‘ଫୋନି’ ପ୍ରଭାବିତ ବିଶ୍ୱ ଐତିହ୍ୟସ୍ଥଳୀର ପୁନଃରୁଦ୍ଧାରକୁ ଗୁରୁତ୍ୱ । କୋଣାର୍କର ସ୍ଥିତି ପରଖିଲେ ଏଏସଆଇର ଉଚ୍ଚସ୍ତରୀୟ ଟିମ୍ ।
କନକ ବ୍ୟୁରୋ: କଥା ରଖିଲେ କେନ୍ଦ୍ର ରାଷ୍ଟ୍ର ସଂସ୍କୃତି ମନ୍ତ୍ରୀ । ବାତ୍ୟା ‘ଫୋନି’ରେ ପ୍ରଭାବିତ ହୋଇଥିବା ବିଶ୍ୱ ଐତିହ୍ୟସ୍ଥଳୀ ଶ୍ରୀମନ୍ଦିର ଓ କୋଣାର୍କ ମନ୍ଦିରର ସ୍ଥିତି ସମୀକ୍ଷା ପାଇଁ ଓଡ଼ିଶାରେ ପହଁଚିଛନ୍ତି ଏଏସଆଇର ଉଚ୍ଚସ୍ତରୀୟ ପ୍ରତିନିଧି ଦଳ । ଏହି ଟିମ୍ ଏଏସଆଇ ଡି.ଜି ଶ୍ରୀମତି ଉଷା ଶର୍ମାଙ୍କ ନେତୃତ୍ୱ ଆଜି ଅପରାହ୍ନରେ ପ୍ରଥମେ କୋଣାର୍କ ମନ୍ଦିର ପରିଦର୍ଶନ କରି ସ୍ଥିତି ପରଖିଛନ୍ତି । ସ୍ଥିତି ସମୀକ୍ଷା ପରେ ଏଏସଆଇ ପ୍ରତିନିଧି ଦଳ କହିଛନ୍ତି କି, ସୂର୍ଯ୍ୟମନ୍ଦିରର ବିଶେଷ କିଛି କ୍ଷୟକ୍ଷତି ହୋଇନାହିଁ । ଏପରିକି ସୁର୍ଯ୍ୟ ମନ୍ଦିରେ ଶୋଭା ପାଉଥିବା ପ୍ରତିମୂର୍ତ୍ତୀ ଗୁଡ଼ିକରେ ମଧ୍ୟ କୌଣସି ପ୍ରକାର କ୍ଷତି ମଧ୍ୟ ହୋଇନାହିଁ । କିନ୍ତୁ ସୁର୍ଯ୍ୟମନ୍ଦିରର ଉପର ଭାଗର କିଛି ଅଂଶ ବାତ୍ୟା ଫୋନି ଦ୍ୱାରା ପ୍ରଭାବିତ ହୋଇଛି ।
Kanak News is now on WhatsApp
Join and get latest news updates delivered to you via WhatsApp
ସବୁଠାରୁ ବଡ଼କଥା ହେଲା କି, ପର୍ଯ୍ୟଟକଙ୍କ ସୁବିଧା ପାଇଁ ବର୍ତ୍ତମାନ ସୁଦ୍ଧା ୨୦୦ରୁ ଅଧିକ ଗଛ କଟାଯାଇ ରାସ୍ତା ସଫା କରାଯାଉଛି । ଯେହେତୁ ‘ଫୋନି’ ଚନ୍ଦ୍ରଭାଗାରେ ଲ୍ୟାଣ୍ଡଫଲ କରିଥିଲା ଏହାଫଳରେ ବିଦ୍ୟୁତ୍ ସେବା ଅଧିକ ପ୍ରଭାବିତ ହୋଇଛି । ଫଳରେ ଏହାର ପୁନଃରୁଦ୍ଧାର ହେବାରେ କିଛି ସମୟ ଲାଗିପାରେ । କିନ୍ତୁ ସୂର୍ଯ୍ୟମନ୍ଦିରର ବାହ୍ୟ ପାଶ୍ୱର୍ରେଥିବା ପ୍ରତିମୂର୍ତ୍ତୀକୁ କେମିକାଲ ଦ୍ୱାରା ସଫା କରାଯିବ । ଯାହା ଫଳରେ ଆଗାମୀ ୨ରୁ ୩ ଦିନ ମଧ୍ୟରେ ପର୍ଯ୍ୟଟକମାନେ ପୁଣି ପୂର୍ବଭଳି କୋଣାର୍କ ମନ୍ଦିର ବୁଲି ଦେଖିପାରିବେ ।
ସେପଟେ ପୁରୀ ଶ୍ରୀମନ୍ଦିର ମଧ୍ୟ କ୍ଷୟକ୍ଷତି ବା ସ୍ଥିତି ପରଖିବାକୁ ଯାଇ ପହଁଚିଛନ୍ତି ଏଏସଆଇ ଟିମ୍ । ବାତ୍ୟା ଫୋନିରେ ଶ୍ରୀମନ୍ଦିରର କ’ଣ ସବୁ କ୍ଷତି ହୋଇଛି ତାହାର ପୁଙ୍ଖାନୁପୁଂଖ ଯାଞ୍ଚ କରିବେ । ଏବଂ ଏହାପରେ ପୁନଃରୁଦ୍ଧାର କାର୍ଯ୍ୟକୁ ତ୍ୱରାନ୍ୱିତ କରିବେ । କାରଣ ଆସନ୍ତା ଜୁଲାଇ ୪ ତାରିଖରେ ବିଶ୍ୱ ପ୍ରସିଦ୍ଧ ରଥଯାତ୍ରା ଥିବାରୁ ଏହାର ପୁନଃରୁଦ୍ଧାର ତୁରନ୍ତ କରିବା ପାଇଁ ଗତକାଲି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ କେନ୍ଦ୍ର ରାଷ୍ଟ୍ର ସଂସ୍କୃତି ମନ୍ତ୍ରୀଙ୍କୁ ଚିଠି ଲେଖି ଅବଗତ କରାଇଥିଲେ । ଫଳରେ ଆଜି ଏଏସଆଇର ଉଚ୍ଚସ୍ତରୀୟ ଟିମ୍ ଗ୍ରାଉଣ୍ଡ ଜିରୋରେ ପହଁଚି ସ୍ଥିତି ପରଖିଛନ୍ତି ।