ବିଜେପିରେ ଯୋଗ ଦେଲେ ଅଞ୍ଜଳି ବେହେରା : ଆସିଲେନି ଭାଇ ଅଶୋକ ନାୟକ
କହିଲେ ମିଶ୍ରଣ ନେଇ ପାର୍ଟି ଅଫିସରୁ ଜାଣିଲେ, ହେଲେ ଜଣାଇ ନଥିଲେ ଭଉଣୀ; ଆଗାମୀ ନିର୍ବାଚନରେ ଅଶୋକଙ୍କ ଗାଦି ଛଡ଼ାଇବେକି ଅଞ୍ଜଳି?
କନକ ବ୍ୟୁରୋ : ପୂର୍ବତନ ମନ୍ତ୍ରୀ ଅଞ୍ଜଳୀ ବେହେରାଙ୍କ ବିଜେପିରେ ଯୋଗଦାନ ନେଇ କ୍ଷୋଭ ପ୍ରକାଶ କରିଛନ୍ତି ସାନ ଭାଇ ଅଶୋକ ନାୟକ । ମିଶ୍ରଣ ପର୍ବରେ ଅଶୋକଙ୍କ ଅନୁପସ୍ଥିତ ରହିବା ଏବଂ ତାଙ୍କୁ ଭଉଣୀ ଡାକିନଥିବା ସେ କହିବା ପରେ ପରିବାର ଭିତରେ ସବୁକିଛି ଠିକ୍ ଚାଲିନଥିବା କୁହାଯାଉଛି । ରାଜନୀତି ପୃଷ୍ଠଭୂମି ଦୃଷ୍ଟିରୁ ଅଞ୍ଜଳି ହିନ୍ଦୋଳ ନିର୍ବାଚନମଣ୍ଡଳୀରେ ବେଶ ପୁରୁଖା । ବାପା ତ୍ରିିନାଥ ନାୟକ ହିନ୍ଦୋଳ ନିର୍ବାଚନ ମଣ୍ଡଳୀରେ ଏକାଧିକ ଥର ବିଧାୟକ ଭାବେ ଜିତି ବିଜୁ ପଟ୍ଟନାୟକଙ୍କ ଅମଳରେ ମନ୍ତ୍ରୀପଦ ହାସଲ କରିଥିଲେ । ତ୍ରିନାଥଙ୍କ ଅନ୍ତେ ତାଙ୍କ ପତ୍ନୀ ଏବଂ ପରେ ଝିଅ ଅଞ୍ଜଳି ବିଜେଡିର ମଙ୍ଗ ଧରିଥିଲେ ।
Kanak News is now on WhatsApp
Join and get latest news updates delivered to you via WhatsApp
୨୦୦୦ରୁ ୨୦୧୪ ଯାଏ କ୍ରମାଗତ ଭାବେ ୩ଥର ବିଜେଡିରୁ ବିଜୟୀ ହୋଇ ବିଧାୟିକା ହେବା ସହ ଦୁଇ ଥର ମନ୍ତ୍ରୀ ପଦ ଅଳଙ୍କୃତ କରିଥିଲେ। କ୍ୟାବିନେଟ୍ ପାହ୍ୟା ମଧ୍ୟ ପାଇଥିଲେ । ୨୦୧୨ମସିହା ମିଡ୍ନାଇଟ୍ ଅପରେସନ୍ ପାଇଁ ଅଞ୍ଜଳିଙ୍କ ରାଜନୈତିକ କ୍ୟାରିୟର ଏକପ୍ରକାର ଅନ୍ଧକାର ଭିତରକୁ ଠେଲି ହୋଇଯାଇଥିଲା । ୨୦୧୪ ନିର୍ବାଚନରେ ତାଙ୍କୁ ବିଜେଡି ଟିକେଟ୍ ନ ମିଳିବାରୁ ସେ ସ୍ବାଧୀନ ଭାବେ ନିର୍ବାଚନ ଲଢ଼ି ପରାଜିତ ହୋଇଥିଲେ । ଦଳ ବିରୋଧୀ କାର୍ଯ୍ୟ ପାଇଁ ବିଜେଡି ତାଙ୍କୁ ଦଳରୁ ବହିଷ୍କାର କରିଥିଲା । ଏହାପରେ ଅଞ୍ଜଳିଙ୍କ ପାଇଁ ବିଜେଡି ବାଟ ଏକପ୍ରକାର ବନ୍ଦ ହୋଇ ଯାଇଥିଲା ।
ଅପରପକ୍ଷରେ ଗତ ୨୦୧୯ ବିଧାନସଭା ନିର୍ବାଚନରେ ଅଞ୍ଜଳିଙ୍କ ସାନ ଭାଇ ଅଶୋକଙ୍କ ଉପରେ ବିଜେପି ଆସ୍ଥା ପ୍ରକଟ କରିଥିଲା । ଏହି ନିର୍ବାଚନରେ ହିନ୍ଦୋଳ ନିର୍ବାଚନମଣ୍ଡଳୀ ପାଇଁ ଅଶୋକଙ୍କୁ ବିଧାୟକ ପ୍ରାର୍ଥୀ କରିଥିଲା ବିଜେପି । ଯଦିଓ ଭାଇ ଅଶୋକଙ୍କ ପାଇଁ ଅଞ୍ଜଳି ସେତେବେଳେ ନିର୍ବାଚନ ପ୍ରଚାର କରୁଥିଲେ, କିନ୍ତୁ ବିଜେପିରେ ବିଧିବଦ୍ଧ ସାମିଲ ହୋଇ ନ ଥିଲେ । ଏପଟେ ବିଜେପିରେ ସାମିଲ୍ ହେବା ପାଇଁ ଅଞ୍ଜଳି ନିଜ ସମର୍ଥକଙ୍କୁ ନେଇ ରାଜଧାନୀକୁ ଗଲାବେଳକୁ ହିନ୍ଦୋଳ ନେତୃତ୍ବ ଦାୟିତ୍ବରେ ଥିବା ସାନଭାଇ ଅଶୋକ ସମାବେଶରେ ଯୋଗ ନ ଦେବା, ଅଞ୍ଜଳି ତାଙ୍କୁ ନ ଜଣାଇବା ଘଟଣା ଭାଇ-ଭଉଣୀ ମଧ୍ୟରେ ଥିବା ଅସନ୍ତୋଷକୁ ସୂଚାଇ ଦେଉଛି ।
ଏହି ମିଶ୍ରଣ ପର୍ବ ସମ୍ପର୍କରେ ଅଶୋକ କହିଛନ୍ତି, ସେ ଦୁଇ ଦିନ ତଳେ ପାର୍ଟି ଅଫିସରୁ ମିଶ୍ରଣ ପର୍ବ ସମ୍ପର୍କରେ ଜାଣିଥିଲେ । ହେଲେ ତାଙ୍କ ଭଉଣୀ ଏ ସମ୍ପର୍କରେ କିଛି ଜଣାଇନଥିଲେ । ସେ ବାହାରେ ଥିବାରୁ ଏହି ସମାବେଶରେ ଯୋଗ ଦେଇନଥିଲେ । ତାଙ୍କୁ ହଟାଇ ବିଜେପି ଭଉଣୀଙ୍କୁ ଟିକେଟ ଦେବାକୁ ଚାହୁଁଛି କି ବୋଲି ପ୍ରଶ୍ନର ଉତରରେ ଏହା ସମୟ କହିବ ବୋଲି ଅଶୋକ କହିଛନ୍ତି ।