ଗୃହକୁ ଗରମ କଲା ସ୍ମିତାରାଣୀ ହତ୍ୟା ମାମଲା । ତଦନ୍ତକୁ ନେଇ ପ୍ରଶ୍ନ ଉଠାଇଲେ ବିରୋଧୀ । କଂଗ୍ରେସ କଲା କକ୍ଷତ୍ୟାଗ, ଗୃହ ମୁଲତବୀ କଲେ ବାଚସ୍ପତି
କନକ ବ୍ୟୁରୋ: ଆସନ୍ତା କାଲି ଯାଏଁ ବିଧାନସଭା ମୁଲତବୀ । ଅପରାହ୍ନରେ ଗୃହ କାର୍ଯ୍ୟ ଆରମ୍ଭ ହେବା ମାତ୍ରେ ପିଇଓ ସ୍ମିତାରାଣୀ ହତ୍ୟା ମାମଲାକୁ ନେଇ ହଙ୍ଗାମା କରିଥିଲେ ବିରୋଧୀ । ଆଉ ପରିସ୍ଥିତି ଏଭଳି ହୋଇଥିଲା କି ମୁଲତବୀ ଦ୍ୱିତୀୟ ଦିନରେ ବି ଗୃହରେ ସ୍ମିତାରାଣୀ ତାତି ଦେଖିବାକୁ ମିଳିଥିଲା । ଯାହା ଫଳରେ ହତ୍ୟା ମାମଲା ନେଇ ହଙ୍ଗାମା କରିବା ପରେ ରାଜ୍ୟ ସରକାରଙ୍କ ଠାରୁ ସନ୍ତୁଷ୍ଟିଜନକ ଉତ୍ତର ନ ପାଇବାରୁ କକ୍ଷତ୍ୟାଗ କରିଛି କଂଗ୍ରେସ । ତେଣୁ ଗୃହକୁ ଆସନ୍ତାକାଲି ପର୍ଯ୍ୟନ୍ତ ଗୃହମୁଲତବୀ କରିଛନ୍ତି ବାଚସ୍ପତି ।
Kanak News is now on WhatsApp
Join and get latest news updates delivered to you via WhatsApp
ସେପଟେ ବିଧାନସଭା ଶୀତ ଅଧିବେଶନର ସ୍ମିତାରାଣୀଙ୍କ ମୃତ୍ୟୁ ନେଇ ମୁଲତବୀ ପ୍ରସ୍ତାବ ଉପରେ ଆଲୋଚନା ଦାବି କରିଥିଲେ ବିରୋଧୀଦଳ । ଏହାପରେ ମୁଲତବୀ ପ୍ରସ୍ତାବର ଉତ୍ତର ରଖିଥିଲେ ଗୃହ ରାଷ୍ଟ୍ରମନ୍ତ୍ରୀ ଦିବ୍ୟଶଙ୍କର ମିଶ୍ର । ମାତ୍ର ଏଥିରେ ବିରୋଧୀ ଦଳ ସନ୍ତୁଷ୍ଟ ନ ହୋଇ ମୁଖ୍ୟମନ୍ତ୍ରୀଙ୍କଠାରୁ ଉତ୍ତର ଦାବି କରିଥିଲେ। ପରେ ମୁଖ୍ୟମନ୍ତ୍ରୀ ଉତ୍ତର ରଖି କହିଥିଲେ ଯେ, ଶବ ବ୍ୟବଚ୍ଛେଦ ରିପୋର୍ଟ ଅନୁସାରେ ସ୍ମିତାରାଣୀଙ୍କ ମୃତ୍ୟୁ ଆତ୍ମହତ୍ୟା ଜନିତ । ତେବେ କଂଗ୍ରେସ ପକ୍ଷରୁ ଏହାକୁ ବିରୋଧ କରାଯାଇ ସିବିଆଇ କିମ୍ବା ଏସଟିଏଫ୍ ତଦନ୍ତ ଦାବି କରାଯାଇ କକ୍ଷତ୍ୟାଗ କରାଯାଇଥିଲା ।
ଗୃହ କାର୍ଯ୍ୟ ଆରମ୍ଭ ହେବା ମାତ୍ରେ କଂଗ୍ରେସ ଓ ବିଜେପି ବିଧାୟକମାନେ ହଟ୍ଟଗୋଳ କରିଥିଲେ । ପ୍ରଶ୍ନ ଉତ୍ତର କାଳ ଆରମ୍ଭ ହେବା ମାତ୍ରେ ବିରୋଧୀ ବିଧାୟକ ଗୃହ ଭିତରେ ହଟ୍ଟଗୋଳ କରିଥିଲେ । ପ୍ଲାକାର୍ଡ ପ୍ରଦର୍ଶନ କରିଥିଲେ ବିଜେପି ବିଧାୟକ । ସ୍ମିତାରାଣୀ ମୃତ୍ୟୁ ଘଟଣାରେ ତଦନ୍ତ ଦାବି, ଯାଜପୁର ଏସପିଙ୍କ ବହିଷ୍କାର, ବେଆଇନ ଘରର ପୃଷ୍ଠପୋଷକ କିଏ , ରଂଗଶାଳାରୁ ସିସିଟିଭି ଗଲା କୁଆଡେ ବୋଲି ବିଜେପି ବିଧାୟକମାନେ ପ୍ରଶ୍ନ ଉଠାଇଥିଲେ ।
ସରକାରୀ କାଗଜପତ୍ରରେ ରଙ୍ଗଶାଳାକୁ ଭାଙ୍ଗି ଦିଆଯାଇଛି କେମିତି ? ଜଣେ ଅଣ ଓଡ଼ିଆ ଏସପି ଜଣେ ଓଡ଼ିଆ ବୋହୂର ଇଜ୍ଜତ ହନନ କରିବେ ? କଂଗ୍ରେସ ନେତା ଶ୍ରୀ ମିଶ୍ର ଗୃହ ବାହାରେ ଆଉ ଦି’ ପାଦ ଆଗକୁ ଯାଇ ସରକାରଙ୍କୁ ପଚାରିଛନ୍ତି ଯେ ଜଣେ ଚା’ ବାଲା ଶହ ଶହ କୋଟିର ମାଲିକ ହେଲା କେମିତି ? ଶବ ବ୍ୟବଚ୍ଛେଦ ରିପୋର୍ଟର ଆଉ ଥରେ ବ୍ୟବଚ୍ଛେଦ କରାଯିବାର ଆବଶ୍ୟକତା ରହିଛି । ସ୍ମିତାରାଣୀ ମୃତ୍ୟୁ ଘଟଣାର ସିବିଆଇ ତଦନ୍ତ ଦାବି କରି ବିଧାନସଭାରେ ବିଜେପି ସଦସ୍ୟଙ୍କ ହଟ୍ଟଗୋଳ । ଆସନ୍ତାକାଲି ଯାଏଁ ଗୃହ ମୁଲତବୀ କଲେ ବାଚସ୍ପତି ।