ଅଦରକାରୀ କାଗଜପତ୍ର ପୋଡୁ ପୋଡୁ ନିଜେ ପୋଡିଗଲେ । ଆକାଳରେ ଚାଲିଗଲା ସହକାରୀ ବନ ସଂରକ୍ଷକଙ୍କ ଜୀବନ । କିଛି ମାସ ତଳେ ହୋଇଥିଲା ବିବାହ
କନକ ବ୍ୟୁରୋ: କିଛି ମାସ ତଳେ ହୋଇଥିଲା ବିବାହ । ବେଶ ହସଖୁସିରେ ବନ ବିଭାଗର କ୍ୱାର୍ଟର୍ରେ ରହୁଥିଲେ ଦମ୍ପତି । ହେଲେ ଦମ୍ପତିଙ୍କ ଜୀବନରେ ଏମିତି ଏକ ଝଡ଼ ଆସିଲା, ଯାହା ସବୁ କିଛି ଛାରଖାର କରିଦେଇଗଲା । ଜିଅନ୍ତା ଜଳିଗଲେ ସହକାରୀ ବନ ସଂରକ୍ଷକ ।
Kanak News is now on WhatsApp
Join and get latest news updates delivered to you via WhatsApp
ସୂଚନା ଅନୁସାରେ କିଛି ଅଦରକାରୀ କାଗଜପତ୍ର ପୋଡୁଥିବା ବେଳେ ଅଚାନକ୍ ପାରଳାଖେମୁଣ୍ଡିର ସହକାରୀ ବନ ସଂରକ୍ଷକ ସୌମ୍ୟରଂଜନ ମହାପାତ୍ରଙ୍କ ଦେହରେ ନିଆଁ ଲାଗିଯାଇଥିଲା । ଚାହୁଁଚାହୁଁ ଦେହସାରା ନିଆଁ ଲାଗିଗଲା । ପ୍ରଥମେ ପାରଳାଖେମୁଣ୍ଡି ପରେ ବ୍ରହ୍ମପୁର ବଡ଼ ମେଡ଼ିକାଲ, ଆଉ ଶେଷରେ କଟକର ଏକ ଘରୋଇ ମେଡ଼ିକାଲକୁ ସ୍ଥାନାନ୍ତର କରାଯାଇଥିଲା ।
ଚିକିତ୍ସାଧିନ ଅବସ୍ଥାରେ ଆଖି ବୁଜି ଦେଇଛନ୍ତି ସୌମ୍ୟରଂଜନ । କିନ୍ତୁ କେଉଁ ସ୍ଥିତିରେ ତାଙ୍କ ଦେହରେ ନିଆଁ ଲାଗିଲା? ନିଆଁ ଲାଗିବା ସମୟରେ ତାଙ୍କ ପତ୍ନୀ କରୁଥିଲେ କ’ଣ? କେତେ ବଡ଼ ଅଗ୍ନିକାଣ୍ଡ ହେଲା ଯେ, ଦେହର ୯୦% ପୋଡ଼ିଗଲା? ଏମିତି ଅନେକ ପ୍ରଶ୍ନ ଉଠୁଛି । ଏହି ସବୁ ପ୍ରଶ୍ନ ଭିତରେ ପୁଲିସ୍ ସବୁ ଦିଗକୁ ନେଇ ତଦନ୍ତ ଆରମ୍ଭ କରିଛି ।
ଏହାରି ଭିତରେ ଡାକ୍ତର ଏବଂ ମାଜିଷ୍ଟ୍ରେଟ୍ଙ୍କ ଉପସ୍ଥିତିରେ ମୃତ୍ୟୁକାଳୀନ ଜମାନବନ୍ଧୀ ରେକର୍ଡ କରାଯାଇଛି । ମିଳିଥିବା ସୂଚନା ଅନୁସାରେ ଏଥିରେ ସୌମ୍ୟରଂଜନ କହିଛନ୍ତି- ଘରର କିଛି ଅଦକାରୀ ସାମଗ୍ରୀ ପୋଡୁଥିବା ସମୟରେ କିରୋସିନ୍ରେ ଗୋଡ଼ ପଡ଼ିଯାଇଥିଲା । ଆଉ ନିଆଁ ଲାଗି ଯାଇଥିବାରୁ ସେ ପୋଡ଼ି ଯାଇଥିଲେ । ତେବେ ତାଙ୍କର ଘରୋଇ କଳି କିମ୍ବା କୌଣସି ବିବାଦ ନଥିଲା । କିନ୍ତୁ ଏସବୁ ଭିତରେ ଘଟଣାର ପୃଷ୍ଟଭୂମିକୁ ନେଇ ଏବେ ବି ସନ୍ଦେହ ରହିଛି ।