ଲକ୍ଷଣ ବିହୀନ କରୋନା ବଢାଉଛି ବିପଦ । ରିପୋର୍ଟରେ ଆସିଲା ସାଂଘାତିକ ତଥ୍ୟ, ଅଜାଣତରେ ସଂକ୍ରମଣ ବଢାଉଛନ୍ତି ଲକ୍ଷଣ ବିହୀନ କରୋନା ଆକ୍ରାନ୍ତ !
ଗୋଟିଏ ପଟେ ପୂରା ବିଶ୍ୱରେ କରୋନା ଦ୍ରୁତ ଗତିରେ ବଢୁଥିବା ବେଳେ ଅନ୍ୟପଟେ ଲକ୍ଷଣ ବିହୀନ ଆକ୍ରାନ୍ତ ଏହି ଚିନ୍ତାକୁ ଦ୍ୱିଗୁଣିତ କରିଛନ୍ତି । ମେଡିକାଲ ଜର୍ଣ୍ଣାଲ ଆନାଲ୍ସ ଅଫ୍ ଇଣ୍ଟରନାଲ ମେଡିସିନରେ ପ୍ରକାଶିତ ଏକ ରିପୋର୍ଟରେ ଲକ୍ଷଣ ବିହୀନ ଆକ୍ରାନ୍ତ ଅଜାଣତରେ ଦ୍ରୁତ ଗତିରେ ଅନ୍ୟ ଲୋକଙ୍କୁ ସଂକ୍ରମିତ କରିଥାନ୍ତି ବୋଲି ସଂକେତ ମିଳିଛି । ଏପରିକି କରୋନାରେ ଆକ୍ରାନ୍ତଙ୍କ ମଧ୍ୟରୁ ୪୦ରୁ ୪୫ ଆକ୍ରାନ୍ତ ଲକ୍ଷଣ ବିହୀନ ରହିବାର ଯଥେଷ୍ଟ ସମ୍ଭାବନା ରହିଛି । ଯେଉଁଥିପାଇଁ ଏହି ଭାଇରସ ଚୁପଚାପ ପୂର୍ବପେକ୍ଷା ଅଧିକ ଲୋକଙ୍କୁ ସଂକ୍ରମିତ କରିବ ବୋଲି ଆଶଙ୍କା ପ୍ରକାଶ ପାଇଛି । ଏଭଳି ଏକ ଗବେଷଣା ଆମେରିକାରେ କରାଯାଇଛି ।
Kanak News is now on WhatsApp
Join and get latest news updates delivered to you via WhatsApp
ରିସର୍ଚ୍ଚରେ କୁହାଯାଇଛି ଯେ, ଲକ୍ଷଣ ବିହୀନ କରୋନା ଆକ୍ରାନ୍ତଙ୍କ ସଂସ୍ପର୍ଶରେ ଆସିଥିବା ବ୍ୟକ୍ତିଙ୍କ ଶରୀରରେ ୧୪ ଦିନରୁ ଅଧିକ ସମୟ ଧରି ଏହି ଭାଇରସ ରହିପାରେ । ଏପରିକି ଲକ୍ଷଣବିହୀନ ଆକ୍ରାନ୍ତଙ୍କ ଶରୀରରେ ମଧ୍ୟ ପରବର୍ତ୍ତୀ ସମୟରେ କରୋନା ଲକ୍ଷଣ ଦେଖିବାକୁ ମିଳିପାରେ । ଇଟାଲୀ ଓ ଜାପାନରେ ଏହି ସମୂହର କରୋନା ଆକ୍ରାନ୍ତ ଚିହ୍ନଟ ହୋଇଛନ୍ତି । ସେହିଭଳି ନ୍ୟୁର୍ୟକ ଓ ଗ୍ରୀକରେ ୧୦ ପ୍ରତିଶତ ଲକ୍ଷଣ ଥିବା ଆକ୍ରାନ୍ତଙ୍କ ଶରୀରରେ ପରବର୍ତ୍ତୀ ସମୟରେ କରୋନାର ପୂରା ଲକ୍ଷଣ ଦେଖିବାକୁ ମିଳିଥିଲା ।
ତେବେ ଏଭଳି ରିପୋର୍ଟ ଭାରତ ପାଇଁ ଚିନ୍ତା ବଢାଇପାରେ । କାରଣ ଆଇସିଏମଆର ଗାଇଡଲାଇନ ଅନୁଯାୟୀ, କେବଳ ଲକ୍ଷଣ ଥିବା ବ୍ୟକ୍ତିଙ୍କର କରୋନା ଟେଷ୍ଟ କରାଯାଇପାରିବ । ତେବେ ୧୮ ମେ’ରେ ଆସିଥିବା ନୂଆ ଗାଇଡଲାଇନ ଅନୁଯାୟୀ, ହାଇ ରିସ୍କରେ ଥିବା ଲକ୍ଷଣବିହୀନ ବ୍ୟକ୍ତି ଓ କରୋନା ଆକ୍ରାନ୍ତଙ୍କ ସିଧାସଳଖ ସମ୍ପର୍କରେ ଆସିଥିବା ଲୋକଙ୍କର ଟେଷ୍ଟ କରାଯିବା ଉଚିତ୍ । ଏସବୁ ଭିତରେ ଯେଉଁ ରିପୋର୍ଟ ସାମ୍ନାକୁ ଆସିଛି ତାହାକୁ ଆଧାର କରି ଆଇସିଏମଆର ନିଜର ଟେଷ୍ଟିଂକୁ ଆହୁରି ବଢାଇବା ଉଚିତ ବୋଲି ବିଶେଷଜ୍ଞ ମାନେ ମତ ଦେଇଛନ୍ତି ।
ଏହାପୂର୍ବରୁ ଡବ୍ଲ୍ୟୁଏଚଓ ପକ୍ଷରୁ କୁହାଯାଇଥିଲା ଯେ, ଲକ୍ଷଣବିହୀନ ଆକ୍ରାନ୍ତଙ୍କ ଠାରୁ ସଂକ୍ରମଣର ସେତେଟା ଭୟ ନଥାଏ । ଏଭଳି ଆକ୍ରାନ୍ତଙ୍କ ଠାରୁ ସଂକ୍ରମଣ ବ୍ୟାପିବାର ଆଶଙ୍କା ମାତ୍ର ୬ ପ୍ରତିଶତ ରହିଥାଏ । ଏଭଳି ବୟାନକୁ ନେଇ ବିଭିନ୍ନ ଆଡୁ ପ୍ରତିକ୍ରିୟା ଆସିବା ପରେ ନିଜ ବୟାନକୁ ଫେରାଇ ନେଇଥିଲା ଡବ୍ଲ୍ୟୁଏଚଓ । ତେବେ ଆମେରିକାର ଏକ ଗବେଷଣା ସଂସ୍ଥାର ରିପୋର୍ଟରେ କୁହାଯାଇଛି ଯେ, ଲକ୍ଷଣବିହୀନ ଥିବା ୪୦ ପ୍ରତିଶତ ଆକ୍ରାନ୍ତ ଅସୁସ୍ଥ ଅନୁଭବ କରିବା ପୂର୍ବରୁ ହିଁ ଶରୀରରେ ସଂକ୍ରମଣ ବ୍ୟାପିବା ଆରମ୍ଭ ହୋଇଥାଏ । ଅଥାର୍ତ ସଂକ୍ରମଣ ବ୍ୟାପିବା ପରେ ଶରୀରରେ କରୋନା ଲକ୍ଷଣ ବାବଦରେ ଜଣାପଡୁଛି ।
ଭାରତୀୟ ସ୍ୱାସ୍ଥ୍ୟ ମନ୍ତ୍ରାଳୟ ଅନୁଯାୟୀ, ଦେଶରେ ୮୦ ପ୍ରତିଶତ କରୋନା ଆକ୍ରାନ୍ତଙ୍କ ଠାରେ ଲକ୍ଷଣ ଦେଖିବାକୁ ମିଳୁନାହିଁ । ଲକ୍ଷଣ ଜଣାପଡୁଥିବା ବାକି ୨୦ ପ୍ରତିଶତ ଆକ୍ରାନ୍ତଙ୍କ ମଧ୍ୟରୁ ୫ ପ୍ରତିଶତ ଲୋକଙ୍କୁ ଭେଣ୍ଟିଲେଟର ତଥା ଅକ୍ସିଜେନ ସିଲିଣ୍ଡରର ଆବଶ୍ୟକତା ପଡୁଛି । ତେବେ ଆକ୍ରାନ୍ତଙ୍କ ମଧ୍ୟରୁ ଅଧିକାଂଶ ସୁସ୍ଥ ହୋଇ ଫେରୁଥିବାର କହିଛି ସ୍ୱାସ୍ଥ୍ୟ ମନ୍ତ୍ରାଳୟ ।