କନକ ବ୍ୟୁରୋ: ପ୍ରସବ ଯନ୍ତ୍ରଣାରେ ଛାଟିପିଟି ହେଉଥିଲେ ପ୍ରସୂତି । ସମୟ ଯେତିକି ଗଡୁଥିଲା, ଗର୍ଭ ଯନ୍ତ୍ରଣା ସେତିକି ବଢୁଥିଲା । ଆଉ ଯନ୍ତ୍ରଣାକୁ ଚାପି ଘର କୋଣରେ ବସିଥିଲା ଯନନୀ । କାରଣ ଭରା ନଦୀ ପାର ହୋଇ ହସ୍ପିଟାଲ ଯିବାକୁ ତାର ସାହସ ନଥିଲା । ହେଲେ ଏତିକି ବେଳେ ସାମ୍ନାକୁ ଆସିଥିଲେ ସାହସୀ ଆଶା । ମହିଳାଙ୍କ ଯନ୍ତ୍ରଣା ସହି ନପାରି ଉଛୁଳା ନଦୀ ମଝିକୁ ନିଜେ ପଶିଥିଲେ ଆଉ ପ୍ରଖର ସ୍ରୋତକୁ କାଟି କାଟି ଗର୍ଭବତୀ ମହିଳାଙ୍କୁ ଭରା ନଦୀ ପାର କରିଥିଲେ ।
Kanak News is now on WhatsApp
Join and get latest news updates delivered to you via WhatsApp
ତେବେ କେନ୍ଦୁଝର ଜିଲ୍ଲା ତେଲକୋଇ ବ୍ଲକ ସାପଲାଞ୍ଜି ଗାଁର ଗର୍ଭବତୀ ମହିଳା ଚନ୍ଦ୍ରୀ ମୁଣ୍ଡା ଆଜି ଭୋରୁ ଗର୍ଭ ଯନ୍ତ୍ରଣାରେ ଛଟପଟ ହେଉଥିଲେ । ଆଉ ଏକଥା ଶୁଣି ତାଙ୍କୁ ମେଡିକାଲ ନେବାକୁ ପହଞ୍ଚିଥିଲେ ଆଶା ଦିଦି ପୁଷ୍ପଲତା ପାତ୍ର । ମାତ୍ର ନଦୀରେ ପାଣି ବଢି ଯାଇଥିବାରୁ ଆଉ ବର୍ଷା ପବନରେ ଗତରାତିରେ ହୁଲି ଡଙ୍ଗା ଭାସି ଯାଇଥିବାରୁ ନଦୀ ପାର ହେବା ଅସମ୍ଭବ ହୋଇ ପଡିଥିଲା ।
ହେଲେ ଗର୍ଭବତୀଙ୍କ ଯନ୍ତ୍ରଣା ଆଗରେ ନିଜ ଜୀବନକୁ ବାଜି ଲଗାଇ ସାହସିକତା ଦେଖାଇଥିଲେ ଆଶା ଦିଦି । ଆଉ ମହିଳାଙ୍କୁ ଭରା ନଦୀରୁ ପାର କରି ହସ୍ପିଟାଲ ନେଇଥିଲେ । ତେବେ ଭରା ନଦୀରେ ଭରସା ସାଜିଥିବା ଆଶା ଦିଦି ପୁଷ୍ପଲତାଙ୍କ ଏଭଳି ସାହସିକତା ପାଇଁ ତାଙ୍କୁ ଚାରିଆଡୁ ପ୍ରଶଂସା ମିଳୁଛି ।