ମାଇକ ଦେବାକୁ ମନା କଲେ କେନ୍ଦ୍ରମନ୍ତ୍ରୀ, ବିଜ୍ଞାପନରେ ମୁଖ୍ୟମନ୍ତ୍ରୀଙ୍କ ଫଟୋ ରଖିଲେନି । ଅଶୋକଙ୍କ ପ୍ରଶ୍ନ, କୁଆଡେ ଗଲା ଧର୍ମେନ୍ଦ୍ରଙ୍କ ବିଶାଳ ହୃଦୟ?
କନକ ବ୍ୟୁରୋ : ଭୁବନେଶ୍ୱରରୁ ରାଉରକେଲାକୁ ବିମାନ ଚଳାଚଳ ଓ ଏହାର ବିଜ୍ଞାପନରେ ଫଟୋକୁ ନେଇ ତେଜିଛି ରାଜନୀତି । ଗତକାଲି ଏହି ପ୍ରସଙ୍ଗରେ ବିଜେଡିକୁ ବିଜେପି ଘେରିଥିବା ବେଳେ ଆଜି ବାହାରିଥିବା ଖବରକାଗଜ ବିଜ୍ଞାପନକୁ ନେଇ ବିଜେପିକୁ ଟାର୍ଗେଟ କରିଛି ବିଜେଡି । ବିଶାଳ ହୃଦୟର କଥା କହୁଥିବା କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କ ମହାନତା କୁଆଡେ ଗଲା ବୋଲି ପ୍ରଶ୍ନ କରିଛନ୍ତି ମନ୍ତ୍ରୀ ଅଶୋକ ପଣ୍ଡା । ଯଦି ବିଶାଳ ହୃଦୟ ଥିଲା ତେବେ ଆଜି ବିଜ୍ଞାପନରେ ମୁଖ୍ୟମନ୍ତ୍ରୀଙ୍କ ଫଟୋ କାହିଁକି ଦେଲେନି ବୋଲି ପ୍ରଶ୍ନ କରିଛନ୍ତି ଅଶୋକ । ବିଜ୍ଞାପନରେ ଲିଙ୍ଗରାଜ ମନ୍ଦିରର ଓ ରାଉରକେଲା ଷ୍ଟିଲ ପ୍ଲାଣ୍ଟର ଫଟୋ ଦେଇପାରିଥାନ୍ତେ ବୋଲି କହିଛନ୍ତି ଅଶୋକ ।
Kanak News is now on WhatsApp
Join and get latest news updates delivered to you via WhatsApp
ସେହିଭଳି ଭୁବନେଶ୍ୱରରୁ ରାଉରକେଲାକୁ ବିମାନ ଉଡାଣ ଉଦଘାଟନୀ ସମାରୋହ ଘଟଣାକୁ ନେଇ ଧର୍ମେନ୍ଦ୍ରଙ୍କ ଉପରେ ବର୍ଷିଛନ୍ତି ମନ୍ତ୍ରୀ ଅଶୋକ ପଣ୍ଡା । ସେ କହିଛନ୍ତି ବିମାନବନ୍ଦର ପରିସରରେ ହୋଇଥିବା ବୈଠକରେ ପ୍ରଧାନମନ୍ତ୍ରୀ ଓ ବିମାନ ଚଳାଚଳ ମନ୍ତ୍ରୀଙ୍କୁ ଧନ୍ୟବାଦ୍ ଦେଇଥିଲୁ କିନ୍ତୁ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ ପ୍ରଧାନମନ୍ତ୍ରୀଙ୍କ ଫଟୋ ନଥିବା ନେଇ ମୁଖ୍ୟମନ୍ତ୍ରୀଙ୍କ ହୀନ ମାନ୍ୟତା କଥା କହିଲେ । ଏହାକୁ ବରଦାସ୍ତ କରାଯାଇ ନପାରେ କହି ସ୍ୱର ଶାଣିତ କରିଥିଲେ । ଘର କଥା କହି ଓଡ଼ିଆରେ କହି ମୁଖ୍ୟମନ୍ତ୍ରୀଙ୍କୁ ସମାଲୋଚନା କରିଥିଲେ । ପରବର୍ତୀ ମୁହୂର୍ତ୍ତରେ କେନ୍ଦ୍ର ବିମାନ ଚଳାଚଳ ମନ୍ତ୍ରୀ ମଧ୍ୟ ମୁଖ୍ୟମନ୍ତ୍ରୀଙ୍କ ହୀନ ମାନ୍ୟତା କଥା କହିଥିଲେ । କିନ୍ତୁ ଏପ୍ରସଙ୍ଗରେ କହିବାକୁ ଯେତେବେଳେ ମୁଁ ଚାହିଁଲି ସେତେବେଳେ ମୋତେ ମାଇକ ଦେବାକୁ ମନା କରିଥିଲେ ଧର୍ମେନ୍ଦ୍ର ବୋଲି ଅଭିଯୋଗ କରିଛନ୍ତି ଅଶୋକ ପଣ୍ଡା ।
କିଛି ସମୟ ପୂର୍ବରୁ ଘର କଥା କହି ଓଡ଼ିଆରେ ନିଜ ଭାଷଣ କହୁଥିବା ବେଳେ ସିନ୍ଧିଆ କିପରି ଘର କଥା ଜାଣିଲେ ବୋଲି ପ୍ରଶ୍ନ କରିଛନ୍ତି ଆଶୋକ ପଣ୍ଡା । ଏହା ସମ୍ପୂର୍ଣ ସୁପରିକଳ୍ପିତ ଓ ସୁଚିନ୍ତିତ ଷଡ଼ଯନ୍ତ୍ର । ପୂର୍ବରୁ ଶିଖାଶିଖି ହୋଇ ଆଗରୁ କଥା ବାର୍ତ୍ତା ହୋଇ ଏପରି କରିଛନ୍ତି ବୋଲି କହିଛନ୍ତି ଅଶୋକ ।
ଏହାପୂର୍ବରୁ ଦୁଇ ଦୁଇଟି କେନ୍ଦ୍ରୀୟ ବିଦ୍ୟାଳୟ ସମୟରେ ମୁଖ୍ୟମନ୍ତ୍ରୀ ଜମି ଦେବା ସହ ସ୍ଥାନୀୟ ବିଧାୟକ ଭାବେ ବହୁତ୍ ପରିଶ୍ରମ କରିଛି କିନ୍ତୁ ସ୍ଥାନୀୟ ବିଧାୟକ ଭାବେ ମୋତେ ନିମନ୍ତ୍ରଣ କଲେନି । ଏହି କେନ୍ଦ୍ରମନ୍ତ୍ରୀ ନିମନ୍ତ୍ରଣ କଲେନି । କୁଆଡେ ଗଲା କେନ୍ଦ୍ରମନ୍ତ୍ରୀଙ୍କ ବିଶାଳ ହୃଦୟ । ସେହିଭଳି ପାଇକ ବିଦ୍ରୋହର ୨୦୦ ବର୍ଷ ପୂର୍ତ୍ତିକୁ ନେଇ ଯେତେବେଳେ ବିଜ୍ଞାନ ଭବନରେ କାର୍ଯ୍ୟକ୍ରମ କରାଯାଇଥିଲା ସେତେବେଳେ ରାଜ୍ୟର ସଂସ୍କୃତି ମନ୍ତ୍ରୀ ହିସାବରେ ମୋତେ ନିମନ୍ତ୍ରଣ ମଧ୍ୟ ଦିଆଗଲାନି । ସେତେବେଳେ କେନ୍ଦ୍ରମନ୍ତ୍ରୀ ମହେଶ ଶର୍ମା କହିଥିଲେ ଏହା ଧର୍ମେନ୍ଦ୍ର ପ୍ରଧାନଙ୍କ କାମ, ସେତେବେଳେ କୁଆଡେ ଗଲା ଧର୍ମେନ୍ଦ୍ରଙ୍କ ବିଶାଳ ହୃଦୟ ବୋଲି କହିଛନ୍ତି ଅଶୋକ ।