳି ୨୬ ପ୍ରତିଶତ ସରକାରୀ ଡାକ୍ତରଖାନାକୁ ପସନ୍ଦ କରିଥାନ୍ତି ।
ଅସୁରକ୍ଷିତ ଗର୍ଭପାତ ମାତୃ ମୃତ୍ୟୁହାରର ବଡକାରଣ
ଅସୁରକ୍ଷିତ ଗର୍ଭପାତ ମାତୃମୃତ୍ୟୁର ସବୁଠାରୁ ବଡ କାରଣ । ତେବେ ଏହାକୁ ରୋକାଯାଇପାରିବ । ୧୯୭୧ ମସିହାରେ ମେଡିକାଲ ଟ୍ରାନସମିଶନ ଅଫ ପ୍ରେଗନେନ୍ସି (ଏମଟିପି) ଆରମ୍ଭ କରାଯାଇଥିଲା । ତେବେ ଦୂରଦୂରାନ୍ତରେ ଥିବା ଲୋକଙ୍କ ପାଖରେ ଏହି ସୁବିଧା ବର୍ତ୍ତମାନ ମଧ୍ୟ ପହଞ୍ଚିପାରିନାହିଁ । ମାତୃ ମୃତ୍ୟୁ ଅନୁପାତରେ ଅସୁରକ୍ଷିତ ଗର୍ଭପାତର ହାର ୮ ପ୍ରତିଶତ । ଯେଉଁମାନେ ସୁରକ୍ଷିତ ଗର୍ଭପାତ ପ୍ରଣାଳୀ ଆପଣେଇ ନଥାନ୍ତି ଭବିଷ୍ୟତରେ ସେମାନଙ୍କ ସ୍ୱାସ୍ଥ୍ୟ ଉପରେ ଏହାର ପ୍ରଭାବ ପଡିଥାଏ । ତେବେ ଦେଶରେ ସୁରକ୍ଷିତ ଗର୍ଭପାତକୁ ନେଇ ଅନେକ ନୀତି ତିଆରି ହୋଇଛି । କେବଳ ଏତିକି ନୁହେଁ ଗର୍ଭପାତ ଆଇନତଃ ସଠିକ୍ ଥିବା ବେଳେ ସ୍ୱାସ୍ଥ୍ୟ ସୁବିଧା ମଧ୍ୟ ଉପଲବ୍ଧ ହୋଇଥାଏ । ଏହା ବାବଦରେ ଲୋକଙ୍କ ମଧ୍ୟରେ ସଚେତନତାର ଅଭାବରୁ ମହିଳା ଘରେ ନିଜକୁ ଅସୁବିଧାରେ ପକାଇ ଗର୍ଭପାତ କରୁଛନ୍ତି ।