ପ୍ରତିଦ୍ୱନ୍ଦ୍ୱୀ ବଦଳିଲେ, ନିର୍ବାଚନମଣ୍ଡଳୀ ବଦଳିଲା ହେଲେ ବଦଳିଲାନି ବିଜୟଙ୍କ ଭାଗ୍ୟ । ୧୯’ ବି ପୂରା କରିପାରିଲାନି ୧୯ ବର୍ଷର ସ୍ୱପ୍ନ ।
କନକ ବ୍ୟୁରୋ : ବିଜୟଙ୍କ ବିଧାନସଭା ସ୍ୱପ୍ନ ଭାଙ୍ଗିଦେଲେ ସାବିତ୍ରୀ । ଆଉ ଏହାସହ ବିଜୟଙ୍କ ପାଇଁ ପୁଣିଥରେ ଅପହଞ୍ଚ ପାଲଟିଛି ବିଧାନସଭା । ଦୀର୍ଘ ୧୯ ବର୍ଷ ପରେ ବିଧାନସଭା ଫେରିବାକୁ ବିଜୟ ଯେଉଁ ସ୍ୱପ୍ନ ଦେଖିଥିଲେ ତାହାକୁ ଧୂଳିସାତ କରିଛନ୍ତି ବିଜେଡି ପ୍ରାର୍ଥୀ ସାବିତ୍ରୀ ଅଗ୍ରୱାଲ । ଆଉ ଏହାସହ ପାଟକୁରାକୁ ନେଇ ଲାଗିରହିଥିବା ଚର୍ଚ୍ଚାରେ ପଡିଛି ପୂର୍ଣ୍ଣଚ୍ଛେଦ ।
Kanak News is now on WhatsApp
Join and get latest news updates delivered to you via WhatsApp
୧୮ଟି ରାଉଣ୍ଡରୁ ୧୬ଟି ରାଉଣ୍ଡରେ ବିଜେଡି ଆଗରେ ରହିବା ସହ ପ୍ରାୟ ୧୭ ହଜାରରୁ ଅଧିକ ଭୋଟରେ ପାଟକୁରାରେ ବିଜୟ ବାନା ଉଡାଇଛି ବିଜେଡି । ଆଉ ଏହାସହ ବିଜୟଙ୍କ ବିଧାନସଭା ଫେରିବା ସ୍ୱପ୍ନ ପୁଣିଥରେ ଅଧୁରା ରହିଛି । ଗତ ୧୯ ବର୍ଷ ଧରି କ୍ଷମତା ଅଳିନ୍ଦରୁ ଦୂରରେ ରହିଥିବା ରାଜ୍ୟ ରାଜନୀତିର ଏହି ଚର୍ଚ୍ଚିତ ଚେହେରା ପାଟକୁରା ନିର୍ବାଚନରେ ଜିତି ପୁଣିଥରେ ବିଧାନସଭାକୁ ଫେରିବାକୁ ଆଶା ବାନ୍ଧିଥିଲେ । ଏପରିକି ବିଜୟଙ୍କ ସପକ୍ଷରେ ପାଟକୁରାରେ ହାୱା ମଧ୍ୟ ବହିଥିଲା । କିନ୍ତୁ ବିଜେଡି ସୁପ୍ରିମୋ ନବୀନଙ୍କ ସୁଚିନ୍ତିତ ରଣନୀତି ଆଗରେ ମାତ୍ ଖାଇଥିଲେ ବିଜୟ ।
ବିଧାନସଭାରୁ ଦୂରରେ ବିଜୟ :
ଏକଦା ରାଜ୍ୟ ରାଜନୀତି ତଥା ବିଜୁ ସରକାରରେ ନମ୍ବର ଦୁଇ ସ୍ଥାନରେ ଥିବା ବିଜୟ ମହାପାତ୍ର ଦୀର୍ଘ ୧୯ ବର୍ଷ ଧରି ବିଧାନସଭାରେ ପାଦ ଦେଇପାରିନାହାନ୍ତି । ୨୦୦୦ ମସିହାରେ ବିଜେଡି ଟିକେଟରୁ ଲଢିବାରୁ ବଞ୍ଚି ହେବା ପରେ ବିଧାନସଭା ମାଟି ମାଡିପାରିନାହାନ୍ତି ବିଜୟ । ବାରମ୍ବାର ପ୍ରୟାସ କରିଛନ୍ତି, ନିର୍ବାଚନମଣ୍ଡଳୀ ମଧ୍ୟ ବଦଳାଇଛନ୍ତି । କିନ୍ତୁ ନବୀନଙ୍କ ଷ୍ଟ୍ରାଟେଜି ଆଗରେ ବାରମ୍ବାର ଫେଲ୍ ମାରିଛନ୍ତି ବିଜୟ । ପାଟକୁରାରୁ ମହାକାଳପଡା । ଗତ ୧୯ ବର୍ଷ ମଧ୍ୟରେ ନିର୍ବାଚନମଣ୍ଡଳୀ ବଦଳିଛି, ପ୍ରତିଦ୍ୱନ୍ଦୀ ବଦଳିଛନ୍ତି, ଭିନ୍ନ ଭିନ୍ନ ଦଳର ଟ୍ୟାଗ୍ ମଧ୍ୟ ହାସଲ କରିଛନ୍ତି ବିଜୟ । ସବୁକିଛି ବଦଳିଥିଲେ ବଦଳିନି ବିଜୟଙ୍କ ଭାଗ୍ୟ । ୍ୱ ପରାଜୟର ପରିଧି ଭିତରୁ ବାହାରିପାରି ନାହାନ୍ତି ବିଜୁ ଅମଳର ନେତା ବିଜୟ ।
ରାଜନୈତିକ ସମୀକ୍ଷକଙ୍କ କହିବା ଅନୁଯାୟୀ, ପାଟକୁରା ନିର୍ବାଚନରେ ବିଜୟ ଲଢୁଥିଲେ ନିଜ ରାଜନୈତିକ କ୍ୟାରିୟରର ଶେଷ ଲଢେଇ । ଯେଉଁଥିପାଇଁ ଏହି ନିର୍ବାଚନରେ ଜିତିବା ପାଇଁ ଜୋର ଲଗାଇ ଦେଇଥିଲେ ବିଜୟ । ସ୍ୱାଭିମାନ ଲଢେଇର ନାରା ଦେଇ ମୈଦାନକୁ ଓହ୍ଲାଇଥିଲେ । ପୁଣିଥରେ ହୋମଗ୍ରାଉଣ୍ଡ ପାଟକୁରାକୁ ଫେରିଥିଲେ ମଧ୍ୟ ଭୋଟରଙ୍କ ଭରସା ଜିତିବାରେ ସକ୍ଷମ ହୋଇନଥିଲେ ଏହି ଭେଟରାନ୍ ନେତା । ଆଉ ୧୭ ହଜାରରୁ ଅଧିକ ଭୋଟରେ ପରାଜିତ ହେବା ପରେ ବିଜୟଙ୍କ ରାଜନୈତିକ କ୍ୟାରିୟରରେ ପୂର୍ଣ୍ଣଚ୍ଛେଦ ପଡିପାରେ ବୋଲି ଚର୍ଚ୍ଚା ହେଉଛି ।