କରୋନା ମହାମାରୀର ତାଣ୍ଡବ ଭିତରେ ମୁହଁ ଖୋଲିଲେ ପ୍ରଧାନମନ୍ତ୍ରୀ । ନରେନ୍ଦ୍ର ମୋଦୀ କହିଲେ, ପ୍ରଧାନ ସେବକ ହୋଇଥିବାରୁ ସମସ୍ତ ସୁଖ ଦୁଃଖର ସେ ଭାଗିଦାର
କନକ ବ୍ୟୁରୋ: ଦ୍ୱିତୀୟ ଲହରରେ କରୋନାର ତାଣ୍ଡବ, ଅକ୍ସିଜେନ୍, ଔଷଧ ଏବଂ ଟିକାର ଅଭାବ ନେଇ ସରକାର କଡ଼ା ସମାଲୋଚନାର ଶିକାର ହେଉଥିବା ବେଳେ ମୁହଁ ଖୋଲିଛନ୍ତି ପ୍ରଧାନମନ୍ତ୍ରୀ । କହିଛନ୍ତି, ଏହି ଭୂତାଣୁ ଯୋଗୁଁ ଲୋକେ ସେମାନଙ୍କ ନିକଟ ସଂପର୍କୀୟଙ୍କୁ ହରାଉଛନ୍ତି । ଦେଶବାସୀ ଦୁଃଖ ଯନ୍ତ୍ରଣା ଭୋଗୁଛନ୍ତି, ଅନ୍ୟମାନଙ୍କ ଭଳି ସେ ମଧ୍ୟ ଏହି ଯନ୍ତ୍ରଣାକୁ ଅନୁଭବ କରୁଛନ୍ତି । ମୋଦୀ କହିଛନ୍ତି, ପ୍ରଧାନ ସେବକ ହୋଇଥିବାରୁ ସମସ୍ତ ସୁଖ ଦୁଃଖର ସେ ଭାଗିଦାର ।
Kanak News is now on WhatsApp
Join and get latest news updates delivered to you via WhatsApp
କୃଷକଙ୍କ କାର୍ଯ୍ୟକ୍ରମ ଅବସରରେ ଦେଶବାସୀଙ୍କୁ ଅନଲାଇନ୍ରେ ସମ୍ବୋଧନ କରି ପ୍ରଧାନମନ୍ତ୍ରୀ କହିଛନ୍ତି, ଏକ ଅଦୃଶ୍ୟ ଏବଂ ରୂପ ବଦଳାଉଥିବା ଶତ୍ରୁ ସହ ଆମେ ମୁକାବିଲା କରୁଛୁ । ଭୂତାଣୁର ନୂଆ ମ୍ୟୁଟାଂଟ ଯୋଗୁଁ କରୋନାର ଦ୍ୱିତୀୟ ଲହର ସାଂଘାତିକ ସ୍ଥିତି ସୃଷ୍ଟି କରିଛି । ତେବେ ଯୁଦ୍ଧକାଳୀନ ସ୍ଥିତି ଭଳି ଏହାର ମୁକାବିଲା କରାଯାଉଛି । ୧୦୦ ବର୍ଷ ମଧ୍ୟରେ ଏହା ସବୁଠୁ ବଡ଼ ବିଶ୍ୱମହାମାରୀ । ସାରା ପୃଥିବୀ ଏହାର ପ୍ରାଦୁର୍ଭାବ ଭୋଗୁଛି ।
ଅକ୍ସିଜେନ୍, ଔଷଧ ଠାରୁ ଆରମ୍ଭ କରି ଟିକା ପର୍ଯ୍ୟନ୍ତ ସବୁକିଛି ଉପଲବ୍ଧ କରିବା ପାଇଁ ସରକାର ପଦକ୍ଷେପ ନେଇଛନ୍ତି ବୋଲି କହିଛନ୍ତି ମୋଦୀ । ୧୮ ଲକ୍ଷ ଡୋଜ୍ ଟିକା ଦିଆଗଲାଣି, ଯେଉଁମାନଙ୍କ ପାଳି ପଡୁଛି, ସେମାନେ ନିଶ୍ଚିତ ଟିକା ନିଅନ୍ତୁ ବୋଲି ଅପିଲ୍ କରିଛନ୍ତି ପ୍ରଧାନମନ୍ତ୍ରୀ । ଗାଁ ଆଡକୁ କରୋନା ମୁହାଁଉଥିବା ବେଳେ ସତର୍କ ରହିବାକୁ ସେ ପରାମର୍ଶ ଦେଇଛନ୍ତି । ଲୋକଙ୍କୁ ସଚେତନ କରାଇବା ପାଇଁ ଗ୍ରାମ ପଂଚାୟତ ପ୍ରମୁଖ ଭୂମିକା ନିଅନ୍ତୁ ବୋଲି କହିଛନ୍ତି ମୋଦୀ ।
କରୋନା ଦ୍ୱିତୀୟ ଲହରର ମୁକାବିଲା କିପରି ହେବ, ଏ ନେଇ ରଣନୀତି ପ୍ରସ୍ତୁତ ନକରି ଧାର୍ମିକ ଓ ରାଜନୈତିକ ସମାବେଶ ପାଇଁ ଅନୁମତି ଦେଇ କେନ୍ଦ୍ର ସରକାର ଓ ପ୍ରଧାନମନ୍ତ୍ରୀ ବେଶ ସମାଲୋଚିତ ହୋଇଛନ୍ତି ।