ମନୋଜ ତିୱାରୀଙ୍କ ପରେ ରାଜନୀତିରେ ଯୋଗଦେଲେ ପୂର୍ବତନ କ୍ରିକେଟର ଅଶୋକ ଡିଣ୍ଡା । ବାବୁଲ ସୁପ୍ରିଓଙ୍କ ଉପସ୍ଥିତିରେ ଧରିଲେ ପଦ୍ମ । ‘ସୁନାର ବାଙ୍ଗଲା’ ପାଇଁ ନେଲେ ଶପଥ
କନକ ବ୍ୟୁରୋ : ରାଜନୀତିରେ ରାଜକୀୟ ଜୀବନ ଉପଭୋଗ କରିବାକୁ ଏବେ ଜଣଙ୍କ ପରେ ଜଣେ କ୍ରିକେଟର ବିଭିନ୍ନ ଦଳରେ ଯୋଗ ଦେବାରେ ଲାଗିଛନ୍ତି । ଗତକାଲି ପଶ୍ଚିମବଙ୍ଗରେ କ୍ରିକେଟର ମନୋଜ ତିୱାରୀ ତୃଣମୂଳ କଂଗ୍ରେସରେ ଯୋଗ ଦେଇଥିବା ବେଳେ ଆଜି କ୍ରିକେଟର ଅଶୋକ ଡିଣ୍ଡା ବିଜେପିରେ ଯୋଗ ଦେଇଛନ୍ତି । ଡିଣ୍ଡା କେନ୍ଦ୍ରମନ୍ତ୍ରୀ ବାବୁଲ ସୁପ୍ରିଓଙ୍କ ଉପସ୍ଥିତିରେ ବିଜେପିରେ ଯୋଗ ଦେଇଛନ୍ତି । କିଛିଦିନ ପୂର୍ବରୁ ଶ୍ରୀ ଡିଣ୍ଡା ଅନ୍ତର୍ଜାତୀୟ କ୍ରିକେଟରୁ ଅବସର ଘୋଷଣା କରିଥିଲେ ।
Kanak News is now on WhatsApp
Join and get latest news updates delivered to you via WhatsApp
ସୂଚନା ଥାଉକି, ୩୬ ବର୍ଷିୟ ଡିଣ୍ଡା ଭାରତ ପାଇଁ ମୋଟ ୧୩ ଟି ଏକଦିବସୀୟ ଓ ୯ ଟି ଟି-୨୦ ମ୍ୟାଚ୍ ଖେଳିଛନ୍ତି । ସେ ୨୦୦୯ ମସିହାରେ କ୍ୟାପଟେନ୍ କୁଲ ମହେନ୍ଦ୍ର ସିଂ ଧୋନୀଙ୍କ ଅଧିନାୟକତ୍ୱରେ ଅନ୍ତର୍ଜାତୀୟ କ୍ରିକେଟରେ ଯୋଗ ଦେଇଥିଲେ । ସେ ଶ୍ରୀଲଙ୍କା ବିରୋଧରେ ନାଗପୁର ଠାରେ ପ୍ରଥମ ଟି-୨୦ ମ୍ୟାଚ୍ ଖେଳିବାର ସୁଯୋଗ ପାଇଥିଲେ । ଜଣେ ଦକ୍ଷ ବୋଲର ଭାବେ ସେ ଏକଦିବସୀୟ ମ୍ୟାଚରୁ ୧୨ ଟି ଓ ଟି-୨୦ ରେ ୧୭ ଟି ୱିକେଟ୍ ନେବାରେ ସଫଳ ହୋଇଥିଲେ । ସେ ୨୦୧୩ ମସିହାରେ ଶେଷଥର ପାଇଁ ଅନ୍ତର୍ଜାତୀୟ ମ୍ୟାଚ୍ ଖେଳିଥିଲେ ।
କିଛିଦିନ ମଧ୍ୟରେ ପଶ୍ଚିମବଙ୍ଗ ନିର୍ବାଚନ ପାଇଁ ତାରିଖ ଘୋଷଣା କରିବେ ନିର୍ବାଚନ କମିଶନ । ହେଲେ ଏହା ପୂର୍ବରୁ ପଶ୍ଚିମବଙ୍ଗରେ ରାଜନୈତିକ ମାହୋଲ ପୁରା ସରଗରମ ହୋଇଛି । ମମତାଙ୍କ ତୃଣମୂଳ କଂଗ୍ରେସରୁ ଅନେକ ନେତା ବିଜେପିରେ ଯୋଗ ଦେଇଛନ୍ତି । ଏପରି ସ୍ଥଳେ ମମତାଙ୍କୁ ଏକା ଛାଡିବାକୁ ଦେବେ ନାହିଁ କହି ପୂର୍ବତନ କ୍ରିକେଟର ମନୋଜ ତିୱାରୀ ଗତକାଲି ଟିଏମସିରେ ଯୋଗ ଦେଇଥିବା ବେଳେ ଅଶୋକ ଡିଣ୍ଡା ‘ସୁନାର ବାଙ୍ଗଲା’ ନିର୍ମାଣ କରିବାକୁ ବିଜେପିରେ ଯୋଗ ଦେଇଛନ୍ତି । ଦେଖିବାକୁ ବାକି ରହିଲା ରାଜନୈତିକ ମୈଦାନରେ ଏହି ଦୁଇ କ୍ରିକେଟରଙ୍କ ମଧ୍ୟରୁ କିଏ ନିଜର ଦବଦବା ଜାହିର କରିପାରୁଛି ।